Игорь Шацкий: Биыл бізде жақсы команда жасақталды

Биылғы маусымда туған жері Қарағандының «Шахтеріне» қайта оралған қақпашы Игорь Шацкий KFF League сайтына сұхбат берді. Ол әңгіме барысында команданың мақсатын, алдағы жоспарын және УЕФА Чемпиондар лигасында қай команданың ойыны ұнайтынын айтты.

 – Игорь, жаңа маусымның басталуымен құттықтаймыз! Команда капитаны ретінде «Шахтердің» биылғы мақсатың айтып берсеңіз...

– Құттықтауыңызға рахмет. Маусымға деген мақсатымыз айқын. Қарағанды клубын Премьер-лигаға қайтару. Биыл бізде жақсы команда жасақталды. Күн сайын жаттығамыз. Бәріміздің көздегеніміз – бір меже. Әрбір матчта жеңіске жетіп, жанкүйерлерді қуанышқа бөлеу. 

– «Шахтер» алғашқы екі матчта жеңіске жетті. Осы ойындарға қысқаша тоқталып өтсеңіз...

– Иә, екі ойында жеңіске жеттік. Бізге дәл қазір ең бастысы қарқынымызды бәсеңдетіп алмау. Әрбір тур сайын бабымызға еніп, сенімді ойнауға ұмтылудамыз. Осылай-осылай жеңімпазға тән менталитет қалыптасады. 

– Биылғы маусымда басты қарсыластар ретінде қай командаларды айтуға болады?

– Әрине, «Каспий» мен «Ертістің» басты қарсыластарымыз екені ешкімге құпия емес шығар. Бірақ олармен қатар басқа да командаларды ұмытпау керек. Кез келгені қарымды қарсылық көрсетіп, ұпай алуға қабілетті. «Шахтер» лигадағы барлық қарсыластарын құрметтейді.



– Бірінші лигада да талас-тартыс қызып тұр. Чемпионаттың деңгей туралы не айтасыз?

– Әзірге чемпионаттың деңгейі туралы айтуға ерте. Тек екі ойынға ғана қатысып үлгердік. Бірақ командалар бізге қарсы тыңғылықты дайындалып келеді екен. Біз әртүрлі сценарийлерге дайын болуымыз керек.

– Қазір УЕФА Чемпиондар лигасының жартылай финалына келіп жеттік. Қай клубқа жанкүйерсіз? Биыл қай команда топ жаруы мүмкін?

– Жекелей нақты бір командаға жанкүйер емеспін. Бірақ осы маусымда маған ПСЖ клубының ойыны ұнап жүр. Олардың биыл Чемпиондар лигасының кубогын жеңіп алуға толық мүмкіндігі бар. 

– Сөз соңында 25 сәуір – Қазақстанда футбол күні. осы салада еңбек етіп жүргендерге айтар тілегіңіз болса?

– Ең алдымен, қазақстандық футболдың дамуы жолында еңбек етіп жатқан барша жандарға алғысымды білдіргім келеді. Атап айтқанда, ұлттық құрама және клуб өкілдері мерекемен құттықтаймын. Барлығына сәттілік пен жетістік, махаббат пен мейірімділік тілеймін. Қазақстан футбол күні құтты болсын!

– Әңгімеңізге рахмет! Маусымға сәттілік тілейміз!