Бірінші лиганың 14-туры: көшбасындағы клубтар мен аутсайдерлер өзара кездеседі

17–18 шілдеде Бірінші лига командалары арасындағы Қазақстан чемпионатының 14-тур ойындары өтеді.

Бұл турдың орталық кездесуі Алматыда болмақ. «Оңтүстік астананың» дербиінде «Қайрат-Жастар» мен «Хан Тәңірі» жолығады.

17 шілде

«Екібастұз» (Екібастұз) – «Алтай» (Өскемен)

Ойынның басталуы: 17:00

Өтетін орны: «Шахтер» стадионы (Екібастұз қ.)

Жеке кездесулер тарихы:

Ойындар саны – 13

«Екібастұздың» жеңісі – 3

 «Алтайдың» жеңісі – 5

Тең ойындар – 5

  Шығыс Қазақстан облысының клубы өткен турдың басты сенсациясын жасаған болатын. Олар Павлодарда жергілікті «Ertis» клубымен 2:1 есебімен жеңіп, көпшілікті таңғалдырды. Енді «Алтай» көршілес Екібастұзға сапар шегіп, осы қаламен аттас командамен кездеседі.

Айта кетсек, «кеншілер» де өткен матчтың нәтижесін өз активіне жазуға әбден лайық. «Екібастұз» кез келген қарсыласқа төтеп бере алатын «Хан-Тәңірі» жігіттерін 2:0 есебімен ұтты. Жалпы алғанда, «Екібастұздың» чемпионаттағы жеңіліссіз сериясы қазірдің өзінде үш матчқа созылып отыр.

Сонымен қатар, екібастұздықтар соңғы уақытта Вахид Масудовтың командасына қарсы сәтті ойын көрсетіп жүр. 2025 жылдың өзінде бұл командалар екі рет кездескен:

Қазақстан кубогының іріктеу кезеңінде «Екібастұз» жеңіске жетті;

Чемпионаттың бірінші айналымындағы сырт алаңдағы ойында 0:0 есебімен тең түсті.

Енді өскемендіктер қандай жауап қайтарады?

«Түркістан» (Түркістан) – AKAS (Алматы)

Ойынның басталуы: 17:00

Өтетін орны: Октябрь Жарылқапов атындағы стадион (Түркістан қ.)

Жеке кездесулер тарихы:

Ойындар саны – 1

«Түркістанның» жеңісі – 0

AKAS жеңісі – 1

Тең ойындар – 0

Бұл командалар арасындағы жалғыз кездесу биылғы маусымның бірінші айналымында өткен. AKAS өз алаңында 3:1 есебімен сенімді жеңіске жеткен болатын.

Алматылық клуб алдағы сырт алаңдағы ойында да айқын фаворит саналады. Бірінші лига дебютанты өткен турда «Таразды» 3:1 есебімен жеңіп, жақсы ойын өрнегін көрсетті. Ал түркістандықтар сол турда «Қайрат-Жастардан» 1:6 есебімен жеңіліп, жанкүйерлерінің алдында ыңғайсыз жағдайға қалды.

«Түркістанның» жағдайы ауыр. Команда бар болғаны 5 ұпай жинап, турнир кестесінде соңғы орында тұр. Алда өтетін матчта жағдайды жақсарту Ғалымжан Төлегеновтің шәкірттері үшін оңайға соқпайтыны анық.

SD Family (Астана) – «Шахтер» (Қарағанды)

Ойынның басталуы: 19:00

Өтетін орны: «Жас Қыран» стадионы (Алматы қ.)

Жеке кездесулер тарихы:

Ойындар саны – 1

SD Family-дің жеңісі – 0

«Шахтердің» жеңісі – 1

Тең ойындар – 0

Чемпионаттың бірінші айналымында «кеншілер» елордалық команданы 4:1 есебімен ойсырата жеңген болатын. Сол себепті бұл жолғы кездесуде де «Шахтер» айқын фаворит саналуы тиіс еді. Оның үстіне матч Астанада емес, Алматыда өтеді. Яғни екі ұжым бейтарап алаңда жолығады.

Алайда соңғы кездері қарағандылықтардың нәтижелері де көңіл көншітпейді. Қатарынан екі ойында жеңіліп қалды. Алдымен сырт алаңда «Тараздан» ойсырай ұтылса, сосын Қарағандыда «Каспийге» есе жіберді.

Ал SD Family болса, бірқатар сәтсіз ойындардан кейін өткен турда «Ақтөбе» жастарын сырт алаңда жеңіп, қайта серпіліс алды. Енді бұл команда ҚПЛ-ға жолдамаға үміткер, бірақ қиын жағдайға тап болған қарсыласына лайықты қарсылық көрсетуге тырысатыны анық.

