22–23 сәуірде Екінші лига командалары үшінші тур ойындарын өткізді. Назарларыңызға турдың ең қызықты оқиғаларына шолуды ұсынамыз.
Матч нәтижелері
«Солтүстік-шығыс» конференциясы:
SD Family-Ж – «Ұлытау-Ж» – 3:1
«Астана-Ж» – «Шахтер-Ж» – 8:1
«Тобыл-Ж» – «Жеңіс-Ж» – 2:0
«Алтай-Ж» – «Елімай-Ж» – 1:4
«Оқжетпес-Ж» – «Қызылжар-Ж» – 0:1
«Солтүстік-шығыс» конференциясындағы ойындардың ішінен ерекше көзге түскені – елордада өткен «Астана» мен «Шахтер» командаларының кездесуі болды. Алаң иелері қарсыластарын 8:1 есебімен ойсырата жеңіп, турнир кестесінде көш бастады.
Тағы бір астаналық команда – SD Family-Ж клубы да бұл турда сәтті өнер көрсетті. «Ұлытау-Ж» футболшыларын қабылдап, 3:1 есебімен жеңіске жетті. Ал бас қаланың үшінші өкілі – «Жеңіс-Ж» Қостанайда «Тобыл-Ж» командасына 0:2 есебімен жол берді.
«Алтай-Ж» мен «Елімай-Ж» арасындағы шығыс дербиінде семейлік футболшылар Өскеменде 4:1 есебімен басым түсті. Ал солтүстіктегі «Оқжетпес-Ж» мен «Қызылжар-Ж» кездесуінде де қонақтардың мерейі үстем болды – 0:1.
«Оңтүстік-батыс» конференциясы:
«Жайық» – Jeyran – 4:1
«Ақтөбе-Ж» – «Тұран-Ж» – 5:3
«Жас Қыран» – «Талас» – 2:0
«Каспий-Ж» – «Атырау-Ж» – 2:2
«Қайсар-Ж» – «Арыс» – 0:1
Жаңадан құрылып, биыл турнирге қосылған Оралдың «Жайық» командасы біріншіліктегі алғашқы ойынын сәтті бастады. Батыс Қазақстан облысының ұжымы өз алаңында Jeyran командасын қабылдап, жанкүйерлерін 4:1 есебімен қуантты. «Жайық» тарихындағы алғашқы голдың авторы – Ислам Амангелдиев. Сондай-ақ ол бұл ойында дубль жасады.
Шымкентте өткен «Ордабасы» мен «Тұран» жастар командаларының оңтүстік дербиі голдарға бай болды. Қонақтар бірінші болып есеп ашқанымен, матч соңында шымкенттіктер ойынды өз пайдасына аяқтады – 5:3. Айта кетерлігі, алдағы жексенбіде ҚПЛ аясында осы командалардың негізгі құрамдары кездеседі.
Қалған нәтижелерден «Жас Қыранның» «Талас» командасын 2:0 есебімен жеңгенін атап өтуге болады. Бұл – қаратаулықтардың маусымдағы алғашқы жеңілісі, соның салдарынан олар конференцияда көш бастау мүмкіндігінен айырылды.
Екінші лига ойындарының төртінші тур матчтары 29–30 сәуірде өтеді.