24 және 25 сәуір күндері футболдан Бірінші лига клубтары арасындағы чемпионаттың 3-тур ойындары өтеді. Бұл турда жанкүйерлердің ерекше қызығушылығын тудырған кездесулер Павлодар мен Алматыда ұйымдастырылады.
24 сәуір
«Екібастұз» – «Ақтөбе-Ж»
Басталуы – 14:00
Өтетін орны: «Шахтер» стадионы (Екібастұз қ.)
Үшінші тур ойындары «Екібастұз» бен «Ақтөбе-Ж» клубтары арасындағы кездесумен басталады. Бұл командалар әлі күнге дейін чемпионатта бірде-бір гол соқпаған. Соған қарамастан, «Екібастұз» сырт алаңда «Алтаймен» 0:0 есебімен тең ойнап, бір ұпай еншіледі. Осы турда алаң иелері маусымдағы алғашқы голын соғып, жеңіске жетуге тырысатыны анық. Бұл тұрғыдан «Екібастұзды» матчтың фавориті деуге болады.
«Түркістан» – «Жетісай»
Басталуы – 16:00
Өтетін орны: Октябрь Жарылқапов атындағы стадион (Түркістан қ.)
Оңтүстіктің екі командасы арасындағы ойын тартысты өтеді деп күтілуде. «Түркістан» маусымды екі жеңіліспен бастаса, «Жетісайдың» үш ұпайы бар. Түркістандықтардың басты артықшылығы – өз алаңындағы жанкүйерлердің қолдауы. Алайда өткен жылы бұл артықшылық көмектесе алмады: 2024 жылы «Жетісай» дәл осы стадионда 2:1 есебімен жеңіске жеткен. Жетісайлықтар биыл да сол нәтижені қайталай ала ма?
SD Family – AKAS
Басталуы – 16:30
Өтетін орны: «Жас Қыран» стадионы (Алматы қ.)
Астана мен Алматы клубтары бұл ойынға ұқсас нәтижемен келіп отыр. SD Family мен AKAS клубтарының әрқайсысында үш ұпай және төрт гол бар, сондықтан турнир кестесінде қатар орналасқан. Осы ойыннан кейін бір команда жоғары көтеріліп, екіншісі төмен сырғитыны белгілі болмақ.
«Каспий» – «Оңтүстік»
Басталуы – 16:30
Өтетін орны: BS Arena стадионы (Ақтау қ.)
«Каспий» маусымды екі жеңіспен бастап, турнир кестесінде үздіктер қатарында тұр. Ал «Оңтүстік» клубы әлі бірде-бір ұпай жинай алмай, бірде-бір гол соға алмай турнир кестесінің соңында келеді. Былтырғы екі матчта да «теңізшілер» жеңіске жеткен болатын. Алайда 2025 жылдың наурыз айында өткен Қазақстан кубогының іріктеу кезеңінде шымкенттіктер ақтаулықтарға айтарлықтай қарсылық көрсетті. Ол матчтың негізгі уақыты тең аяқталып, «Каспий» тек пенальти сериясында ғана жеңіске жеткен еді.
25 сәуір (бейсенбі)
«Тараз» – «Алтай»
Басталуы: 14:00
Өтетін орны: «Орталық» стадион (Тараз)
«Алтай» осыған дейін екі ойында гол жібермегенімен мақтануы мүмкін. Бірақ өткен турда өз алаңында «Екібастұзбен» 0:0 есебімен тең ойнап, ұпай жоғалтты. Енді Вахид Масудов шәкірттерін тағы бір сынақ күтіп тұр. Бұл жолы сырт алаңда «Таразға» қонаққа» барады. Жамбыл облысының командасы алғашқы ойында сәтсіздікке ұшырағанымен, одан кейін «Оңтүстік» командасын 2:0 есебімен жеңген болатын. Енді жанкүйерлерінің алдында «Алтайдан» да ұпай алуды көздейді.
«Хан-Тәңірі» – «Шахтер»
Басталуы: 16:30
Өтетін орны: «Хан-Тәңірі» стадионы (Алматы)
Осы турдың орталық матчтарының бірі. Бірінші лигадағы тәжірибелі ұжым саналатын «Хан-Тәңірі» өз алаңында премьер-лигадан түскен «Шахтерді» қабылдайды. Әзірге Қарағанды клубы үшін барлығы жоспар бойынша жүріп жатыр. Команда екі ойында алты ұпай жинап, көшбасшылар қатарында. Алматы ұжымы бұған дейін «Қайрат-Жастарымен» дербиде есе жібергені бар. Бұл жолы да Алмас Құлшынбаев шәкірттеріне оңай болмасы анық. «Кеншілер» әлбетте тек жеңіс үшін баратыны анық. Екі команда бұрын-сонды бір-бірімен кездесіп көрмеген. Сондықтан жанкүйерлерді қызықты матч күтіп тұр.
Ertis – «Қайрат-Жастар»
Басталуы: 19:00
Өтетін орны: «Орталық» стадион (Павлодар)
Павлодарда тағы бір қызықты матч күтіп тұр. Ertis Премьер-лигаға оралу үшін жанталасып жатыр. Алайда «Қайрат-Жастар» командасы қарсыластың атақ-даңқына қарамай ойнайтындардың бірі. Сондықтан амбициясы жоғары Ertis үшін ерекше сынақ болмақ. Әзірге Қайрат Нұрдәулетов шәкірттері мықты қарсыластармен жолыққан жоқ. Осы жолы жастық жалыны тасып тұрған ұжыммен кездеседі. Екі командаға да сәттілік тілейміз!