Әйелдер лигасының 13-туры: Қос көшбасшы ірі есеппен жеңіп, Түркістанда сенсация тіркелді

14 шілдеде әйелдер арасындағы Қазақстан чемпионатының 13-туры өтті. Бұл турдың қорытындысы бойынша көшбасшылар дуэті өзге қарсыластарынан ұпай саны бойынша ұзай түсті.

Матч нәтижелері:

«Жеңіс» – «Оқжетпес» – 6:0

«Қызылжар» – «Астана» – 1:0

«Қайрат» – «БИІК-Шымкент» – 0:11

 «Жетісу» – «Ақтөбе» – 0:9

«Атырау» – «Елімай» – 1:5

 «Томирис-Тұран» – «Ұлытау» – 0:1

«Қайсар» – «Тобыл» – 1:2.
       

Турдың алғашқы матчында «Жеңіс» командасы Көкшетаудың «Оқжетпес» клубының қыздарын ірі есеппен жеңді. Дегенмен, алғашқы тайм мұндай нәтиже болады деп айту қиын еді. Астаналықтар үзіліске дейін тек бір гол соғып, 62-минутқа дейін аз ғана басымдықпен алда келе жатты. Алайда содан кейін «Жеңіс» қарқынын үдетіп, қатарынан бес доп кіргізді.

Петропавлдағы «Қызылжар» мен «Астана» арасындағы кездесу аса тартысты болмады. Матчтағы жалғыз голды Вероника Абдуллаева соқты, осы гол Солтүстік Қазақстан облысының ұжымына жеңіс әкелді. 

Ал «Қайрат» пен «БИІК-Шымкент» арасындағы ойын керісінше, голдарға өте бай болды. Бұл матч алматылықтар үшін маусымдағы ең ауыр жеңіліске ұласты. «Қайрат» қыздары  өз алаңында 11 жауапсыз гол жіберді. Оның біреуін тіпті өздері өз қақпасына соқты.

Айта кетерлігі, сұрмергендер тізімінде көш бастап тұрған Гүлнара Габелия бұл ойында тек екі голмен шектелді.

Бас жүлдеден тағы бір үміткер «Ақтөбе» Шымкент командасынан қалыспай, 13-турда ірі есеппен жеңіске жетті. Олар Талдықорғанда «Жетісуды» 9:0 есебімен ойсырата жеңді. Бұл матчта бірден екі ойыншы – Наталья Нурмиева мен Қазына Нұрбаева хет-трик жасады.

Семейлік қыздар мұнайлы астанаға сапарын сәтті аяқтады. Матч басталғанына небәрі 10 минут өткенде-ақ «Елімай» «Атыраудан» екі гол айырмашылығымен алға шықты. Одан кейін алаң иелері бір голмен жауап бергенімен, қонақтар тағы үш рет көзге түсіп, 5:1 есебімен айқын жеңіске жетті.

Кестеде үшінші орында тұрған «Томирис-Тұран» командасы күтпеген жерден ұпай жоғалтты. Түркістанда «Ұлытаумен» кездескен алаң иелері қарсыласқа 0:1 есебімен жол берді. Бұл осы турдың басты сенсациясы болды. 

«Қайсар» мен «Тобыл» арасындағы ойын өте шиеленісті әрі тартысты өтті.  Бұл кестеде көршілес орналасқан командалардың өзара кездесуі екенін ескерсек, түсінікті жайт. Қостанайлықтар есепті жылдам ашып, бірінші таймда жеңіске жетті. Алайда екінші кезең басталғаннан кейін алаң иелері таразы басын теңестіріп үлгерді. Соған қарамастан, матчты «Тобыл» өз пайдасына шешті. Тіпті олар ойын соңын бір ойыншы кем аяқтағанымен (Полина Осипова екінші сары қағаз алған соң алаңнан қуылды), 2:1 есебімен жеңісті жұлып алды.

Әйелдер лигасының 14-тур ойындары 21 шілде күні өтеді. Ал 17 шілдеде 19-турдың кейінге шегерілген «БИІК-Шымкент» пен «Тобыл» арасындағы матч ойналады.