Кәсіби клубтар арасындағы жарыстарды ұйымдастыру дирекциясының жетекшісі Бақытжан Пазылхайыр Қазақстан футбол федерациясы басшысының тапсырмасымен жергілікті стадионның, жаттығу базасының және балалар футбол мектебінің жағдайымен танысып, өңірдегі жасөспірімдер футболына көрсетіліп жатқан қолдау деңгейін бағалады.
Қазақстан футбол федерациясы балалар футболының дамуын басты назарда ұстап, жыл сайын балалар футбол орталықтарына қолдау көрсету үшін қаражат бөледі. Бұл жас таланттардың өсіп-жетілуіне және болашақ чемпиондарды тәрбиелеуге мүмкіндік береді.
ҚФФ президенті Марат Омаров «ALAN» бағдарламасының 2025 жылы жалғасатынын мәлімдеген болатын. Бағдарлама аясында бірнеше өңірде, оның ішінде Атырау облысында футбол алаңдарын жаңарту жоспарланған. Болашақ чемпиондар тек қалаларда ғана емес, ауыл-аймақтарда да дайындалуға тиіс. Әр балаға футболмен айналысу мүмкіндігін жасау – басты міндет.
Сапар аясында Бақытжан Пазылхайыр облыс басшылығымен және аймақтық футбол федерациясының өкілдерімен кездесті. Кездесу барысында инфрақұрылымды дамыту, жасөспірімдер футболын жетілдіру және Қазақстан футбол федерациясының жергілікті спорттық құрылымдармен өзара әрекеттестігі мәселелері талқыланды.
«Атырау облысына жұмыс сапарым аясында облыс әкімі Серік Шәпкеновпен кездестім. Кездесу барысында өңірдегі балалар және кәсіби футболды дамыту, инфрақұрылымды жаңарту және балаларды спортқа жаппай тарту мәселелерін талқыладық. Атырауда футболға қызығушылық өте жоғары! 20 мыңнан астам бала спорт секцияларына қатысады, ал футбол – ең танымал спорт түрлерінің бірі. Сондықтан өңірде жаңа футбол алаңдарын салу, балалар мен аула секцияларын ашу – басты міндеттердің бірі.Клубтық футболды қаржыландыру мәселесі де назарда.Президент Қасым-Жомарт Тоқаев футбол клубтарының инвестиция тарту, коммерцияландыру және тұрақты бизнес-модельдерге көшу қажеттілігін атап өтті. Клубтар тек бюджетке тәуелді болмауы керек – олар өз-өзін қамтамасыз ете алатын деңгейге жетуі тиіс. Қазақстан футбол федерациясы өңірлерді қолдауды жалғастырады. Біз балаларға, жас футболшыларға қолайлы жағдай жасау және аймақтық футболды дамыту үшін жұмыс істейміз. Алдағы міндеттер көп, бірақ бірлескен күш-жігер арқылы Атыраудағы футболды жаңа деңгейге көтеретінімізге сенімдімін, - деді Бақытжан Пазылхайыр.
