Дидар Есемов: «Ақтөбеге» тек жеңіс қажет

 18–20 шілде аралығында қатарынан үш күн бойы Қазақстан Премьер-лигасының 17-тур ойындары өтеді.  Осы матчтар қарсаңында белгілі спорт комментаторы Дидар Есемов KFF League сайтына өз болжамын жасады.

«Астана» – «Тұран»

Премьер-лигада көшбасшысы дағдарыстан шыға алмай жүрген командаға қарсы ойында қиындық көрмеуі тиіс. Бұл кездесуде «Астананың» сенімді жеңісін күтемін. Марин Томасов соңғы кездері ашық ойында гол соқпай жүр. «Тұранға» қарсы хорват шабуылшысы мергендік танытып, бірнеше матчқа созылған сәтсіз сериясын бұзуы керек.

«Елімай» – «Жеңіс»

Соңғы бес жеке кездесудің бәрінде «Елімай» жеңіске жеткен. Бұл жолы да тарих қайталануы мүмкін. Дегенмен «Жеңіс» соңғы турларда өте жақсы ойын көрсетіп жүр. Қонақтардың сапында жаңа ойыншылар – Оразов пен Кенжебекті алаңнан көргіміз келеді. Мүмкін, дәл осы футболшылар шабуылға тың серпін беріп, «Елімайдың» оң нәтижеге жетуіне көмектесер.

«Қайрат» – «Қайсар»

Алматылықтардың Еурокубоктардағы тығыз кестесін ескере отырып, Рафаэль Уразбахтин құрамға ротация жасауы мүмкін. Соған қарамастан, «Қайрат» – бұл кездесудің айқын фавориті. Қызылордалықтар биыл сырт алаңда өте әлсіз көрініп жүр. «Қайрат» бұл ойында үш ұпайды сенімді түрде алады деген ойдамын.

«Оқжетпес» – «Ұлытау»

Маусым барысында екі командада бапкерін ауыстырды. Бірінші айналымда бұл ұжымдарды басқа бапкерлер алып шыққан. Осы жолы Қайрат Нұрдәулет пен Нұркен Мәзбаевтың тартысына куә боламыз. Матч өте қызықты өтпек. Меніңше, осы кездесуде «Ұлытаудың» жеңіске жету мүмкіндігі жоғары. Тактикалық жағынан «Оқжетпес» – жезқазғандықтар үшін ыңғайлы қарсылас. Көп гол болмайды, мүмкіндіктерді кім жақсы пайдаланады – сол жеңіске жетеді. «Ұлытаудың» жеңісіне көбірек сенемін. 

«Қызылжар» – «Атырау»

Жуковскийдің «Атырауға» оралуын әзірге табысты деу қиын. ҚПЛ-дегі орнын сақтау үшін енді әрбір матчты финал ретінде өткізу керек. Мұндай қысым кезінде «Қызылжар» өз пайдасына тиімді нәтиже шығара алады. Екі команда да гол соғады деп болжаймын, бірақ жеңіс алаң иелеріне бұйырады.

«Ақтөбе» – «Тобыл»

«Ақтөбе» соңғы рет «Тобылды» қашан жеңгені есімде де жоқ. Бірақ турнир кестесіндегі жағдайға қарап, бұл ойында «қызыл-ақтарға» тек жеңіс керек. Ерлановтың жарақатынан кейін «Тобылдың» қорғанысы селдірей бастады. Олар қатарынан алты матчта гол жіберді. Әлсіз қарсыластарға қарсы ойында ұпай жоғалтпауы мүмкін, бірақ «Ақтөбе» ондай қателікті кешірмейді. Голға толы, қызықты кездесу күтемін. 

«Жетісу» – «Ордабасы»

Шымкенттіктер өткен турдағы ойынымен және жанкештілігімен тәнті етті. Андрей Мартин командасын Еурокубоктарға жақсы дайындап жатқандай. Бұл жағдай ҚПЛ нәтижелеріне де оң әсерін тигізіп отыр. Меніңше, «Ордабасы» осы ойында да қақпасына гол жібермей, жеңіске жетеді.