Шымкенттің «Ордабасы» футбол клубы Қазақстан Кубогының финалында Қызылорданың «Қайсар» командасын 4:1 есебімен жеңіп, өз тарихында алғаш рет алтын дубль жасады.
Түркістан қаласындағы «Түркістан Арена» стадионында өткен шешуші кездесуде шымкенттік футболшылар алғашқы минуттардан-ақ басымдық танытты.
Матчтың 7-минутында Сұлтанбек Астанов есеп ашты. Ал 41-минутта Бьорн Йонсен қарсылас қақпасына екінші голды соғып, «Ордабасының» басымдығын арттырды.
Екінші таймда да шымкенттіктер шабуыл қарқынын бәсеңдеткен жоқ. 60-минутта Абагна есепті 3:0-ге жеткізсе, 71-минутта Эльхан Астанов төртінші голдың авторы атанды.
«Қайсар» сапынан Агостиньо Азеведо бір гол соғып, есеп айырмасын қысқартты. Осылайша, кездесу 4:1 есебімен аяқталды.
Ойыннан кейін «Ордабасының» бас бапкері Андрей Мартин шәкірттерінің жеңіске толық лайық болғанын атап өтті.
«Бірінші минуттан соңғы минутқа дейін ойынды бақылауда ұстадық. Команда агрессивті, сапалы әрі заманауи футбол көрсетті. Бұл жеңісіміздің заңды екеніне ешкім күмән келтірмейді деп ойлаймын. Шымкент қаласын және барлық жанкүйерді құттықтаймын», – деді маман.
Ал «Қайсар» бапкерінің көмекшісі Дмитрий Карпов жеңілістен кейін жанкүйерлерден кешірім сұрады.
Айта кетейік, «Ордабасы» Қазақстан Кубогын өз тарихында үшінші рет жеңіп алды. Ең бастысы, шымкенттік клуб бір маусымда ел чемпионаты мен ұлттық Кубокты қатар иеленіп, тұңғыш рет тарихи алтын дубльге қол жеткізді.