Екінші лига: 11-турда «Оңтүстік-батыс» конференциясының көшбасшысы ауысты

1-2 шілде күндері Қазақстан чемпионатының Екінші лигадағы командалар арасында 11-тур ойындары өтті. Бұл турдың қорытындысы бойынша «Оңтүстік-батыс» конференциясының көшін «Арыс» бастады.

«Солтүстік-шығыс» конференциясы:

«Елімай-Ж» – «Астана-Ж» – 1:3
«Қызылжар-Ж» – SD Family-Ж – 5:0
«Жеңіс-Ж» – «Жетісу-Ж» – 2:1
«Шахтер-Ж» – «Ұлытау-Ж» – 3:0    
«Алтай-Ж» – «Тобыл-Ж» – 0:1

Бұл конференциядағы тур бірден орталық матчтан  басталды. Яғни «Елімай» мен «Астана» клубтарының жастары ойнады. Көшбасшы «Астана-Ж» сырт алаңда басты бәсекелесімен кездесіп, маусымда алғаш рет елеулі қарсылыққа тап болды. Көп уақыт бойы есеп тең болып тұрды. Тек екінші таймда Сапар Қарынбаев бірнеше ойыншыны ауыстырып, сәтті тактикалық шешімнің арқасында жеңісті жұлып алды. Сөйтіп елорда клубы қатарынан оныншы жеңісіне қол жеткізді.

«Елімайдың» сәтсіздігін «Қызылжар-Ж» тиімді пайдаланды. Олар өз алаңында SD Family-Ж командасын оңай жеңді – 5:0. Қонақтар бұл ірі жеңіліске өздері де себепкер болды. Кездесудің басында автогол соқты, ал бірінші таймның соңында бір ойыншысы алаңнан қуылды. Осыдан-ақ әріқарай ойынның қалай өрбитіні белгілі болды. «Қызылжар» жастары бұл жеңістің арқасында «Елімаймен» теңесті. 

Ал «Жеңіс» пен «Жетісу» жастар командалары арасындағы елордадағы матчтта мәселе алғашқы 30 минутта шешілді. Есепті негізі қонақтар ашқан. Алайда «Жеңіс» аз уақыттың ішнде есепті теңестіріп, артынша алға шықты – 2:1. Бұл есеп матч соңына дейін сақталды.

 «Шахтер» мен «Ұлытаудың» негізгі командалары бір лигада ойнамаса да, жастар командалары өзара жолықты. Орталық Қазақстанның дербиінде «Шахтер» жастары ірі есеппен жеңіске жетті. 

Өскеменде «Алтай-Ж» мен «Тобыл-М» жастар командалары кездесті. Бірінші таймда қостанайлықтар есеп ашты. «Алтай» таразы басын теңестіруге қанша тырысқанымен, жолдары болмады. Оның үстіне, қорғаушы Вячеслав Шакин 78-минутта екінші сары қағаз алып, алаңнан қуылды. Қорытынды есеп – 0:1.

«Оңтүстік-батыс» конференциясы:
      
«Жайық» – «Каспий-Ж» – 0:1
«Талас» – «Қайсар-Ж» – 0:1
Jeyran – «Ордабасы-Ж» – 0:4
«Тұран-Ж» – «Арыс» – 1:4
«Атырау-Ж» – «Мақтаарал» – 0:3       

«Оңтүстік-батыстағы» тур да сенсациямен басталды: көшбасшы «Жайық» өз алаңында турнир кестесінің төменгі жағындағы «Каспий-Ж» командасынан 0:1 есебімен ұтылды. Дегенмен, ойын статистикасына қарасақ, бұл нәтиже кездейсоқ емес. Ақтаулықтар жалпы соққылар (14-10) мен қақпаға дәл бағытталған соққылар (7-2) бойынша да басым болды.
       
Өз алаңында тағы бір жеңілісті «Талас» командасы тіркеді. Олар Қызылордадан келген «Қайсар» жастарына есе жіберді. Жалғыз гол ойынның аяқталуына аз уақыт қалғанда соғылды.

Алматыдан шыққан Екінші лига дебютанты Jeyran әлі күнге дейін ұпай ала алмай жүр. Бұл жолы олар өз алаңында «Ордабасы-Ж» командасына 0:4 есебімен жол берді. Бірінші таймда алаң иелері бір ойыншысынан айырылып, матчтың басым бөлігін 10 адаммен өткізді. Бұл мүмкіндікті сәтті пайдаланған «Ордабасы» жастары қарсыласты аяған жоқ. Қонақтар қарсылас қақпасына жауапысз төрт гол салды. Оның үшеуі шабуылшы Әлібек Халдарға тиесілі. 

Сондай-ақ «Арыс» күтпеген жерден жеңіліп қалған «Жайықтың» сәтсіздігін тиімді пайдаланып, «Оңтүстік-батыс» конференциясының көшін бастады. Жаңа көшбасшы сырт алаңда «Тұран-Ж» командасынан 4:1 есебімен басым түсті. Қарсылық тек алғашқы таймда ғана аздап қарсылық көрсете алды. 

«Атырау-Ж» мен «Мақтаарал» арасындағы кездесу алғашқы таймда тең дәрежеде өтті. Алайда екінші таймда қонақтар ойын тізгінін өз қолдарына алып, үш гол соғып, сенімді жеңіске жетті.

Екінші лиганың 12-тур матчтары 7–9 шілде күндері өтеді.