Ертең футболдан Қазақстан Премьер-лигасының бесінші тур ойындары басталады. Матчтар қарсаңында танымал спорт журналисі әрі сарапшы Нүркен Мырзағалиев KFF League сайтына ойындар туралы арнайы пікір білдіріп, тартысты кездесулерге болжамын ұсынды.
«Ордабасы» – «Жетісу»
Бұл кездесу екі ұжым үшін де оңайға соқпайды. «Жетісу» құрамындағы бірнеше ойыншы Бірінші лигада өнер көрсеткенімен, қазіргі таңда команда өз стилін қалыптастырып үлгерді. Сондықтан олар жеңіске жетуге, гол соғуға құштар. Ал «Ордабасының» шабуылында да, мүмкіндіктерді пайдалану жағынан да мәселе бар. Бұл «Хан-Тәңірімен» Кубок жолындағы өткен ойында айқын байқалды. Матч қызықты өтетіні сөзсіз, бірақ жеңімпазды тап басып айту қиын.
«Тұран» – «Астана»
Бұл жұптың фавориті айқын. Матч сапалы әрі табиғи алаңда өтеді. Бұл «Астана» үшін маңызды фактор, өйткені елордалық ұжым сапында табиғи алаңда өз деңгейін көрсете алатын футболшылар жетерлік. Дегенмен, Виталий Жуковский жаттықтыратын «Тұран» — тәжірибелі ойыншылармен жасақталған ұжым. Десе де бұл кездесуде елордалықтар аз ғана басымдықпен жеңіске жетеді деп ойлаймын.
«Қайсар» – «Қайрат»
Бұл матчта да барлығы түсінікті сияқты. Қазір «Қайраттың» қарқыны керемет, тіпті, лигадағы ойыны жолға қойылған жалғыз команда деуге болады. Алматылықтар әр ойында гол соғуға көп мүмкіндікке ие болуда. Шабуыл шебінде керемет формадағы Дастан Сәтпаев тұрақты түрде гол соғып жүр. «Қайсардың» құрам мәселесін ескерсек, қонақтар сенімді жеңіске жетеді деп ойлаймын.
«Атырау» – «Қызылжар»
Екі команда да маусымды сәтсіз бастады. Бірақ жақында «Қызылжар» Қазақстан Кубогінде «Қайсарды» жеңіп, маңызды жеңіске қол жеткізді. Бұл жеңіс оларға қосымша мотивация болғаны анық. Жалпы алғанда, құрам жағынан «Қызылжар» «Атырауға» қарағанда басымырақ — мұны мойындау керек. Сондықтан бұл кездесудегі үш ұпай петропавлдықтарға бұйырады деп ойлаймын.
«Ұлытау» – «Оқжетпес»
Екі команда да өз стилі бар ұжымдар. Дегенмен, бұл командаларға аса үлкен үміт артылмайды. Десе де бұл матч қызықты болуға тиіс. Андрей Ферапонтовтың командасы өзінің ойын үлгісі мен тактикасының арқасында Жезқазғаннан ұпай олжалап қайтуы мүмкін.
«Жеңіс» – «Елімай»
Бұл екі команда да жақсы ұйымдастырылған, әсіресе қорғаныс жағынан. Кездесу екі тарапқа да оңай болмайды, сондықтан нақты фаворитті атау қиын. Дегенмен, қағаз жүзінде «Елімай» құрам, бюджет және басқа да көрсеткіштер бойынша басым деп ойлаймын. Алаң иелерін де осал деп айтуға келмейді, әсіресе «Ақтөбені» жеңген соң. Сондықтан бұл матчта тартысты ойын мен аз гол күтемін.
«Тобыл» – «Ақтөбе»
Бұл командалар нақты бір стильмен ерекшеленбесе де, құрамында жекелеген мықты ойыншылар бар – әсіресе шабуыл шебінде. «Тобылда» – Чесноков, Сигневич және жарақатына қарамастан маңызды ойыншы саналатын Эль-Мессауди бар. Оның қатарға қосылуымен команда күшейеді. Ал «Ақтөбеде» – Идрис Умаев, Жайро Жан және жақсы ойнап жүрген Дархан Бердібек бар. Қызықты әрі нәтижелі тең ойын болады деп сенемін.