ҚПЛ: 15-турда көшбасшылар сенімді жеңіске жетіп, Семейдегі ойын триллерге ұласты

4-6 шiлде аралығында футболдан Қазақстан Премьер-лигасының 15-тур ойындары өтті. Турнир кестесінің алғашқы төрттігінде тұрған командалардың барлығы жеңіске жетті.

4 шiлде

«Қайрат» (Алматы) – «Тұран» (Түркiстан) –  4:0 (2:0)
Голдар: Рикардиньо, 30 (1:0); Станоев, 38 (2:0); Бағдат, 75 (3:0); Бағдат, 83 (4:0).

Ойын «Қайраттың» толықтай басымдығымен өтті. Легионерлерден бас тартып, тек қазақстандық ойыншылармен ойнауға шешім қабылдаған «Тұран» футболшылары әзірге бір-бірін түсінісіп үлгерген жоқ.

Алаң иелері сапында жаңадан келген футболшы Рикардиньо алғашқы матчында-ақ нәтижелі ойын көрсетті: гол соғып, жеңісті бастап берді. Үзіліске дейін Станоев есепті еселесе, екінші таймда 18 жастағы шабуылшы Рамазан Бағдат қос голдың авторы атанып, дубль жасады.

5 шілде

«Қызылжар» (Петропавл) – «Ордабасы» (Шымкент) – 0:0

Алаңнан қуылғандар: Жимох, 19; Чанаджа, 42 (екеуі де – «Ордабасы»).

«Ордабасы» бірінші таймда екі ойыншысынан айырылса да, қақпасына гол жібермей, тең нәтижеге қол жеткізді. «Қызылжар» қарсыласынан екі ойыншы артық ойнағанымен, 16 соққы жасап, нәтиже көрсете алмады. Бұл екі команданың қатарынан 0:0 есебімен үшінші   рет аяқталған ойыны болды.

 «Жеңiс» (Астана) – «Ұлытау» (Жезқазған) – 2:0 
Голдар: Сламбеков, 77 (автогол); Баталья, 90+4 (2:0).
Алаңнан қуылды: Кейлер, 45+2 («Ұлытау»).

Міне, бұл матч та қызыл қағазсыз аяқталмады. Бірінші таймға қосылған қосымша уақытта кездесудің бас төрешісі Данияр Сахи «Ұлытаудың» ең тәжірибелі қорғаушысы Сергей Кейлерге қызыл қағаз көрсетті. «Ұлытау» командасы үшін футболшысы алаңнан қуылу биыл жиілеп кетті.

Алайда жезқазғандықтар он ойыншымен ұзақ уақыт бойы беріспей, қақпаларын аман сақтап тұрды. Тіпті кейінірек олар гол соқтын. Өкініштісі, өз қақпаларына кіргізіп алды. Қонақтардың капитаны Демият Сламбеков автогол авторы атанды.

Ал «Ұлытаудың» бас бапкері Нұркен Мәзбаевтың дебюттік матчының сәтсіз аяқталуының нүктесін қойған Руй Баталья болды. Екінші таймның ортасында алаңға шыққан португалиялық футболшы қарымта шабуылда қақпашы Дмитрий Непогодовтың жоқтығын пайдаланып, бос қалған қақпаны дәл көздеді.

 «Ақтөбе» (Ақтөбе) – «Атырау» (Атырау) – 2:0 (1:0)
Голдар: Жайро Жан, 35 (1:0); Жайро Жан, 80 (пенальти)

Қобыланды батыр атындағы стадионға жиналған жанкүйерлер алдында қос команда да бірінші айналымға қарағанда біршама өзгерген құраммен шықты. Жаңадан қосылған футболшылардың ойыны «Ақтөбе» мен «Атырау» командаларының деңгейін айтарлықтай көтергені байқалды.

Әсіресе, алаң иелері сапынан негізгі құрамда алаңға шыққан Артур Шушеначев пен Вячеслав Швырев ерекше белсенділік танытты. Кейінірек қосалқы құрамнан қосылған Георгий Жуков та ойынға серпін берді.

Алайда матч тағдырын шешкен – «Ақтөбенің" құрамында көптен бері өнер көрсетіп жүрген шабуылшы Жайро Жан болды. Гаиталық форвард есепті Шушеначевтің пасынан кейін ашса, ойын соңында пенальтиден тағы бір гол соғып, дубль авторы атанды.

