Бірінші лига: Ertis екінші орынға көтеріліп, «Шахтер» ойсырай жеңілді

3 және 4 шілде күндері Бірінші лига командалары арасындағы Қазақстан чемпионатының 12-тур ойындары өтті. Бұл тур Павлодардың Ertis клубы үшін сәтті болды.

Матч нәтижелері:

«Түркістан» – «Ақтөбе-Ж» – 1:1
«Оңтүстік» – AKAS – 2:0
SD Family – «Екібастұз» – 0:1
«Алтай» – «Жетісай» – 1:2
«Хан-Тәңірі» – Ertis – 0:2
«Каспий» – «Қайрат-Жастар» – 0:0
«Тараз» – «Шахтер» – 4:0.

3 шілде

«Түркістан» – «Ақтөбе-Ж» – 1:1
Голдар: Жұмағалиев, 5-автогол (1:0); Бегімов, 90+1 (1:1).

Матчтағы екі голды да «Ақтөбе-Ж» командасы соқты. Олар алғашқы таймда өз қақпасына, ал соңғы минутта қарсылас қақпасынан саңылау тапт.ы

«Түркістан» қатарынан екінші тур жеңілмей келе жатқанымен, бұл тең ойын оларды турнир кестесінің соңынан көтере алмады.

Ал «Ақтөбе-Ж» әлі күнге дейін маусымда жеңіс дәмін татпаған.


«Оңтүстік» – AKAS – 2:0
Голдар: Төлепберген, 36 (1:0); Тоқтыбай, 56-пенальтиден (2:0)
Алаңнан қуылды: Қажығалиев, 69 («Оңтүстік»).

Шымкенттіктер допқа иелік ету мен шабуылда шеберлік танытты. 21–7 соққы көрсеткіші — «Оңтүстіктің» айқын басымдығын байқатады.

Капитан Қажығалиевтің алаңнан қуылғанына қарамастан, қонақтар сан басымдығын пайдалана алмады. Алаң иелері 2:0 есебімен жеңіске жетті. Сөйтіп AKAS қатарынан екінші матчта ұтылып қалды.

SD Family – «Екібастұз» – 0:1
Гол: Нұрлан, 87 (0:1).

Екі команда турнир кестесінде көршілес орналасқан. Олардың өзара матчы да тең дәрежеде өрбіді. Бірақ ешқайсысы оңайшылықпен ұпай бергісі келген жоқ. Төреші матчта 10 сары қағаз көрсетті. Дегенмен соңғы минуттарда «Екібастұз» жеңісті жұлып алды. Қосалқы құрамнан шыққан Альхам Нұрлан жеңіс голын соқты.

4 шілде

«Алтай» – «Жетісай» – 1:2
Голдар: Рысқұл, 12-пенальтиден (0:1); Попов, 66 (1:1); Әмірбек, 69 (1:2).

«Алтай» тағы да өз алаңында жеңілді. Бұған дейін де дәл осындай 10-турда сценариймен AKAS командасынан ұтылғаны. Бұл жолы да есепті теңестірген соң үш минут өтпей гол өткізіп алды.

Вахид Масудов шәкірттері үздік үштікке кіру мүмкіндігін тағы да жіберіп алды. Керсінше, «Жетісай» есін жинап, көшбасшыларға жақындап келеді.

«Хан-Тәңірі» – Ertis – 0:2
Голдар: Ағыманов, 53 (0:1); Нұрымбет, 56 (0:2)

Ertis трансферлік терезе ашылған соң, құрамын біраз күшейтіп алды. Премьер-лигада жүрген Абинұр Нұрымбет, Арман Кеңесовтер қосылды. Енді алдағы ойындарда Беларусь елінде доп тепкен Владислав Васильев те ойнайтын болады. Команда осы жолы сырт алаңда , «Хан-Тәңіріні» ұтты. Осылайша, команда қатарынан үшінші матчта қарсыласынан басым түсті. Ойын тағдыры екінші таймда шешілді. Айналдырған үш минуттың ішінде Павлодар футболшылары екі рет мергендік танытты. Алдымен Темірлан Ағыманов есеп ашса, ойын нүктесін Абинұр Нұрымбет қойды. 

Басты қарсыластары бұл турда ұпай жоғалтқандықтан, Ertis турнир кестесінде екінші орынға көтерілді.

«Каспий» – «Қайрат-Жастар» – 0:0

«Қайраттың» жастар командасы қатарынан 6 тур жеңіске жетіп келе жатқан «Каспийден» ұпай тартып алды. Олар Ақтауда көшбасшы клубқа қарсы тұрып берді.

Ойында 28 соққы тіркелсе де, екі қақпашы – Нұрлыбек Аязбаев пен Диас Реймов – керемет ойын көрсетті.

Дегенмен «Каспий» көш басындағы орнын сақтап қалды. Бірақ енді ұпай жоғалтса Ertis жетіп алуы мүмкін. 


«Тараз» – «Шахтер» – 4:0
Голдар: Мұханбетжанов, 31 (1:0); Мұханбетжанов, 38 (2:0); Кемелбек, 77 (3:0); 84 (4:0).

Сөзсіз, бұл турдың басты сенсация Таразда тіркелді. Жергілікті қаламен аттас команда Қарағандыдан келген «Шахтер» клубын тас-талқан етіп ұтты. «Кеншілер» осы маусымда Бірінші лигада топ жарып, Премьер-лигаға оралуды көздеп отыр. Бұл жолы қақпаға Игорь Шацкий оралды. Алайда Шацкийдің өзі алаң иелерінің қарқынына төтеп бере алмады. 

Матчта Абзал Мұханбетжанов дубль жасаса, оны ауыстырған Санжар Кемелбек те қос голмен көзге түсті.

«Шахтер» осы жеңілістен кейін Павлодар клубын алға жіберіп, үшінші орынға сырғыды. 


13-турда кездесетіндер:

10 шілде

«Екібастұз» – «Хан-Тәңірі»

«Ақтөбе-М» – SD Family

AKAS – «Тараз»

11 шілде

«Жетісай» – «Оңтүстік»

«Шахтер» – «Каспий»

«Қайрат-Жастар» – «Түркістан»

Ertis – «Алтай».