26-27 сәуір күндері Қазақстан Премьер-лигасының алтыншы тур ойындары өтеді. Осы ойындардың алдында белгілі спорт журналисі Дмитрий Нестеренко арнайы KFF League сайтына кездесулерге қатысты болжамдарын ұсынды.
«Оқжетпес» – «Жеңіс»
Екі команда да жақсы бапкерлік мектептің өкілдері. «Жеңістің» жалғыз кемшілігі – шабуыл шебінде Вавалис үшін таңдау мүмкіндігінің шектеулігі. «Жеңіс» әр ойында 2-3 нақты гол соғатын мүмкіндік жасайды, алайда гол соғу әлі де оларға қиынға соғып тұр. Дегенмен, бұл команда қорғаныста өте сенімді ойнайды. Бұл тұрғыда «Оқжетпес» те осал емес. Сондықтан Көкшетауда көп гол күтуге болмайды, ойын тағдырын жалғыз гол шешуі мүмкін.
«Жетісу» – «Елімай»
Қағаз жүзінде бұл кездесуде анық фаворит пен аутсайдер бар. Бірақ бұл ойын – Самат Смақов үшін ерекше болмақ. Ол кезінде «Елімайда» жұмыс істеп, команданы Премьер-лигаға шығарған. Сонымен қатар Кавлинов пен Шмидт секілді бірқатар ойыншы үшін де бұл матч маңызды. Сондықтан, талдықорғандықтар фаворитке лайықты қарсылық көрсетеді деп ойлаймын. Жеңіске жетуге мотивация жеткілікті бола ма – белгісіз, бірақ Андрей Карпович пен оның командасына оңай соқпайтыны анық.
«Астана» – «Атырау»
«Астана» соңғы турда Түркістанда ұпай жоғалтты. Ал «Атырау» қатарынан алты ойында жеңіліп, қиын жағдайға тап болды. «Мұнайшыларды» тығырықтан алып шығуға келген Қуаныш Қабдоловқа деген құрметім жоғары, бірақ «Астана» өз алаңында қарсыластарына сенсация жасауға мүмкіндік бермейді.
«Ақтөбе» – «Ұлытау»
Бас бапкер ауысқаннан кейін «Ақтөбе» қандай да бір серпіліс көрсететіні анық. Оның үстіне бұл – Қобыланды батыр стадионында өтетін алғашқы матч, әрі трибуналар жанкүйерге толы болады. Сондықтан «қызыл-ақтар» өз алаңында, әсіресе Премьер-лиганың дебютанты «Ұлытаумен» кездесуде жеңіске жетуге тиіс деп ойлаймын.
«Қызылжар» – «Қайсар»
Бұл командалар екі апта бұрын Қостанайда кубок матчын өткізген еді. Сол кезде номиналды алаң иелері жеңіске жеткен болатын. Осы уақыт ішінде не өзгерді? «Қызылжардың» тізгінін Милич Чурчич ұстады. «Атырау» қақпасына жеңіс голын соққаннан кейін Зорич бастаған ойыншылардың барлығы бапкерге жүгіріп баруы – оның команданың ішкі атмосферасын қалыптастыра алғанының дәлелі. Ал «Қайсар» – тек отандық ойыншылардан құралған қызықты ұжым. Олар өз алаңында кез келген командадан ұпай тартып алуы мүмкін. Бірақ сырт алаңда легионерлері бар «Қызылжарға» қарсы ойнау оңайға соқпайды. Сондықтан Петропавл командасының жеңісіне сенемін.
«Ордабасы» – «Тұран»
Турдың ең қызу матчтарының бірі – оңтүстік дербиі! «Ордабасы» соңғы турда «Жетісуды» жеңді, ал «Тұран» «Астанадан» ұпай алды. Бұл – алыс сапар емес, әрі «Тұран» үшін таныс табиғи алаң, сондықтан алаң иелерінің бұл ойында айқын басымдығы жоқ. Екі команданың соңғы нәтижелері мен ойын сапасына қарап, мен үшін фаворит – түркістандық команда. Жуковский Шымкенттен жеңіспен кете ала ма? Кем дегенде, жеңілмейді деп ойлаймын.
«Қайрат» – «Тобыл»
Бұл – турдың сөзсіз басты кездесуі. «Қайрат» Қызылордада маңызды екі ұпайынан айырылғаннан кейін бұл ойында тек жеңіс үшін алаңға шығатыны анық. Ал «Тобылдың» ойыны Вукчевич – Тағыберген – Чесноков үштігіне тәуелді. Егер алматылықтар қостанайлықтардың оң қапталына тойтарыс бере алмаса, онда қиындықтар туындауы мүмкін. Жеке өзім бұл кездесуде көп гол күтемін, өйткені қос командада да гол соғатын ойыншылар жетерлік.