Қызылордалық «Қайсар» футбол клубының бас бапкері Талғат Байсуфинов Қазақстан кубогының финалында шымкенттік «Ордабасымен» өтетін матч алдындағы баспасөз мәслихатында команданың дайындығы, футболшылардың психологиялық жағдайы және өзінің клубтағы болашағы туралы пікір білдірді.
– Талғат Маруаұлы, команда Қазақстан кубогының финалына қаншалықты дайын? Қарсылас туралы не айтасыз?
– Ел чемпионатын аяқтадық. Енді, Алла қаласа, ертеңгі кубок финалымен маусымды қорытындылаймыз. «Ордабасы» – өте мықты, сапалы команда. Ең алдымен, оларды чемпиондық атағымен құттықтаймын. Келесі жылы Чемпиондар лигасында ел намысын абыроймен қорғап, жақсы нәтиже көрсетуіне тілектеспіз. Еурокубокта оларға жанкүйер боламыз.
Бірақ ертең – мүлде басқа жарыс, Қазақстан кубогының финалы. Алдымызда бір ғана ойын қалды. Жігіттермен қажетті дайындық жұмыстарын жүргіздік. Қандай тактикамен, қандай стратегиямен ойнайтынымызды толық түсіндірдік. Ендігі мақсат – алаңға шығып, жақсы ойын көрсету және, Алла қаласа, жеңіске жету.
– Финал алдында футболшылардың психологиялық дайындығы қандай? «Ордабасының» шабуыл шебіне қарсы тұруға дайынсыздар ма?
– Командаға келген кезде жігіттердің психологиялық жағдайын жақсы түсіндік. Соңғы екі кездесуде футболшылар бар күш-жігерін алаңда қалдырды. Олардың жеңіске деген ынтасын, жауапкершілігін көрдік.
Қазір бар ойымыз – финалда. Жігіттер психологиялық тұрғыдан дайын. Команда капитаны да осыны айтып отыр. Финалдың ерекшелігі сол – барлығы бір ғана матчта шешіледі. Сондықтан ештеңені кейінге қалдыруға болмайды.
Қарсыласымыздың шабуыл шебі мықты екенін білеміз. Соған сәйкес дайындалдық. Ең бастысы, өз ойынымызды көрсетіп, тәртіпті сақтауымыз керек.
Қандай нәтиже болса да, ертең маусым аяқталады. Бірақ біз жай ғана маусымды аяқтау үшін келген жоқпыз. Басты мақсатымыз – Қазақстан кубогын жеңіп алу. Жанкүйерлерімізді де ұмытпауымыз керек. Солар үшін бар күшімізді, бар энергиямызды алаңда қалдырып, жақсы көңіл күй сыйлағымыз келеді. Менің де басты мотивациям – осы.
– «Қайсар» сапындағы жұмысыңызды келесі маусымда жалғастыруыңыз мүмкін бе? Клуб басшылығымен қандай келісім бар?
– Өздеріңіз де естіген шығарсыздар, команда осындай қиын жағдайға тап болған кезде мен өз ұстанымымды айтқанмын. Басқа клубтарды, олардың бас бапкерлерін ренжіткім келмейді. Арасында достарым бар, жас жаттықтырушылардың кейбірі кезінде менің қол астымда ойнаған футболшылар.
«Қайсар» маусымның алғашқы турынан бастап жаман ойын көрсеткен жоқ. Команданың мүмкіндігі бар екенін көрдім. Бірақ белгілі бір себептермен осындай қиын жағдайға тап болды.
Сондықтан қолымнан қандай көмек келеді, осы үш матчта командаға не бере аламын деген оймен келістім. Бастапқы келісіміміз тек үш ойынға қатысты болды. Одан арғы мәселені ойлаған жоқпыз.
Клуб басшылығы да ертеңгі кездесуді күтіп отыр. Одан кейін қандай әңгіме болатынын уақыт көрсетеді. Қазір ол туралы ойланатын кез емес. Біздің бар назарымыз, бар ойымыз – ертеңгі финалда.
– Финал қарсаңында жанкүйерлерге не айтасыз?
– Біз үшін жанкүйерлердің қолдауы өте маңызды. Биыл олар үшін де оңай маусым болған жоқ. Сондықтан маусымның соңғы кездесуінде жақсы ойын көрсетіп, қуаныш сыйлағымыз келеді.
Жігіттер мұны жақсы түсінеді. Финалда бар күшімізді саламыз. Алла қаласа, Қазақстан кубогын жеңіп алып, маусымды жақсы көңіл күймен аяқтағымыз келеді.
Айта кетейік, Қазақстан кубогының финалында «Қайсар» мен «Ордабасы» 7 қараша күні Түркістан қаласындағы «Түркістан Арена» стадионында кездеседі. Матч сағат 16:00-де басталады.
«Ордабасы» 2026 жылғы Қазақстан Премьер-лигасының чемпионы атанса, «Қайсар» турнирлік кестеде соңғы орын алып, Бірінші лигаға түсіп қалды.