ҚПЛ-дың 14-туры: бірде-бір матчта алаң иелері жеңіске жетпеді

28–29 маусым күндері Қазақстан Премьер-лигасының 14-тур ойындары өтті. Бұл турдың басты ерекшелігі – алаң иелері бірде-бір матчта жеңіске жеткен жоқ. Жеті кездесудің үшеуінде қонақтар жеңіске жетсе, тағы үшеуі тең есеппен аяқталды.

Матч нәтижелері:

«Ұлытау» – «Жетісу» – 1:2
«Атырау» – «Оқжетпес» – 0:0
«Туран» – «Ақтөбе» – 0:3
«Тобыл» – «Жеңіс» – 2:2
«Қайсар» – «Елімай» – 1:2
«Ордабасы» – «Қайрат» – 0:1
«Астана» – «Қызылжар» – 3:3

28 маусым

«Ұлытау» – «Жетісу» – 1:2

Голдар: Кейлер, 21 (1:0); Болов, 49 (1:1); Болов, 62 (1:2)
Бас төреші: Байымбет (Тараз).

Бұл матчқа дейін «Ұлытау» қатарынан 4 матчта 10 ұпай жинаған еді. Үш ойынды жеңіп, біреуінде тең түскен. . Ал «Жетісу» 10-турдан бері жеңіске жете алмай жүрген, соңғы рет 25 мамырда өз алаңында «Ақтөбені» ұтқан болатын.

Жергілікті жанкүйерлер бұл матчқа «Ұлытауды» фаворит ретінде санады және команда бірінші таймда сол сенімді ақтады. Гол авторы – Сергей Кейлер. Алайда екінші таймда жағдай түбегейлі өзгерді. 

Алаңға шыққан Руслан Болов 13 минутта дубль жасап, командасына жеңіс сыйлады.

«Атырау» (Атырау) – «Оқжетпес» (Көкшетау) – 0:0

Бас төреші: Ыскаков (Қостанай)

Елімізде 25 маусымда ресми түрде жазғы трансфер ашылды. Бұл мүмкіндікті барынша пайдаланып жатқан команданың бірі – «Атырау». Олар құрамын қайта өзгертіп жатыр. Былтырғы маусымда бас бапкер болған Виталий Жуковский және бірнеше футболшы қайта оралды. Бұл жолы олар өз алаңында Көкшетаудың «Оқжетпес» клубымен тең түсті. «Мұнайшылар» жалпы қарсыласын 2017 жылдан бері жеңе алмай жүр. Ойында есеп ашылмады. 

29 маусым

«Тұран» (Түркістан) – «Ақтөбе» (Ақтөбе) – 0:3 (0:2)

Голдар: Думбия, 5 (0:1); Үсенов, 14 (0:2); Умаев, 90+1 (пенальти – 0:3)
Бас төреші: Қарабаев (Астана).

«Атырау» секілді құрамы да, бапкерлік штабы жаңарып жатқан ұжымның бірі – «Тұран». Түркістан клубы «Ақтөбемен» матчқа тек қазақстандық ойыншылармен өнер көрсетті. Қонақтар матч тағдырын бірінші таймда-ақ шешті. Алғашқы 15 минутта Думбия мен Үсенов екі гол соғып, жеңісті қамтамасыз етті. Қорытындыны Умаев пенальтимен түйіндеді. Соңғысы 4 матчқа созылған дисквалификациядан кейін алаңға оралды. 

Осылайша, «Ақтөбе» 4 матчқа созылған жеңіліссіз серияны аяқтады. 

«Тобыл» (Қостанай) – «Жеңіс» (Астана) – 2:2 (1:2)

Голдар: Адилио, 7 (0:1); Әділ, 32 (0:2); Сигневич, 41 (1:2); Чесноков, 76-пенальтиден (2:2).
Бас төреші: Сұлтанғалиев (Атырау).

