Әділет Садыбеков: Жастарға көбірек тәжірибе қажет, «Қайраттта» дарынды ойыншылар көптеп өсіп келеді

Премьер-лиганың 15-туры аясында ел чемпионы «Қайрат» Алматыда «Тұранды» 4:0 есебімен сенімді түрде жеңді. Матчтан кейін алматылықтардың капитаны Әділет Садыбеков KFF League сайтына берген сұхбатында ойыннан алған әсерімен бөлісіп, жастардың ойынына баға берді. Сондай-ақ жарақатынан қалай айыққанын және клубтың еурокубоктардағы мақсатын атап өтті.

– Әділет, алдымен жеңіспен құттықтаймыз. Бүгінгі ойыннан алған әсеріңмен бөліссең...

– Көп рахмет. Бұл біз үшін өте маңызды жеңіс, өйткені біз чемпиондық атақ үшін таласып жатырмыз. Әр ойында қарсыластан бір басқа жоғары ойнауға тырысамыз. Бүгінгі матч біз үшін сәтті болды. Өз кезегінде «Тұран» лайықты қарсылас болды. Түркістан клубына жақсы ойын үшін алғыс айтамын.

– Бүгін жас футболшылар алаңда сенімді көрінді. Олар туралы не айта аласың?

– Меніңше, жастарға мүмкіндігінше көп ойын тәжірибесі керек. Тек ойындар арқылы ғана олар өздеріне деген сенімділікті арттыра алады. Біздің академияда шын мәнінде дарынды жігіттер өсіп келеді. Мен олардың қазірдің өзінде өз деңгейлерін көрсетіп жүргеніне қуаныштымын.

– Былтыр өте ауыр жарақат алдың. Қайта қалпына келу қалай болды?

– Егер алаңға шығып жатсам, демек толық дайынмын деген сөз. Бәрі артта қалды. Енді менің басты міндетім – «Қайратқа» ғана емес, Қазақстан құрамасына да көмектесу. Жақын арада ұлттық құрамаға шақырту аламын деген үміттемін.

– Алда Чемпиондар лигасының алғашқы іріктеу кезеңі аясында «Олимпиямен»  матч бар. Қандай үміт күтесіздер?

– Басты мақсат – келесі кезеңге өту. Бүгін құрамда ротация жасадық, негізгі ойыншылар сәл демалып, маңызды матчқа тың әрі дайын болсын деп жоспарладық. Біз «Олимпиямен» кездесуге шындап дайындалып жатырмыз.

– Биылғы маусымда «Қайрат» үшін еурокубоктарда қандай мақсаттар қойылған?

– Еуропалық турнирлердің бірінің топтық кезеңіне шығу. Бұл – біз үшін үлкен мәртебе және алға жасалған маңызды қадам. Бұған шамамыз жетеді деп сенеміз және бар күшімізді саламыз.