– Андрей, Қазақстан кубогының финалына дайындық қалай жүріп жатыр? Команданың көңіл күйі қандай?
– Ең алдымен, Қазақстан кубогының финалы сияқты жоғары деңгейдегі матчқа қатысу біз үшін үлкен қуаныш. Мұндай кездесулер әрқашан ерекше әсер сыйлайды. Кубоктық ойындардың атмосферасы эмоцияға, толқу мен жауапкершілікке толы. Сондықтан бұл футболшылар үшін де, бапкерлер штабы үшін де маңызды оқиға.
Біз финалға дайынбыз және көңіл күйіміз жақсы. Маусымды жоғары деңгейде, жеңіспен аяқтағымыз келеді. Қазір бар ойымыз ертеңгі кездесуде. Ойынға тыңғылықты дайындалып, лайықты өнер көрсетуіміз керек.
Ертең стадион жанкүйерлерге лық толады деп үміттенемін. Көрермендер тартысты әрі қызықты футбол тамашаласа деймін. Біз бұған дайынбыз және алаңда бар күшімізді саламыз.
– Команданың үздік сұрмергені Бьорн Йонсен финалда қаншалықты маңызды рөл атқарады?
– Бьорн «Қайсарға» қарсы да, басқа кездесулерде де гол соқты. Оның маңызды голдары да, аса шешуші болмаған голдары да бар. Бірақ Бьорн – біздің команданың бір бөлігі ғана. Біз бүкіл ойынымызды тек соған құрмаймыз.
Ол – командалық механизмнің бір бөлшегі. Сондықтан мен үшін ең маңыздысы – ертең «Ордабасының» жоғары деңгейде ойын көрсетуі.
Мысалы, Бьорн емес, Әмір хет-трик жасаса, мен бұған да қуанамын. Голды кім соғатыны мен үшін маңызды емес. Ең бастысы – команданың жеңіске жетуі және сапалы футбол көрсетуі.
– Сіздің «Ордабасымен» келісімшартыңыз 30 қарашада аяқталады. Клубтағы болашағыңыз туралы не айта аласыз?
– Шынымды айтсам, әзірге ештеңе білмеймін. Менің келісімшартым 30 қарашаға дейін жарамды. Сол уақытқа дейін жұмысымды жалғастырып, өз міндеттерімді толық орындауға дайынмын.
Бұл жоба маған қызықты. Мен мұнда үлкен ынтамен жұмыс істеп жүрмін. Қазір бүкіл команда болып тек ертеңгі матчты ойлап отырмыз.
Одан кейін не болатынын ойын аяқталған соң клуб басшылығымен талқылаймыз. Қазіргі уақытта мені алдағы финалдан басқа ештеңе қызықтырмайды.