«Тараз» (Тараз) – «Оңтүстік» (Шымкент)

Ойынның басталуы: 19:00

Өтетін орны: «Орталық» стадион (Тараз қ.)

Жеке кездесулер тарихы:

Ойындар саны – 3

«Тараздың» жеңісі – 1

«Оңтүстіктің» жеңісі – 1

Тең ойын – 1

«Тараз» биылғы маусымдағы үш жеңісінің бірін дәл осы «Оңтүстікке» қарсы тіркеген. Ол кездесу сырт алаңда, әрі «Оңтүстік» қақпасына гол жібермей 2:0 есебімен ұтқаны бар.

Алайда чемпионаттағы екінші кездесу алдында, шымкенттік команда турнир кестесінде «Тараздан» айтарлықтай жоғары тұр. Олардың ұпайы қарсыласынан жетеуге артық. 

Сонымен қатар, «Оңтүстік» соңғы уақытта бабында жүр. Алдыңғы екі турда AKAS пен «Жетісайдан» басым түсіп, қарқын алды. Енді бұл серияны Таразда жалғастыруға тырыспақ.

 Айта кетейік, шымкенттіктер бұған дейін Таразда жеңіске жетіп көрмеген.

«Каспий» (Ақтау) – «Жетісай» (Жетісай)

Ойынның басталуы: 19:00

Өтетін орны: BS Arena стадионы (Ақтау қ.)

Жеке кездесулер тарихы:

Ойындар саны – 3

«Каспийдің» жеңісі – 2

«Жетісайдың» жеңісі – 0

Тең ойын – 1

 
Турнирдің жеке дара көшбасшысы бұл жолы айтарлықтай қауқарлы ұжыммен кездеседі. «Жетісай» кез келген қарсыласқа тосынсый жасай алатынын осы маусымда-ақ дәлелдеп үлгерді. Түркістан облысының клубы үшін қарсыластың атақ-даңқы аса маңызды емес.

Мысалы, олар осы маусымда «Алтайды» жеңіп, «Ertis» клубынан ұпай тартып алған болатын. Ал «Каспий» бірінші айналымдағы кездесуде «Жетісайды» тек 1:0 есебімен ғана жеңе алған, бұл да оңай матч болмағанын көрсетеді.

Дегенмен, турнир кестесінің орта тұсында тұрған командаға қарсы ойында ақтаулықтар айқын фаворит саналады.

Ertis (Павлодар) – «Ақтөбе-Ж» (Ақтөбе)

Ойынның басталуы: 19:00

Өтетін орны: «Орталық» стадион (Павлодар қ.)

Жеке кездесулер тарихы:

Ойындар саны – 1

Ertis-тің жеңісі – 1

«Ақтөбе-Ж»-нің жеңісі – 0

Тең ойын – 0

Бұл ойында турнир кестесінде екінші орында тұрған екі команда кездеседі. Бірақ бір айырмашылығы бар: Ertis – жоғарыдан санағанда, ал «Ақтөбе-Ж» – төменгі қатарда.

Қағаз жүзінде бұл кездесудің фавориті айқын. Алайда павлодарлықтар жеңіске жететініне алдын ала сеніп, босаңсуына болмайды. Өткен турда олар өз алаңында «Алтайға» есе жіберіп алды.

Соған қарамастан, маусым басталғалы жеңіске жетпеген командамен ойнау – жанкүйерлер алдында сенімді қайта қалпына келтіруге таптырмас мүмкіндік.

«Хан-Тәңірі» (Алматы) – «Қайрат-Жастар» (Алматы)

Ойынның басталуы: 19:00

Өтетін орны: «Хан-Тәңірі» стадионы (Алматы қ.)

Жеке кездесулер тарихы:

Ойындар саны – 5

«Хан-Тәңірінің» жеңісі – 0

«Қайрат-Жастардың» жеңісі – 4

Тең ойын – 1

 

Бұл ойын күнін Алматы дербиі аяқтайды. Аталған матч 14-турдың орталық кездесуі деп айтуға болады.

Дегенмен, статистикаға қарасақ, бұл екі команданың текетіресі нағыз дерби сипатына сай келе бермейді.

«Қайраттың» жастар құрамы бұған дейінгі бес кездесудің төртеуінде жеңіске жетіп, тек бір рет тең түскен.

Осы маусымның бірінші айналымында да жеңіс «сары-қаралар» пайдасына аяқталған еді. Бұл жолы Алмас Құлшынбаевтың шәкірттері сәтсіз серияны тоқтата ала ма – бұл үлкен сұрақ.