21 сәуірде әйелдер футбол командалары арасындағы чемпионаттың екінші тур ойындары өтті.
Матч нәтижелері:
«Қызылжар» – «Ұлытау» – 1:0
«Қайрат» – «Елімай» – 0:2
«Жеңіс» – «Жетісу» – 2:0
«Атырау» – «Тобыл» – 1:1
«Томирис-Тұран» – «Оқжетпес» – 18:0
«Ақтөбе» – «Қайсар» – 8:0
«Астана» – «БИІК-Шымкент» – 0:9
Турдың алғашқы ойыны аса тартысты бола қоймаса да, турдың соңғы матчтары өте қызықты өтті. «Ұлытауды» қабылдаған «Қызылжар» қарсыластарын бар болғаны 1:0 есебімен жеңді. Ал одан кейінгі үш матчта нәтиже мүлде басқаша өрбіді. Мәселен, «Елімай» күтпеген жерден «Қайратты» жеңсе, «Жеңіс» «Жетісудан» басым түсті — екі ойын да 2:0 есебімен аяқталды.
«Атырау» мен «Тобыл» командалары тең нәтижеге разы болып, бір-бір ұпайдан еншіледі. Бір қызығы, кездесудің өзі де 1:1 есебімен аяқталды.
Ал турдың соңғы ойындары тартысты өтіп, голдарға өте бай болды. Түркістанның «Томирис-Тұран» командасы өз алаңында «Оқжетпес» клубын қабылдап, қарсыластарының қақпасына жауапсыз 18 гол соқты! Бұл ойында «Томирис-Тұран» шабуылшысы Алина Хан бес голдың және екі нәтижелі пастың авторы атанып, ерекше көзге түсті.
Сондай-ақ «Ақтөбе» өз алаңында ірі есеппен жеңіске жетті. «Қызыл-ақтар» «Қайсарға» еш мүмкіндік бермей, 8:0 есебімен басым түсті. Бұл ойында Алина Литвиненко хет-трик жасап, командасының жеңісіне сүбелі үлес қосты. Осы жеңістен соң ақтөбеліктер онлайн турнир кестесінде көш басына шыққан еді.
Алайда көп ұзамай көшбасшылықты «БИІК-Шымкент» командасы иеленді. Шымкенттік арулар сырт алаңда «Астананы» 9:0 есебімен ойсырата жеңіп, соғылған доп айырмашылығы бойынша «Ақтөбеден» озып, турнир кестесінің бірінші сатысына көтерілді. Бұл кездесуде Гүлнара Габелия алты гол соғып, екі нәтижелі пас бергенін айта кеткен жөн.
Осылайша, екі тур қорытындысы бойынша тек «БИІК-Шымкент» пен «Ақтөбе» ғана ұпай жоғалтпай, турнир кестесінің басында келеді. Ал әзірге бірде-бір ұпай жинай алмаған төрт команда — «Оқжетпес», «Астана», «Ұлытау» және «Жетісу» соңғы орындарды бөлісіп тұр.