Батыхан Камарадинов: Алға қойған мақсатым біртіндеп орындалып келе жатыр

Екінші лигада ойнайтын «Жеңіс-Ж» командасының шабуылшысы Батыхан Камарадинов KFF-League сайтына сұхбат берді. Ол әңгіме барысыннда Екінші лиганың ерекшілігі және жақында өткен астаналық дерби туралы пікір білдірді.

– Батыхан, сізді «Жеңістің» негізгі құрамына жиі шақырып жүр. Биыл ҚПЛ аясында екі рет алаңға шықтыңыз. Эмоция тұрғысынан Екінші лига матчтарынан айырмашылық бар ма?

– Әрине, эмоция жағынан айырмашылық бар. ҚПЛ матчына шыққанда, жауапкершілік мүлдем бөлек: бұл – еліміздегі ең жоғарғы деңгейдегі бәсеке. Мұнда ойын қарқыны да, талаптар да өзгеше. Бірақ мен барлық ойынға – ҚПЛ болсын, Кубок немесе Екінші лига болсын – барынша концентрация ұстап шығуға тырысамын.

Екінші лигада да жақсы ойын көрсету маңызды. Жас футболшылардың әріқарай дамып, дегейін көтеруіне ықпал етеді. Ал «Жеңістің» негізгі құрамында ойнау – мен үшін үлкен мәртебе әрі алға ұмтылуға мотивация.

– Дегенмен,  көбінесе «Жеңіс-Ж» командасында жүрсіз. Жастар құрамасы мен негізгі команда арасында айырмашылық қаншалықты үлкен?

– Айырмашылық бар. Негізгі командада ойын қарқыны жоғары, қарсыластар мықты, жауапкершілік те мол. Онда ойынды тез ойлап, жылдам шешім қабылдау қажет. Премьер-лигада ойлануға уақыт берілмейді.

Ал жастар командасында маған көбірек ойын тәжірибесі беріледі, бұл өз қателіктерімнен қорытынды шығаруға мүмкіндік. Екі деңгей де менің дамуым үшін маңызды: жастар құрамасында тәжірибе жинасам, негізгі құрамда үлкен футболға бейімделіп келемін.

– ҚПЛ-да ойнағаннан кейін «Жеңіс-Ж» сапындағы әріптестеріңіз қызығушылық білдіре ме?

 – Иә, әрине. Жігіттер: «ҚПЛ-де ойнау қалай? Қандай әсер алдың? Айырмашылығы неде?» – деген сияқты сұрақтар қойды. Біз бұл жайында әңгімелесеміз, мен өз тәжірибеммен бөлісемін. Айтамын: «Жоғары деңгейде бәрі тез, жауапкершілік үлкен», – деп. Бірақ жалпы, «Жеңіс-Ж» командасында жақсы ұжым жиналған. Барлығы жақсы түсінеді. Басты мақсатымыз дамып, негізгі құрамда өзімізді көрсету.

– Жуырда командаңыз «Астана» жастарымен тең ойнап, қарсыластың маусымдағы алғашқы ұпай жоғалтуына себеп болды. Сіздің соққан гол матчтағы 3:3 есебін тіркеді. Жастар арасында да елордалық дербиге принципті түрде қарайсыздар ма?

– Иә, біз үшін бұл да өте маңызды ойын. Қалай дегенмен де, бұл – дерби. Қай деңгейде өтсе де, мінез көрсетіп, жеңіске жеткіміз келеді. Біз «Астана-Ж»-ның мықты қарсылас екенін білдік. Бірақ алаңға тең дәрежеде ойнай алатынымызды дәлелдеу ниетімен шықтық. Гол соққаныма және командамның маңызды ұпай алуына көмектескеніме қуаныштымын. Мұндай ойындар – әрқашан ерекше.

– Маусым басында өзіңізге қандай мақсат қойдыңыз? Қалай орындалып жатыр?

– Маусым алдында басты мақсатым – ойыншы ретінде даму, тәжірибе жинау және мүмкіндігінше негізгі құрамның хаттамасына жиі ілігу болды. Жаңа деңгейге бейімделіп, ол жерде пайдалы бола алатынымды дәлелдегім келді. Қазірге дейін бәрі біртіндеп жүзеге асып жатыр: ҚПЛ-де алғашқы минуттарымды алып үлгердім, «Жеңіс-Ж»-де тұрақты түрде ойынға шығып жүрмін. Ең бастысы – тоқтамай, әрі қарай да еңбектену.