11.07.2025
ҚПЛ-дің 16-ТУРЫ: «ОРДАБАСЫ» КЛУБЫН ЕУРОКУБОКТАН КЕЙІНГІ СЫН КҮТІП ТҰР
12-13 шілде күндері футболдан Қазақстан Премьер-лигасының 16-тур аясындағы бес матч өтеді. Аталған турдың басты ойыны Шымкентте жергілікті «Ордабасы» мен елордалық «Астана» клубтары арасында өтпек.
12 шілде
«Ұлытау» (Жезқазған) – «Елімай» (Семей)
Басталуы – 17:00
Өтетін орны: «Металлург» стадионы (Жезқазған)
Жеке кездесулер тарихы:
Матчтар саны – 2
«Ұлытаудың» жеңісі – 0
«Елімайдың» жеңісі – 2
Тең есеп – 0
Қос ұжым бір-бірімен биыл ғана кездесе бастады. «Ұлытау» мен «Елімай» әзірге Премьер-лига мен Қазақстан кубогы аясында бір-бір мәртеден жолығып үлгерді. Сәуір айында өткен екі ойында да Абай облысының өкілдері қарсыласын 3:0 есебімен тізе бүктірген. Үшінші кездесуде «Ұлытау» жаңа бас бапкерімен алғашқы ұпайына қол жеткізе ала ма? Бұл сұрақтың жауабы сенбі күні білгілі болмақ.
«Тұран» (Түркістан) – «Қызылжар» (Петропавл)
Басталуы – 20:00
Өтетін орны: «Түркістан Арена» (Түркістан)
Жеке кездесулер тарихы:
Матчтар саны – 7
«Тұранның» жеңісі – 5
«Қызылжардың» жеңісі – 1
Тең есеп – 1
«Қызылжар» үшін «Тұран» – өте ыңғайсыз қарсылас. Бұған дейін екі команда жасыл алаңда жеті мәрте кездесіп, соның бесеуінде түркістандықтардың мерейі үстем болды. Бір ойында «Қызылжар» жеңіске жетіп, бір кездесу тең аяқталған. Петропавл ұжымы кейінгі үш ойында да оңтүстік өкілдеріне жол берген, оның ішінде биыл өз алаңында да ұтылды. Ал Түркістанда «Қызылжар» әлі бірде-бір гол соққан жоқ.
Дегенмен, қазір Милич Чурчичтің шәкірттері үшін есе қайтаратын жақсы мүмкіндік туып тұр. Өйткені «Тұран» қатарынан сегіз матчта жеңіліп, турнир кестесінде төменгі орындарға сырғып кеткен.
13 шілде
«Тобыл» (Қостанай) – «Оқжетпес» (Көкшетау)
Басталуы – 18:00
Өтетін орны: «Орталық» стадион (Қостанай)
Жеке кездесулер тарихы:
Матчтар саны – 48
«Тобылдың» жеңісі – 32
«Оқжетпестің» жеңісі – 8
Тең есеп – 8
«Оқжетпес» биыл өте сенімді ойын өрнегін көрсетіп жүр. Жуырда ғана тағайындалған бас бапкер Қайрат Нұрдәулетовтің жетекшілігімен олар өткен турда Қызылорданың «Қайсар» клубын 4:2 есебімен тізе бүктірді.
Алайда Қостанайда ұпай еншілеу оңайға соқпайтыны белгілі. Кейінгі 10 кездесуде «Тобыл» үстемдік танытып келеді. «Оқжетпес» Қостанай клубын ең кейінгі рет 2017 жылдың наурызында жеңген еді. Көкшетаулықтар 8 жылға жалғасқан сәтсіздік сериясына нүкте қоя ала ма?
«Жеңіс» (Астана) – «Жетісу» (Талдықорған)
Басталуы – 18:00
Өтетін орны: «Орталық» стадион (Павлодар)
Жеке кездесулер тарихы:
Матчтар саны – 28
«Жеңістің» жеңісі – 15
«Жетісудың» жеңісі – 6
Тең есеп – 7
Қос қарсылас арасындағы жалпы кездесулерде астаналық клубтың басымдығы байқалады. «Жеңіс» Премьер-лигаға қайта оралғаннан бері Талдықорғанның «Жетісу» ұжымын екі мәрте жеңіп, бір рет тең ойнаған. Андрей Демченко баптайтын команда соңғы төрт турда 12 ұпайдың 10-ын еншілеп, қарқынын арттырып келеді. Осы көрсеткішке сүйенсек, елордалықтарды бұл матчтың фавориті деуге болады.
Алайда «Жетісу» биыл «тосынсыйлар» жасаудан тайынбай келе жатқан команда. Сонымен қатар бұл ойын «Жеңіс» үшін өз алаңындағы матч болып саналса да, Павлодарда өтеді.
«Ордабасы» (Шымкент) – «Астана» (Астана)
Басталуы – 20:00
Өтетін орны: Қажымұқан Мұңайтпасов атындағы стадион (Шымкент)
Жеке кездесулер тарихы:
Матчтар саны – 50
«Ордабасының» жеңісі – 12
«Астананың» жеңісі – 31
Тең есеп – 7
Турдың орталық ойынында Шымкенттің «Ордабасы» клубы өз алаңында «Астананы» қабылдайды. Жалпы, мамандар бұл кездесуде елордалық ұжым басымдыққа ие екенін айтуда. Себебі Шымкентте өткен кейінгі бес кездесудің бәрінде де астаналықтар жеңіске жеткен. Қазіргі таңда Григорий Бабаянның командасы чемпионатта көш бастап тұр. Ал «Ордабасы» 7-орында, көшбасшыдан 17 ұпайға қалып келеді.
Сонымен қатар бұл матч «Ордабасы» үшін УЕФА Конференция лигасы іріктеу кезеңіндегі «Торпедо» (Кутаиси) клубымен кездесуден кейін араға үш күн салып өтеді. Команда осы уақыт ішінде күш жинап үлгере ме? Қалай болғанда да, жанкүйерлер оңай беріле қоймайтын «Ордабасыны» көргісі келетіні анық.
16-турдың екі ойыны ертерек өткен болатын:
6 сәуір
«Атырау» – «Қайрат» – 1:4
15 мамыр
«Қайсар» – «Ақтөбе» – 1:2
Қосымша жаңалықтар
ЕКІНШІ ЛИГА
ЕКІНШІ ЛИГАДАҒЫ СЕНСАЦИЯ: 12-ТУРДА «АСТАНА-Ж» МАУСЫМДАҒЫ АЛҒАШҚЫ ҰПАЙЫН ЖОҒАЛТТЫ
10.07.2025