Павел Демян – 65 жаста!

Бүгін Қазақстан футболының ардагері, шабуыл шебінде сан мәрте жанкүйерді қуантқан аты аңызға айналған футболшы, Қазақстан Республикасының спорт шебері, қазіргі таңда Кәсіби клубтар арасындағы жарыстарды өткізу дирекциясы басшысының орынбасары Павел Станиславович Демян 65 жасқа толып отыр.

Футболшы ретінде жарқын жол

Павел Демян 1960 жылы 11 маусымда дүниеге келіп, 1980-1994 жылдар аралығында кәсіби футболда жарқын із қалдырды. Осы кезеңде қарсылас қақпасына 174 гол соғып, Қазақстан футбол тарихындағы 100 голдан асырған санаулы шабуылшылардың қатарына енді.

 Ол 1984 жылы КСРО Екінші лигасының жеңімпазы, 1989 жылы қола жүлдегері атанды.
Футболшы ретіндегі жолы «Химик» (Степногорск), «Целинник» (Целиноград), «Спартак» (Тамбов), «Болат» (Теміртау), «Автомобилист» (Шортанды), «Цесна» мен «Астана» (Ақмола) клубтарымен тығыз байланысты. Әсіресе 1993 жылы, «Болат» сапында бір маусымда 46 гол соғып, жеке рекордын орнатты. Бұл нәтиже ел футболы тарихында алтын әріппен жазылған.

Футболға деген адалдық

Павел Станиславович соңғы онжылдықта Қазақстанның кәсіби футбол лигаларын дамытуға белсенді үлес қосып келеді. Қазіргі қызметінде де ол футболды терең түсінуімен, ұйымдастырушылық қабілетімен және ойындағы майда-шүйде нюанстарға мән беретін кәсібилігімен ерекшеленеді.



Қазақстан футбол қауымдастығы мен жанкүйерлері Павел Демянды 65 жылдық мерейтойымен шын жүректен құттықтайды! Сізге зор денсаулық, ұзақ ғұмыр және еліміздің футболына қосар әлі де талай үлес тілейміз!