Мадияр Кембілов: Біз он адаммен жақсы ойнадық, әйелдер футболындағы ерекшелік те осында

Әйелдер арасындағы Қазақстан чемпионатының 15-тур аясында елордада «Астана» пен «Ұлытау» арасындағы матч 1:1 есебімен тең аяқталған болатын. Жезқазғандық команданың бас бапкері Мадияр Кембіров KFF League порталына берген сұхбатында ойын нәтижесіне пікір білдіріп, алдағы фаворитпен өтетін кездесуге сенімді екенін жеткізді.

– Алдымен ойын жайында. Нәтижені қалай бағалайсыз?

– Біздің жағдайды ескерсек, нәтиже қанағаттанарлық. Қызыл қағаз алып, он ойыншымен қалдық, соған қарамастан есепті теңестіріп, тіпті жеңіске жетуге жақын болған едік. Екінші таймда команда мінез көрсетіп, бірінші кезеңге қарағанда әлдеқайда жақсы ойнадық.

– Қызыл қағаз әділ болды ма?

– Иә, орынды шешім. Екі сары қағаз берілді. Екінші ескерту орталық алаңдағы орынсыз фол үшін көрсетілді. Ескертуі бар ойыншыға ондай фол жасаудың қажеті не?

– Стандарттан соғылған гол туралы айтып өтсеңіз.

– Бұл гол жаттығуда пысықталған комбинацияның нәтижесі. Бізде стандарттарға Әсел Жолболат жауапты. Ол бүгін тағы да шебер орындады. Айта кетейін, бірінші айналымда ол «Астананың» қақпасына тікелей бұрыштамадан гол соққан болатын. Қыздарымыз жарады. Он адаммен де лайықты ойнады.

– Демек, бұндай сәттер жаттығуда арнайы пысықталады?

– Әрине. Әсел стандарттармен көп жұмыс істейді. Бұл кездейсоқтық емес.

– Келесі қарсылас – «БИІК-Шымкент». Бұл ойында не күтесіз?

– Қазір бізге қарсы еш командаға оңай болмайды. «БИІК» болсын, «Томирис» не басқа ұжым – біз қарсылас бола аламыз. Ал ары қарай көре жатармыз.

– Сіз сонымен қатар Қазақстан әйелдер құрамасының бапкерісіз. «БИІК» – «Ақтөбе» кездесуін көрдіңіз бе?

– Әрине. Атмосфера керемет болды.  Стадион толы жанкүйер, шоу бағдарламалар. Осындай ойындар өтуі керек. Өте тартысты матч болды Қорытынды есеп – 3:2. Соңғы минуттарға дейін интрига сақталды. Ұйымдастырушыларға рахмет – кәсіби командалар арасындағы чемпионатты ұйымдастыру департаменті, оның басшысы Бақытжан Пазылхайыр, орынбасары – Павел Демьян және әйелдер футболы бойынша менеджер Айжан Кенжинаға алғысымды білдіремін. Амбассадорлар, өнерпаздар – бәрі жоғары деңгейде өтті. Мұндай қолдау Қазақстанда әйелдер футболына жаңа серпін береді.

– Дегенмен кемшін тұсын да байқаған шығарсыз?

– Иә. «БИІК-Шымкент» пен «Ақтөбе» құрамында қазақстандық футболшылар аз ойнайды. Ұлттық құраманың бапкері ретінде айтсам, мұндай маңызды матчтарда өз қыздарымыздың тәжірибе жинақтағаны өте маңызды. Бұл – халықаралық деңгейде бәсекеге қабілетті болу үшін қажет.

– Көпшілік Ақтөбедегі матч чемпиондық тағдырын шешті деп санайды. Бұған келісесіз бе?

– Басты қарсыласымен екі матчты да ойнап тастады. Бірақ алдыда екінші айналым бар, «Ақтөбе» әлі «Томирис» және «Қызылжармен» ойнайды. Бұл матч оңай болмасы анық. Әйелдер чемпионаты – тосынсыйға толы. Бәрі де болуы мүмкін. Қыздардың психологиясы бөлек: кейде толық құрамда нашар ойнап, он адаммен керемет өнер көрсетеді. Әйелдер футболының әдемілігі де осында.