Бірінші лига: мамыр айының үздік ойыншысы мен үздік жаттықтырушысы анықталды

Кәсіби клубтар арасында жарыстар өткізу дирекциясы футболдан Қазақстан Бірінші лигасының 2025 жылғы мамыр айындағы үздіктерін анықтады.

Бұл айда Өскеменнің «Алтай» клубының шабуылшысы Әділет Омарбек теңдесіз деп танылды. «Үздік бапкер» номинациясында осы клубтың бас бапкері, тәжірибелі маман Вахид Масудов жеңіске жетті.

«Үздік ойыншы» номинациясының иегері турнирге қатысушы командалардың капитандары мен бапкерлерінің дауыс беруі арқылы анықталды. Ал «Үздік бапкерді» командалардың бас бапкерлері өзара дауыс беру арқылы таңдады.

Әділет Омарбек мамыр айында бес матч өткізіп, 4 гол соқты. Ол қазір Бірінші лигада үздік сұрмерген болып тұр.

Вахид Масудовтың жетекшілігімен «Алтай» бес матчтың төртеуінде жеңіске жетті. Әсіресе, команда көшбасшы ұжымдар «Каспий» мен Қарағандының «Шахтерін» жеңіп кеткен болатын.