«Елiмай» (Семей) – «Тобыл» (Қостанай) – 2:3 (0:2)

Голдар: Вукчевич, 13 (0:1); Эль-Мессауди, 45 (0:2); Мұртазаев, 59 (1:2); Свиридов, 63 (2:2); Чесноков, 70 (2:3).

Осы 15-турдың орталық кездесуі бұл атаққа толықтай сай болды! Семейдегі «Спартак» стадионының трибуналары лық толып, жанкүйерлер бес бірдей керемет гол мен соңғы секундтарға дейін сақталған шиеленісті тамашалады. Шыны керек, бұл матч жоғары деңгейдегі футболдың үлгісі болды.

«Тобыл» есепті тез ашып, тайм соңында екінші голына да көрімдік сұраған. Оң қапталдағы Ислам Чесноковтың Ламин Ямальдың стилінде аяқтың сыртымен берген пасын Эль-Мессауди сәтті жүзеге асырды. Алайда «Елімай» оңайшылықпен берілмеді. Тіпті, «ремонтада» жасауға шақ қалған. 

Семейліктер тек ойынға оралып қана қоймай, есепті теңестіре алды. Сол сәтте стадиондағы жанкүйерлер тіпті жеңісті де армандай бастады. Алайда бұл үмітті Ислам Чесноковтың 70-минуттағы голы күл-талқан етті. Қостанайлық шабуылшының дәл соққысына «Елімай» тарапынан жауап табылмады. Қорытынды есеп – 2:3.

6 шiлде

«Жетісу» (Талдықорған) – «Астана» (Астана) – 0:2 (0:1)
Голдар: Грипши, 45+1 (0:1); Чинеду, 68 (0:2).

«Астана» бұл матчта алдын ала фаворит саналған еді және сол мәртебені толықтай ақтап, Талдықорғаннан сенімді жеңіспен оралды.

Дегенмен, «Жетісу» бірінші таймның басым бөлігінде қарсыластың шабуылдарына төтеп беріп, мықты қорғаныс көрсетті. Бірақ үзіліске санаулы минуттар қалғанда Грипши есеп ашып, елордалықтарға басымдық сыйлады.

Гол соққаннан кейін Григорий Бабаянның шәкірттері есепті ұлғайту мүмкіндігін күтіп, сабырмен ойнады. Сол сәт те келді — Джеффри Чинеду қарсылас қорғаушылары мен қақпашыны жеке шеберлікпен алдап өтіп, есепті 0:2-ге жеткізді.

Бұл жеңіс «Астанаға» турнирлік кестенің бірінші сатысын қайта иеленуге мүмкіндік берді. «Қайрат» екінші орынға сырғыды.

«Оқжетпес» (Көкшетау) – «Қайсар» (Қызылорда) – 4:2 (3:1)
Голдар: Мұхамед, 7 (1:0); Адахаджиев, 10 (2:0); Досмағамбетов, 19 (3:0); Төреқұл, 44 (3:1); Тұзақбаев, 47-автогол (4:1); Сұлтанов, 90+3 (4:2).

Шымкенттегі Қажымұқан Мұңайтпасов атындағы стадионда өткен бұл ойын аса жылдам қарқынмен басталды. «Оқжетпестің» шабуылшысы Алияр Мұхамед матчтың небәрі 7-минутында есеп ашты.

Қызылордалықтар бұл голдан ес жия алмай жатып, 10-минутта қақпаларына екінші голды өткізді. Ал 19-минутта есеп 3:0 болып, көкшетаулықтар толықтай басымдыққа ие болды.

Осы сәттен бастап ойын тағдыры алдын ала шешілгендей көрінді. Алайда үзіліс алдында «Қайсар» есепті қысқартуға мүмкіндік алды. Шабуылшы Ерсұлтан Төреқұл 44-минутта бір голмен жауап қатты.

Дегенмен, екінші тайм бастала сала алаң иелері есепті қайта үш доп айырмасына жеткізді. Бұл жолы «Қайсардың» ойыншысы Әлиби Тұзақбаев автогол кіргізді.

Қосымша уақыттың соңғы минуттарында Қарама Сұлтанов есепті 4:2-ге жеткізді, алайда бұл тек есеп айырмасын қысқартуға ғана жеткілікті болды. Өйткені матчтың түпкілікті нәтижесіне әсер ете алмады.

16-турда кездесетіндер:

12 шiлде:

«Ұлытау» – «Елiмай»
«Жеңiс» – «Жетiсу»
«Тұран» – «Қызылжар»

13 шiлде:

«Тобыл» – «Оқжетпес»
«Ордабасы» — «Астана».