Әйелдер лигасының 11-туры: «Оқжетпес» алғашқы ұпайын еншілеп, сұрмерген ауысты

30 маусымда футболдан әйелдер арасындағы Қазақстан чемпионатының 11-тур ойындары өтті. Бұл турда көшбасшылар ірі есеппен жеңіске жетсе, бомбардирлер жарысында тағы да көшбасшы ауысты.

Тур қорытындылары:

«Жеңіс» – «Ұлытау» – 1:0
«Жетісу» – «Оқжетпес» – 0:0
«Тобыл» – «Ақтөбе» – 0:8
«Қайрат» – «Қызылжар» – 2:0
«Атырау» – «БИИК-Шымкент» – 0:19
«Томирис-Тұран» – «Астана» – 3:1
«Қайсар» – «Елімай» – 0:3.

Бұл тур Астанада Жеңіс» пен «Ұлытау» арасындағы кездесумен басталды. Аталған ойында жалғыз ғана нәтижелі соққы матч тағдырын шешті. Алаң иелері аса маңызды «Жеңіс» үш ұпайға қол жеткізді.

Әйелдер лигасында сирек кездесетін нәтиже «Жетісу» мен «Оқжетпес» арасында матчта тіркелді. Яғни бұл матчта мүлдем есеп ашылмады. Көкшетаулық футболшы қыздар үшін бұл – маусымдағы алғашқы ұпай, әрі бірінші рет қақпаларына гол жібермеген кездесу болды.

Тур барысында қалған матчтарда топырлаған голдар соғылды. Чемпионат көшбасшыларының бірі «Ақтөбе» сырт алаңда «Тобылды» 8:0 есебімен ойсырата ұтты. Айта кетерлігі, бұл матчта команданың үздік сұрмергені Алина Литвиненко алаңға шыққан жоқ.

Алайда одан да көп Атырауда соғылды. Жергілікті қала аттас команда өз алаңында елдегі әйелдер футбол флагманы  «БИІК-Шымкентпен» кездесті. Бұл ойында қонақтар қарсылас қақпасына жауапсыз 19 гол соқты. Шабуылшы Гүлнара Габелия 7 рет мергендік танытты. Сөйтіп ол бомбардирлер жарысында қайтадан көш бастады. Қазір оның жеке есебінде 41 гол бар.

Алматының «Қайрат» клубы Петропавлдан келген «Қызылжарды» қабылдаған. Алғашқы таймда алаң иелері екі гол соғып,ойын соңына дейін сол есепті сақтап қалды.

«Астана» Түркістанда «Томирис-Тұранмен» жолыққан. Әйелдер чемпионатындағы үздік командалардың бірі елордадан келген команданы 3:1 есебімен жеңді. Бірақ алаң иелеріне матч оңайға соққан жоқ. 

Жексенбі күні Қызылордада ерлер арасындағы «Қайсар» – «Елімай» матчы өткен болатын. Онда Абай облысының клубы керемет камбэк жасап, жеңіске жетті. Бір күннен кейін әйелдер арасындағы кездесуде «Елімай» қыздары еш қиындықсыз 3:0 есебімен басым түсті.

12-тур ойындары (6 шілде):

«Ұлытау» – «Атырау»
«Астана» – «Қайрат»
«Тобыл» – «Жетісу»
«Елімай» – «Жеңіс»
«Қайсар» – «Оқжетпес»
«БИІК-Шымкент» – «Томирис-Тұран»
«Ақтөбе» – «Қызылжар».