Әйелдер лигасының 15-туры: «Ақтөбе» Шымкент командасының гегомониясын бұзуға жақын

27 және 28 шілде күндері әйелдер арасындағы Қазақстан чемпионатының 15-тур ойындары өтті. Екінші айналымның басты кездесуі – «Ақтөбе» мен «БИІК-Шымкент» арасындағы шайқас болды. Бұл ойында «Ақтөбе» камбэк жасап, чемпионаттың потенциалды көшбасшысына айналды. Алайда турнирлік кестенің жоғарғы сатысында әлі де болса шымкенттік қыздар орналасқан.

Матч нәтижелері:

«Ақтөбе» – «БИІК-Шымкент» – 3:2

«Астана» – «Ұлытау» – 1:1

«Қызылжар» – «Елімай» – 1:0 

«Атырау» – «Жетісу» – 1:4

«Қайрат» – «Оқжетпес» – 6:0

«Жеңіс» – «Қайсар» – 2:1

«Томирис-Тұран» – «Тобыл» – 4:1

 

Турдың орталық ойыны

«Ақтөбе» (Актобе) – БИІК (Шымкент) – 3:2 (0:0)

Голдар: Серрант, 7 (0:1); Литвиненко, 73 (1:1); Морозова, 76-автогол (1:2); Жанатаева, 90 (2:2); Жанатаева, 90+6 (3:2).

«Ақтөбе»: Толибекова, Бабшук (Кисконен, 90+1), Морозова, Литвиненко, Гайстенова, Гаджиева, Боронбекова (Норбаева, 81), Жұмабайқызы (Жанатаева, 69), Дюльбер, Власова, Нұрмиева (Қаражанова, 90+1).

«БИІК-Шымкент»: Баву, Нұрышева, Габелия, Якубу (Құлмағамбетова, 81), Нанфак, Роджерс, Шие (Серрант, 68), Бурова, Крето, Чекупила (Оволаби, 46), Твенебоа

Бас төреші: Скропудова (Қарағанды)

Алаңнан қуылды: Нанфак, 79 (БИІК).

Ақтөбедегі Қобыланды батыр атындағы «Орталық» стадионда жергілікті «Ақтөбе» мен еліміздің бірнеше дүркін чемпионы «БИІК-Шымкент» кездесті. Соңғы жылдары шымкенттік футболшыларды елімізде жеңе алмай жүрген. Калоян Петков шәкірттері 2011 жылдан бері 13 рет чемпион атанған. Тек 2012 жылы ғана күміс жүлдені қанағат тұтқан. Бір сөзбен айтқанда – Қазақстан әйелдер футболының флагманы. Бірақ биыл оларға нағыз лайықты қарсылас табылды. 

Бірінші айналымда Шымкентте өткен ойын 2:2 есебімен тең аяқталған болатын. Ол матчтан кейін екі команда да ешбір ұпай жоғалтпаған, ал «Ақтөбе» тіпті гол да жібермеген. Сол себепті бұл кездесу чемпиондық үшін шешуші сәт болуы мүмкін еді.

Матч сақ басталды. Командалар бір-бірін зерттеп, шабуылға асықпады. Бірінші таймда есте қалған басты сәт – Марионна Нанфактың сары қағазы. Кейін бұл жағдай ойынның нәтижесіне әсер етті.

Есесіне, ойынның соңғы 20 минуты өте тартысты өтті. Алдымен «БИІК» қыздары алға шықты. Мартин Серрант гол соққан. Бірақ арада үш минут өткенде «Ақтөбенің» үздік сұрмергені Алина Литвиненко таразы басын теңестірді. Қырғызстандық шабуылшы айып соққысынан кейін баспен қақпаны дәл көздеді.

Айтпақшы, Алина бұған дейін Шымкенттегі матчта дубль жасаған. Дегенмен, қонақтар қарқынын үдетті. Мұндай қысымға шыдамаған алаң иелері автогол соғып алды. Осымен бәрі бітті ме дегенде, «БИІК» өз жағдайын өздері қиындатты. Джифо Нанфак тәртіп бұзып, төреші екінші сары қағазы көрсетті. Бұл мүмкіндікті «Ақтөбе» футболшылары тиімді пайдаланды. Мадина Жаңатаеваның дублінің арқасында алаң иелері жеңісті жұлып алды. Сөйтіп ұзақ жылға созылған «БИІК» қыздарының жеңілмеген сериясын бұзды.

Айтпақшы, Қобыланды батыр атындағы «Орталық» стадионға 8500 жанкүйер жиналды. Бұл да бұрын-сонды болмаған көрсеткіш. Әлеуметтік желіде де көрермен белсенділік танытты. Тікелей трансляцияны қарағандардың да саны көп болды.

Бұл – БИІК-Шымкенттің маусымдағы алғашқы жеңілісі. Турнир кестесінде олар әлі көш бастап тұр. Өйткен «Ақтөбе» олардан 2 ойын кем өткізген.

Енді «Ақтөбе» – чемпиондықтың басты үміткері. Ал әйелдер футболының деңгейі мен қызығушылығы – бұрын-соңды болмаған деңгейге көтерілді.

Сондай-ақ 15-турда тағы алты матч өтті. Елордада «Астана» мен «Ұлытау» тең түсті. Қонақтар екінші таймда бір ойыншыға аз ойнады. 

Турнир кестесінде бір-біріне жақын орналасқан «Қызылжар» мен «Елімай» арасындағы матчта ойын тағдырын жалғыз гол шешті. Алаң иелері соққан гол Семей клубын артқа қалдыруға мүмкіндік берді. 

«Атырау» өз алаңында Талдықорғанның «Жетісу» клубына есе жіберді. Негізі басында «мұнайшылар» лайықты қарсылық көрсетіп жатқан, бірақ бір ойыншысы алаңнан қуылған соң қонақтардың мықтылығын мойындады.

Алматыда «Қайрат» пен «Оқжетпес» қыздары кездесті. «Қайрат» бұл еш қиындықсыз ірі жеңіске жетті. Олар қарсыластың қақпасына алты жауапсыз гол соқты. Бұл нәтиже екінші тайм басында Томирис Рахатжан қызыл қағаз алып, командасы он ойыншымен қалғаннан кейін де сақталды.

«Жеңіс» Қызылорданың «Қайсар» қыздарынан басым түсті. Матч тартысты өтіп, интрига соңына дейін сақталды. Қорытынды есеп – 2:1.

Бұл турдың соңғы ойыны Түркістанда өтті. Жергілікті «Тұран-Томирис» Қостанайдан келген «Тобылды» қабылдады. Алаң иелері есепті жылдам ашып, 28-минутта 3:0-ке жеткізді. «Тобыл» осыдан кейін бір гол соққан. Бірақ одан әріге шамалары жетпеді. Түркістан клубы тағы бір гол кіргізіп, ойынды 4:1 есебімен аяқтады. 

Келесі, 16-тур матчтары 4 тамыз күні өтеді.