Бұл командалар осыған дейін Қазақстан Кубогының жартылай финалында кездескен еді. Ол кезде «Тобыл» 2:1 есебімен жеңген. Бұл жолы «Жеңіс» бірінші таймда 2:0 есебімен алға шықты. Бірақ «Тобыл» есепті теңестіріп, жеңілістен аман қалды. Қорытынды есеп – 2:2.

Екі командасы осымен өзара кездесуде оныншы рет тең түсті.

 «Қайсар» (Қызылорда) – «Елімай» (Семей) – 1:2 (1:0)

Голдар: Ағзамбаев, 7 (1:0); Муртазаев, 74 (1:1); Муртазаев, 88 (1:2)
Бас төреші: Кучма (Көкшетау)
Алаңнан қуылды: Махан, 79 («Қайсар»)

«Қайсар» ойын басталғаннан кейін көп ұзамай есеп ашты. Мергендігімен көзге түскен жас футболшы Нұрдәулет Ағзамбаев болды.

Бірақ «Елімай» екінші таймда шабуылдарын үдетіп, Муртазаевтың дублі арқылы жеңісті жұлып алды. «Қайсар» 79-минутта бір ойыншысынан айырылды, бұл да матч тағдырына әсер етті.

«Ордабасы» (Шымкент) – «Қайрат» (Алматы) – 0:1 (0:1)

Гол: Жоржиньо, 18 (0:1)
Бас төреші: Тевяшов (Орал)
Алаңнан қуылды: Глейзер, 80; Эдмилсон, 88 (екеуі де – «Қайрат»).

Турдың орталық ойыны Шымкентте өтті. Қазақстанның 2023 және 2024 жылғы чемпиондары кездесті.

Қажымұқан Мұңайтпасов атындағы стадионда екі команда да бір-бірін аяған жоқ. Үш ұпай үшін бар күштерін салды. Сондықтан болар бас төреші Денис Тевяшов жалпы саны 9 сары қағаз көрсетті. Ойын соңына қарай «Қайраттың» екі ойыншысын алаңнан қуды. Оның біреуі командаға трансферде қосылған – Эдмилсон. 

Бірақ мұның бәрі «Қайраттың» жеңіске жетуіне кедергі келтірмеді. Алматы клубы Жоржиньо соққан голдың арқасында үш ұпай еншіледі. 

Осылайша, Рафаэль Уразбахтин шәкірттері көшбасындағы «Астанамен» ұпай айырмашылығын біреуге дейін қысқартты. 

 «Астана» (Астана) – «Қызылжар» (Петропавл) – 3:3 (1:1)

Голдар: Нойок, 6-автогол (1:0); Горшунов, 28 (1:1); Грипши, 51-пенальтиден (2:1); Камара, 53 (3:1); Сабино, 74 (3:2); Себаи, 79 (3:3)
Бас төреші: Затула (Өскемен).



«Астана Аренадағы» матч өте тартысты өтті. Бастапқыда «Қызылжар» өз қақпасына автогол соғып, жағдайды қиындатты. Бірақ бірінші таймда-ақ есеп теңесті. Сейсен қақпасына Горшунов гол соға алды.

Екінші тайм басталысымен, «Астана» бірден іске кірісті. Алдымен Назми Грипши пенальтдиен көзге түссе, екі минуттан соң Усман Камара есепті 3:1-ге жеткізді. Алайда қонақтар оңайшылықпен берілмейтіндерін байқатты. Ойын соңына дейін таразы басын теңестіріп, камбэк жасады. Бұл турдың басты сенсациясы деуге болады.

«Астана» турнир кестесінде бірінші орнын сақтап қалды, бірақ енді «Қайратпен» арадағы айырмашылық – небәрі бір ұпай.

 15-турда өтетін матчтар:

4 шілде:

«Қайрат» – «Тұран»

5 шілде:
 
«Қызылжар» – «Ордабасы»

·«Жеңіс» – «Ұлытау»

· «Ақтөбе» – «Атырау»

·«Елімай» – «Тобыл»

· «Оқжетпес» – «Қайсар»

·  «Жетісу» – «Астана».