15-16 сәуір күндері Екінші лиганың 2-тур ойындары өтті. Бұл турдан кейін әр конференциядағы көшбасшылар мен аутсайдерлер анықтала бастады.
Матч нәтижелері
Солтүстік-шығыс конференциясы:
«Қызылжар-Ж» – «Тобыл-Ж» — 1:1
«Ұлытау-Ж» – «Жетісу-Ж» — 1:0
«Елімай-Ж» – «Оқжетпес-Ж» — 2:0
«Жеңіс-Ж» – «Астана-Ж» — 1:5
«Шахтер-Ж» – SD Family-Ж — 3:0
Солтүстік-шығыс конференциясының екінші турындағы елордалық командалар арасындағы кездесу жанкүйерлердің ерекше назарын аудартты. Матч өте тартысты өтіп, тосын нәтиже тіркелді. Ойында «Астана-Ж» футболшылары жылдам гол соғып, есепті ашқанымен «Жеңіс-Ж» ойыншылары көп ұзамай есепті теңестірді. Алайда алғашқы тайм соңына дейін «Астана-Ж» есепте қайта алға шығып, үзіліске 2:1 есебімен басымдықпен аттанды. Екінші таймда елордалықтар қарқынын үдетіп, ойынның тізгінін толық қолдарына алды. Сөйтіп матч соңына дейін «қонақтар» тағы үш гол соғып, есепті 5:1-ге жеткізді.
Өз алаңында SD Family жастарын ірі есеппен жеңген «Шахтер-Ж» кезекті үш ұпайын еншіледі. «Кеншілер» алғашқы екі турда қақпасына бірде-бір гол өткізбей, турнир кестесінде «Астана-Ж»-мен бірге көш бастап келеді. Қос команда бірдей ұпай жинағанымен, доп айырмашылығы бойынша «Астана-Ж» екінші орында тұр. Ал SD Family екі турдан кейін ең көп гол өткізіп алған команда атанды — 9 гол.
Оңтүстік-батыс конференциясы:
«Тұран-Ж» – «Қайсар-Ж» — 1:3
Jeyran – «Жас Қыран» — 1:2
«Арыс» – «Мақтаарал» — 1:2
«Талас» – «Каспий-Ж» — 3:1
«Атырау-Ж» – «Ордабасы-Ж» — 1:2
Оңтүстік-батыс конференциясында «Мақтаарал» маусымдағы екінші жеңісіне қол жеткізді. Дегенмен, бұл жолы тәжірибелі командаға үш ұпай алу оңайға соққан жоқ. Арысқа қонаққа барған «Мақтаарал» бірінші таймда қарсыластарына 1:0 есебімен есе жіберсе де, екінші таймның алғашқы 20 минутында екі гол соғып, жігерлі жеңіске жетті.
Турнир кестесінде «Мақтааралмен» иық тірестіріп келе жатқан қаратаулық «Талас» өз алаңында «Каспий-Ж» командасынан басым түсті. Кездесуде алғашқы голды ақтаулықтар соққанымен, екінші таймда алаң иелері есепті теңестіріп қана қоймай, тағы екі гол енгізіп, үш ұпайға ие болды.
Алматылық Jeyran мен «Жас Қыран» арасындағы дербиде «қонақтардың» мерейі үстем түсті. Соған қарамастан, лига дебютанты Jeyran екінші турда алғашқы голдарын соғып, тарихи нәтижені тіркеді. 90+5 минутта Jeyran клубының 17 жастағы шабуылшысы Олег Нужин мергендік танытып, алғашқы голдың авторы атанды. Алайда бұл гол алаң иелеріне ұпай сыйлауға аздық етті.