«Қайрат» биылғы маусымда «Тобылды» екі матчта да жеңді

25–27 шілде аралығында футболдан Қазақстан Премьер-лигасының 17-тур ойындары өтті. Турдың орталық матчында «Қайрат» сырт алаңда «Тобылды» жеңді. 

Еурокубокқа байланысты «Астана» бұл турдағы ойынын сәуірде «Атыраумен» өткізіп тастаған. Ал  «Ұлытау» мен «Ақтөбе» кездесуі кейінге шегерілді. Қалған 5 матчқа куә болдық.

Матч нәтижелері:

«Жеңіс» – «Оқжетпес» – 0:0

«Тобыл» – «Қайрат» – 1:3

«Елімай» – «Жетісу» – 3:0

«Қайсар» – «Қызылжар» – 1:0

«Тұран» – «Ордабасы» – 0:4

30 сәуір: «Атырау» – «Астана» – 0:2 (кейінге шегерілген кездесу)

25 шілде 

«Жеңіс» (Астана) – «Оқжетпес» (Көкшетау) – 0:0

Бас төреші: Затула (Өскемен)

Тур «Жеңіс» пен «Оқжетпес» арасындағы кездесумен басталды. Көпшілік бұл матчта көп гол ма деп еді. Бірақ командалар 21 соққы жасағанымен, бірде-біреуі қақпадан табылмады. Сөйтіп, екі ұжым бұл матчта да тең нәтижеге қанағат білдірді. Бірінші айналымда Көкшетаудағы ойында итжығыс түскен.

«Тобыл» (Қостанай) – «Қайрат» (Алматы) – 1:3 (0:1)

Голдар: Жоржиньо, 45+1 (0:1). Громыко, 68 (0:2). Эль Мессауди, 76-пенальтиден (1:2). Рикардиньо, 89 (1:3).Бас төреші: Сахи (Қызылорда)
Алаңнан қуылды: Эссьен, 78 («Тобыл»).

Бұл турдың орталық ойыны жанкүйерлердің үмітін ақтады: екі команда да жігер мен жоғары деңгейдегі ойын көрсетті.

Қостанайдағы бірінші тайм өте тартысты өтті. Әлбетте, матчта ешкім жеңілгісі келмеді. Бірақ қауіпті сәттер аз болды. Соған қарамастан, негізгі уақыт аяқталғаннан кейін «Қайрат» әдемі комбинация жасап, есеп ашты. Қонақтар үзіліске бір доп айырмашылығымен шықты.

Екінші кезеңде алаң иелері есепті теңестіруге ұмтылды, ал қонақтар қарымта шабуылға сенді. Нәтижесінде Дастан Сатпаев пен Валерий Громыко бүкіл қорғанысты қапы қалдырып, есепті 0:2-ге жеткізді.

Көп ұзамай «Тобыл» пенальти арқылы бір гол соғып, есеп айырмасын қысқартты. Бірақ арада көп өтпей-ақ Эссьен алаңнан қуылып, қостанайлықтар он ойыншымен қалды.

«Қайрат» өз жоспарын өзгертпей, матч соңында тағы бір жылдам шабуыл ұйымдастырып, үшінші голын соқты. Қорытынды есеп – 1:3.

Бұл жеңіс арқылы «Қайрат» «Астанамен» ұпай санын теңестіріп, ал «Тобылды» ойналмаған матчтары бойынша көш бастау мүмкіндігінен айырды.

«Елімай» (Семей) – «Жетісу» (Талдықорған) – 3:0 (2:0)

Голдар: Плакка, 14 (1:0); Кенжебек, 37-пенальтиден (2:0); Муртазаев, 90+1 (3:0)
Бас төреші: Ысқақов (Қостанай)
Алаңнан қуылды: Саксесс, 84 («Жетісу»)

«Елімай» осыған дейін өз алаңында қатарынан екі ойында жеңіліп қалған. Сондықтан бұл жолы жергілікті жанкүйерлердің алдында реабилитация жасауға ниетті болды. Бұл жолы олар Талдықорғаннан келген «Жетісу» командасын қабылдады. Самат Смақов шәкірттерімен ойын «Елімай» үшін сәтті өрбіді.

