Футболдан әйелдер Премьер-лигасының жаңа маусымы енді ғана басталса да, командалар бәсекеге белсенді кірісіп кетті.
Чемпионаттың 2-тур ойындарынан кейін «БИІК-Шымкент» командасының көшбасшысы Гүлнар Габелия KFF League сайтына сұхбат беріп, «Астанамен» өткен ойын, жеңістен кейінгі әсері туралы айтты. Сондай-ақ чемпионаттың жаңа форматы жайлы пікір білдіріп, команданың алға қойған мақсаттары туралы ойын ортаға салды.
Чемпионаттың 2-тур ойындарынан кейін «БИІК-Шымкент» командасының көшбасшысы Гүлнар Габелия KFF League сайтына сұхбат беріп, «Астанамен» өткен ойын, жеңістен кейінгі әсері туралы айтты. Сондай-ақ чемпионаттың жаңа форматы жайлы пікір білдіріп, команданың алға қойған мақсаттары туралы ойын ортаға салды.
— Гүлнар, жеңіс құтты болсын! Алдымен ойын туралы айтып өтсеңіз.
— Рақмет! Матчтың қиын болатынын әу бастан-ақ білдік, әсіресе жасанды алаңда ойнау оңай емес. Соған қарамастан бірінші таймда үш гол соға алдық. Екінші таймда өзімізге деген сеніміміз артып, тағы да нәтижелі сәттер жасадық. Дегенмен, «Астана» қыздарына алғыс білдіргім келеді. Олар әлі жас, соған қарамастан жақсы ойын көрсетті. Алдағы ойындарында сәттілік тілеймін.
— Биыл чемпионатқа 14 команда қатысып жатыр. Бұған дейін еліміздің әйелдер футболында мұндай көп команда болмаған еді. Жаңа маусымның басталуын қалай бағалайсыз?
— Командалардың саны артқаны қуантады. Бұл – біз үшін үлкен мүмкіндік. Енді бізді 26 матч күтіп тұр. Мақсатымыз – әр ойында жеңіске жету.
— Биыл «Астана» секілді көптеген клуб легионерсіз ойнап жатыр. Мұндай командалармен кездескенде бәсеке деңгейі қандай әсер қалдырады?
— Әр команданың өзіне тән мықты тұстары бар. Чемпионатта бізге лайықты қарсылас бола алатын ұжымдар көп. Ондай ойындар ешқашан оңайға соқпайды. Бірақ біз кез келген қарсыласқа дайынбыз.
— Жазда БИІК командасы Чемпиондар лигасында өнер көрсетеді. Былтыр ұжым іріктеу кезеңінде жарыстан шығып қалған еді. Маусым соңына дейінгі мақсат қандай?
— Кейінгі үш жылда топтық кезеңге шыға алмай жүрміз. Биыл плей-оффқа шығу үшін бар күшімізді саламыз. Ал Қазақстан чемпионатына келсек, мақсатымыз нақты — чемпиондық атақты жеңіп алу.