ӘЙЕЛДЕР ЛИГАСЫНЫҢ 9-ТУРЫ: «Ақтөбе» МАУСЫМНЫҢ РЕКОРДЫН ЖАҢАРТТЫ

16 маусымда футболдан әйелдер арасындағы Қазақстан чемпионатының тоғызыншы тур ойындары өтті. Әсіресе «Ақтөбе» мен «Оқжетпес» арасындағы матчтың нәтижесі көпшіліктің назарын аудартты.

Ойын нәтижелері:

«Атырау» – «Қызылжар» – 1:6

«Жетісу» – «Ұлытау» – 0:2

«Ақтөбе» – «Оқжетпес» – 24:0

«Тобыл» – «Елімай» – 0:4
 
«Жеңіс» – «Астана» – 0:3

 «Томирис-Тұран» – «Қайрат» – 3:0

 «Қайсар» – «БИІК-Шымкент» – 0:7.

·    
Бұл турдың шымылдығы Атырауда ашылды. Мұнда қала аттас жергілікті команда Петропавлдың «Қызылжар» клубын қабылдады. Қонақтар өз үстемдігін бірден байқатып, алғашқы таймның ортасына дейін үш бірдей жауапсыз гол соқты. Үзіліске дейін солтүстіктен келген команда тағы бір гол соқты. Алаң иелері тек осыдан соң оянып, бір доппен есеп айырмасын қысқартқан. Алайда  матч соңына қарай «Қызылжар» тағы екі гол салып, сенімді жеңіске қол жеткізді.

«Жетісу» мен «Ұлытау» арасындағы кездесу тартысты өтті. Матч алдында Жезқазған командасы турнир кестесінде Талдықорған клубынан төмен тұрған. Бірақ сырт алаңда 2:0 есебімен жеңіске жеткен «Ұлытау» өз қарсыласынан озып, тоғызыншы орынға көтерілді.

Осы турда жанкүйерлерді голға қарық қылған «Ақтөбе» мен «Оқжетпес» арасындағы матч болды. Чемпиондыққа таласып жатқан алаң иелері қарсыласын аямады. Команданың екі ойыншысы – Қазына Нұрбаева мен Наталья Нұрмиева – «покер» (4 гол) жасады. Бірақ барша назар «Ақтөбенің» үздік шабуылшысы Алина Литвиненкоға ауды. Ол бұл ойында 10 гол соғып, маусымның абсолютті рекордын орнатты! Бұл жетістік оған чемпионаттың сұрмергендер тізімінде Гүлнара Габелияны уақытша басып озуға мүмкіндік берді.

Алайда, көп ұзамай грузиялық шабуылшы Гүлнара Габелия «Қайсар» қақпасына дубль жасады. Ал ол ойнайтын «БИІК» сырт алаңда «Қайсардан» басым түсті. Қызылордадағы ойын 0:7 есебімен аяқталды.Дегенмен, қазіргі уақытта Габелия Литвиненкодан небәрі бір голға ғана озып тұр.

Осы турдағы тағы екі матч 3:0 есебімен аяқталды: «Томирис-Тұран» өз алаңында «Қайратты» жеңсе, елордалық дербиде «Жеңіс» «Астанаға» жол берді.

Семейлік қыздар үшін Қостанайға сапар сәтті болды: «Елімай» сырт алаңда «Тобылды» 4:0 есебімен ойсырата ұтты. Қонақтардың ірі есеппен жеңіске жетуіне екінші таймның жартысында бір ойыншыға аз ойнаулары да кедергі емес.

Оныншы тур ойындары:

21 маусым

«Қызылжар» – «Томирис-Тұран»

23 маусым

«Тобыл» – «Оқжетпес»

«Астана» – «Атырау»

·«Ұлытау» – «Қайсар»

·«Елімай» – «Жетісу»

·«БИІК-Шымкент» – «Жеңіс»

«Ақтөбе» – «Қайрат».