Матчтың 14-минутында-ақ алаң иелері есеп ашты. Үзіліске дейін Андрей Карповичтің шәкірттері есеп айырмасын екі допқа жеткізді. Бұл жолы Абай облысының атынан ойнайтын клуб сапындағы жартылай қорғаушы Ғалымжан Кенжебек өз дебюттік голын пенальтиден соқты.

Екінші таймда да «Елімай» кездесу тізгінін уысында ұстады, бірақ асығыстық танытпай, сабырмен ойнады. Ал «Жетісу» шабуылда мүлде ештеңе көрсете алмады. Матч соңына таман Рафаэль Саксесс екі сары қағаз алып, алаңнан қуылды.

Сан жағынан басымдық алған семейлік команда соңғы сәтте Роман Муртазаевтың голымен есепті 3:0-ге жеткізді.

«Қайсар» (Қызылорда) – «Қызылжар» (Петропавл) – 1:0 (1:0)

Гол: Губарев, 3 (1:0)
Төреші: Суликанов (Ақтөбе)

Алаңнан қуылды: Төлегенов, 87 («Қайсар»).

Қызылордадағы матч ұзақ дайындықсыз-ақ бірден басталды: үшінші минутта «дала қасқырларының» жартылай қорғаушысы Никита Губарев есеп ашты.

Алайда осындай сәтті бастамаға қарамастан, ойынның қалған бөлігі нақты футболдан гөрі күреске толы болды.

Бас төреші Саят Суликанов қос команда ойыншыларына тоғыз сары қағаз көрсетті. Ал «Қайсар» ойыншысы Абылайхан Төлегеновке екі ескерту беріп, алаңнан қуды.

Дегенмен «Қызылжар» сан басымдығын пайдалана алмады. Қорытынды есеп – 1:0 «Қайсар» пайдасына». Петропавл командасы екінші матч қатарынан гол соға алмай жеңіліп отыр.

27 шілде

«Тұран» (Түркістан) – «Ордабасы» (Шымкент) – 0:4 (0:0)

Голдар: Наумец, 65 (0:1); Чанаджа, 75 (0:2); Имнадзе, 77 (0:3); Малый, 90+6 (0:4)
Төреші: Кучма (Көкшетау)
Ескертулер: Солодовников, Асан – Эвертон

Бұл кездесудің фавориті алдын ала белгілі еді. Ол үшін турнир кестесіне және екі команданың соңғы нәтижелеріне көз жүгірту жеткілікті.

Алайда «Тұран» оңтүстік дербиіне жақсы дайындықпен шықты. Бірінші таймдағы ойынға қарап, түркістандықтардың мұндай ауыр жеңіліске ұшырайтынын болжау қиын болатын.

Алаң иелері бір сағаттан астам уақыт бойы шымкенттіктермен тең дәрежеде ойнады. Дегенмен бірінші гол жіберіп алған соң, шашырап кетті. Андрей Мартин баптайтын «Ордабасы» жарты таймның ішінде есепті ірі жеңіске жеткізді. Қорытынды есеп – 0:4.

«Тұранның» жағдайы күн өткен сайын қиындап барады:

бұл команда чемпионаттағы қатарынан оныншы жеңілісін алды,

ал соңғы екі матчтың жиынтық есебі – 0:11.

18-турдың кейінге қалдырылған матчы:

«Ұлытау» – «Ақтөбе» кездесуі «Ақтөбенің» еурокубок іріктеу кезеңіне қатысуына байланысты 19 қыркүйекке шегерілді.

19-турда кездесетіндер: 

2 тамыз:

«Оқжетпес» – «Елімай»

«Қайрат» – «Ұлытау»

«Қызылжар» – «Тобыл»

3 тамыз:

«Астана» – «Қайсар»

«Ордабасы» – «Атырау»

«Ақтөбе» – «Жеңіс»

«Жетісу» – «Тұран».