ҚПЛ: Мамыр айының үздіктері анықталды

Кәсіби клубтар арасында жарыстар өткізу дирекциясы футболдан Қазақстан Премьер-лигасының 2025 жылғы мамыр айының үздік ойыншысы мен үздік бапкерін жариялайды.

«Үздік ойыншы» номинациясының иегері турнирге қатысушы командалардың капитандары мен бапкерлерінің дауыс беруі арқылы анықталды. Ал «Үздік бапкерді» командалардың бас бапкерлері өзара дауыс беру арқылы таңдады.

Нәтижесінде мамыр айының үздік футболшысы болып Алматының «Қайрат» клубының шабуылшысы Дастан Сәтпаев танылды. Командалар капитандарының дауыс беру нәтижесі бойынша Дастан ең көп ұпай жинады. 

Айта кетейік, Дастан Сәтпаев наурыз айында да «Астана» клубының хорватиялық ойыншысы Марин Томасовпен бірге үздік ойыншы атанған еді. Одан кейін сәуір айында жеке-дара үздік болған. Енді, міне, үшінші ай қатарынан Қазақстан Премьер-лигасында өзіңе тең келер ешкім жоқ екенін байқатты. 

Ал айдың үздік бапкері атағын «Оқжетпес» жаттықтырушысы Андрей Ферапонтов  иеленді.

Сәуір айында 16 жастағы шабуылшы Дастан Сәтпаев Премьер-лигада бес матчқа қатысып, төрт гол соқты.

Андрей Ферапонтов жетекшілігіндегі «Оқжетпес» мамыр айында бес ойын өткізіп, оның төртеуінде жеңіске жетті. Осы кезеңде команда қарсылас қақпасына 11 гол соқты. «Оқжетпес» әсіресе сырт алаңда «Елімай» мен «Қайрат» клубтарынан басым түсіп, сенсация жасады.