Кәсіби клубтар арасындағы жарыстар өткізу дирекциясының басшысы Бақытжан Пазылхайыр Атырау облысына жасаған жұмыс сапары барысында облыс әкімі Серік Шәпкеновпен кездесті. Кездесу барысында тараптар өңірдегі балалар мен кәсіби футболды дамыту, инфрақұрылымды жаңғырту және балаларды спортқа баулу мәселелерін талқылады.
Атырау облысында футболға қызығушылық өте жоғары. Облыста 20 мыңнан астам бала спорт секцияларында жаттығады. Ал футбол өңірдегі ең танымал спорт түрі саналады. Сондықтан жаңа футбол алаңдарын салу, балалар мен аула секцияларын ашу федерацияның басты міндеттерінің бірі.
Мемлекет басшысы Қасым-Жомарт Тоқаев Бурабайда өткен Ұлттық құрылтайдың IV отырысында футбол клубтарына инвестиция тарту, жекешелендіру және тұрақты бизнес-модельге көшу қажеттілігін атап өткен болатын. Яғни, клубтар тек бюджет қаражатына тәуелді болмай, өздігінен табыс табатын деңгейге жетуге тиіс.
Қазақстан футбол федерациясы өңірлерді қолдауды жалғастырады. Федерация балаларға, жас футболшыларға қолайлы жағдай жасау және аймақтық футболды дамыту үшін жұмыс істейді.
