Әділбек Жақанов: «Атырау» мен «Тұранның» тағдыры осы турда шешіледі

9-10 тамыз күндері Қазақстан Премьер-лигасының 20-тур ойындары өтеді. Ел біріншілігіндегі бәсекелерге спорт журналисі Әділбек Жақанов KFF League сайтына болжам жасап, ойымен бөлісті.

«Оқжетпес» – «Жетісу»

20-турдағы алғашқы ойындардың бірі Көкшетауда өтеді. Өз алаңына оралған жергілікті «Оқжетпес» Талдықорғанның «Жетісу» командасын қабылдайды. Екі қарсыластың турнирлік кестедегі арасын қазір бақандай 10 ұпай бөліп тұр. Қайрат Нұрдәулетов баптайтын көкшеліктер осы матчта жеңіске жетсе Еурокубокқа шығуға мүмкіндік беретін 4-орынға жақындай түседі. Яғни, ел чемпионатының басты сұрмергені Дәурен Жұмат пен Дамир Мараттар алаңға тебініп шығып, қонақтардың қорғанысын біраз шайқайтын секілді. Осы екеуінің бірі гол соғады деген сенім бар. Ал «Жетісу» тізгініндегі Самат Смақов «Оқжетпеске» қарсы бір құйтырқы тактика ойлап таппаса, кезекті рет жеңіліске ұшырайтын шығар. Сондықтан менің болжамым – алаң қожайындарының сенімді жеңісі.

«Ұлытау» – «Қызылжар»

Сондай-ақ, сенбіде «Ұлытауды» ұлы шайқас күтіп тұр. Жезқазғанға қаржылық қиындыққа тап болған Петропавлдың «Қызылжары» қонаққа келеді. Қос ұжым біраздан бері жеңілістен көз ашпай, қоржынға ұпай сала алмай жүр. Әсіресе, «Ұлытау» соңғы 5 турда тек бір ұпай еншілеген. Кеншілер командасын баптайтын Нүркен Мазбаев үшін де бұл матч тағдыр шешті сынақ болмақ. Өйткені, алаң иелері жеңіске жетпесе турнирлік кестеде өкшесін басып тұрған «Тұран» мен «Атырау» басып озайын деп тұр. Ал «Қызылжардың» бас бапкері сербиялық маман Милич Чурчич те Қазақстанда қасықтап жинаған абыройын сақтап қалу үшін бұл ойында барын салатыны анық. Бір өкіншітісі негізгі шабуылшысы Сенин Себаи өткен турда қызыл қағаз алуына байланысты осы кездесуге қатыса алмайды. Жалпы Жезқазғандағы текетіресте көп гол болмайды. Екі қарсылас алаңның әр шаршы метріне талас-тартыс жүргізіп, қорғанысқа көп көңіл бөлетін секілді. Сондықтан, тең есеп тіркеледі деген болжам бар. 

«Атырау» – «Тұран»

Ертең футболдан хабары бар күллі қазақ жұртының назары Атырауда болмақ. Алыптардың емес «аутсайдерлердің» жолы түйісіп, жанкүйерлер жаға жыртыс ойынға куә болады. Бірінші лиганың табалдырығында тұрған «Атырау» мен «Тұранның» осы матчта Премьер лигадағы тағдыры шешіледі. Бір қызығы кеше ғана түркістандық команданы жаттықтырған Виталий Жуковский мен легионерлер Горан Милойко, Васили Совпель, Игорь Стасеевич, Руслан Юденков, Егорь Хаткевичтер бүгінде «мұнайшылардың» сапында. Ал «Қайсардың» күйін кешкен «Тұран» қазақстандық футболшыларға иек артуға мәжбүр болды. Өзі блогер, әрі директор Дидар Сыдықбек те елдің делебесін қозыдырып, бұл матчқа барша атыраулықтарды шақырып, стадионға кіру тегін деп жарияға жар салып қойды. Құрамын легионермен толтырып алған алаң қожайындары кездесудің айқын фавориті екені анық. Дегенмен, түркістандықтар да «я бел, я белбеу кетеді» деген айқын мақсатпен келетіні түсінікті. Қонақтарға бір ұпай еншілесе де олжа болғалы тұр. Бірақ, «Атырау» қайтсе де жеңісті жұлып әкететін секілді. 

«Елімай» – «Ақтөбе»

Жексенбінің алғашқы ойыны Семейде өтеді. Хәкім Абайдың 180 жылдығын 10 күн бойы дүркіретіп тойлап жатқан облыс жұртшылығына жергілікті «Елімай» жеңіс сыйлауға міндетті! Бірақ, қарсылас та осал болмай тұр. 4 млрд бюджеті болса да жүйелі ойыны жоқ «Ақтөбе» шығыстың тойына арып-ашып келіп қалды. Андрей Карповичтің де кезінде өзін қуып жіберген батыстық клубқа тісін батырғысы келетіні анық. Ғалымжан Кенжебек пен Рамазан Оразовтар семейліктердің ойынына қан жүгіртті. Екінші тынысы ашылған Роман Муртазаевтың да бір атары бар. Өткен турда өз алаңында «Жеңістен» жеңіліп жанкүйерлері алдында қарабет болған «Ақтөбеге» де елге қарайтын бет керек шығар. Левчук шәкірттері де оны түсініп отыр. Не де болса екі команда алаңда аянып қалмайды. Қос ұжымнан тартысты алма кезек шабуылмен өрбейтін ойын күтеміз. Дегенмен, менің болжамым «Елімай» бір гол басымдығымен жеңіске жетуі тиіс.

«Қайсар» – «Ордабасы»

Қызылордада оңтүстік дерби күтіп тұр. Тек қазақстандық футболшыларға сенім артқан «Қайсар» өз алаңында «Ордабасымен» күш сынасады. Ғани Мұратбаев стадионында аншлаг болады деген болжам айтылуда. Осы ойынға жан-жақтан жанкүйерлердің қызығушылығы байқалады. Бізге келіп жеткен инсайд бойынша биылғы маусымда алғаш рет облыс әкімі Нұрлыбек Нәлібаевтың өзі осы матчқа келуге ниет білдіріпті. Сондықтан, оңтүстік дербиде алаңда ғана емес алаңның сыртқы атмосферасы да керемет болатын сияқты. Ал қос қарсыласқа тоқталатын болсақ, «Қайсарға» Премьер лигада орнын сақтап қалу үшін ұпай ауадай қажет. Шымкенттік команда биыл ел чемпионатына емес Кубокты жеңіп алуға басымдық қойғанын білеміз. Дегенмен, қонақтардың құрам жағынан әлеуеті жоғары болғанымен «қасқырлар» синтетикалық алаңда азулы «Астана» мен «Қайраттан» да ұпай алған. Сондықтан, бұл кездесуде қарсыластар тең есеппен тарқасуы әбден мүмкін.