19-20 сәуір күндері Қазақстан Премьер-лигасының бесінші тур ойындары жалғасады. Бұл турдың орталық ойыны Қостанайда өтеді.
19 сәуір
«Ұлытау» – «Оқжетпес
Ойынның басталуы – 15:00
Өтетін орны: «Металлург» стадионы (Жезқазған қ.)
Жоғары топқа биыл ғана қосылған екі команда да маусымды әртүрлі бастады. «Оқжетпес» қазіргі таңда турнир кестесінің ортасында келе жатса, «Ұлытау» соңғы орында тұр. Премьер-лига дебютанты әзірге бірде-бір матчта жеңіске жете алған жоқ, оның үстіне төрт турда небәрі бір ғана гол соқты.
Алайда Жезқазған командасын осы нәтижеге қарап, олар үшін бәрі бітті деп айтуға келмейді. Чемпионат енді басталды. «Оқжетпес» пен «Ұлытаудың» арасын небәрі екі-ақ ұпай бөліп тұр. Сондықтан өз алаңындағы жеңіс жергілікті командаға Көкшетау клубын басып озуға мүмкіндік береді.
Мұндай сценарий әбден мүмкін. Себебі былтыр бұл екі команда ҚПЛ жолдамасына таласқанда, «Ұлытау» «Оқжетпестен» екі ойында төрт ұпай еншілеген болатын. Жезқазғандағы кездесу 2:0 есебімен аяқталған. Осы жолы «Ұлытау» Премьер-лигадағы алғашқы жеңісіне қол жеткізе ала ма?
«Атырау» – «Қызылжар»
Ойынның басталуы – 16:00
Өтетін орны: «Мұнайшы» стадионы (Атырау қ.)
Екі команда да қазір дағдарыс кезеңін бастан өткеріп жатыр. «Атырау» қарсыласынан бір ғана ұпай артық жинаған. Бірақ ойын саны да біреуге көп. Клуб сәрсенбі күні Алматыда 4-турдың кейінге шегерілген матчында «Қайраттан» тағы жеңілді. «Мұнайшылар» бес матчта өз қақпасына 15 гол өткізіп үлгерді. Қазіргі доп айырмасы – минус 11.
Бұл турда «Атырау» өз алаңында ойнайды. Чемпионаттағы қатарынан төрт жеңілістен кейінгі сәтсіздік сериясын тоқтатуға тамаша мүмкіндік. Дегенмен, петропавлдықтар жақында бас бапкерін ауыстырды. Ал жаңа бапкердің келуі «Қызылжар» ойыншыларына қосымша серпін беруі мүмкін. Сондықтан бізді қызықты тартыс күтіп тұр.
«Ордабасы» – «Жетісу»
Ойынның басталуы – 17:00
Өтетін орны: «Түркістан Арена» стадионы (Түркістан қ.)
«Ордабасы» мен «Жетісу» – маусым басталғаннан бері көңілі тола қоймаған командалар қатарында. Екі ұжым да премьер-лигада әлі бірде-бір матчта жеңіске жеткен жоқ. Шымкенттіктер төрт тур қорытындысы бойынша турнир кестесінің соңғы орнын «Ұлытаумен» бөлісіп тұр. Алайда «Жетісуға» қарсы өз алаңындағы жеңіс оңтүстік командасына турнир кестесінде жоғары көтерілуге мүмкіндік береді, әрі талдықорғандықтарды басып озуға жол ашады.
Бұл кездесуде «Ордабасы» фаворит саналады. Дегенмен «өз алаңы» ұғымы шартты түрде ғана қолданылады, себебі матч Түркістанда өтеді.
«Тобыл» – «Ақтөбе»
Ойынның басталуы – 19:00
Өтетін орны: «Тобыл Арена» (Қостанай қ.)
Бұл – бесінші турдың сөзсіз орталық ойыны. Көзіқарақты жанкүйер «Тобыл» мен «Ақтөбенің» осыдан 15-20 жыл бұрынғы дербилерін жақсы біледі. Тек өкініштісі, осындай деңгейдегі ойын жабық манежде өтпек. Біраз жанкүйерге трибунадан орын табылмай қалуы мүмкін. Дегенмен, бұл футбол сапасына әсер етпеуі тиіс, өйткені екі команда да қазіргі таңда жақсы формада. Екеуі де Премьер-лигадағы көшбасшы топ қатарында келе жатыр.
Кейінгі уақытта қостанайлықтар «Ақтөбемен» өткен матчтарда сәтті ойнап жүр. Былтыр чемпионаттағы екі кездесуде де жеңіске жетіп, Лига кубогы матчында да басым түскен. Бұл жолы Игорь Леонов шәкірттері сәтсіз серияны тоқтата ала ма екен?
20 сәуір
«Қайсар» – «Қайрат»
Ойынның басталуы – 15:00
Өтетін орны: Ғани Мұратбаев атындағы стадион (Қызылорда қ.)
Қазіргі ел чемпионы әрі биылғы маусымда турнир кестесінде көш бастап тұрған «Қайрат» Қызылордаға қонаққа барады. Алайда бұл сапар алматылықтар үшін оңай бола қоймас. Кейінгі екі сапарында «Қайрат» Қызылордадан не жеңіспен, не голмен де орала алған жоқ. Бір матч 0:0 есебімен аяқталса, екінші кездесуде «Қайрат» 0:1 есебімен жеңілді. Виктор Кумыков «Қайратқа» қарсы қалай ойнау керегін жақсы біледі.
Қағаз жүзінде «Қайрат» фаворит саналса да, «Қайсар» өз алаңында үнемі жан алысып, жан берісе ойнайды. Сондықтан бұл матч та тартысты әрі қызықты өтеді деп күтілуде.
«Тұран» – «Астана»
Ойынның басталуы – 17:00
Өтетін орны: «Түркістан Арена» (Түркістан қ.)
«Астананы» Қазақстанның оңтүстігінде қиын сапар күтіп тұр. «Тұран» осы маусымда жүлделі орындардан дәмелі команда екенін көрсете бастады. Құрамына да тәжірибелі футболшыларды жинаған. Бұған дейін «Ақтөбе», «Қайрат» сияқты титулы көп қарсыластарға есе жібергенімен, енді «Астанадан» ұпай алуды көздейді.
«Тұран» ешқашан «Астананы» жеңбеген. Алайда өзара өткен 10 ойынның алтауында тең нәтиже тіркелген. Сондықтан бұл жолы да «Түркістан Аренада» қызу тартыс күтіп тұр.
«Жеңіс» – «Елімай»
Ойынның басталуы – 19:00
Өтетін орны: «Астана Арена» стадионы (Астана қ.)
«Жеңіс» – Премьер-лигадағы алғашқы төрт ойынын тең нәтижемен аяқтаған жалғыз команда. «Тобыл» секілді олардың да қорғанысы мығым: төрт ойында небәрі бір ғана гол өткізген. Бірақ шабуыл шебі аса мәз емес – қарсылас қақпасына тек бір рет гол соққан.
Ал «Елімай» алғашқы турда «Атыраудан» жеңілгенімен, кейінгі үш матчта жеті ұпай жинап, көшбасшыларды қуып келеді. «Тобыл» мен «Ақтөбенің» өзара кездесетінін ескерсек, «Елімайдың» бесінші орыннан жоғары көтерілуіне мүмкіндік бар. Алайда оған «Жеңіс» жігіттері жол бере ме, бұл – бөлек мәселе. Сондықтан бұл ойында да ерекше тартыс болады деп күтілуде.