KFF Awards 2026 салтанатты марапаттау рәсімінде әйелдер арасындағы ел чемпионатының үздік футболшылары мен жаттықтырушылары анықталды.
Сонымен қатар отандық футболдың дамуына қосқан үлесі үшін Бауыржан Абдубаитов арнайы марапатқа ие болды.
Әйелдер чемпионатының үздік қақпашысы атағы елордалық «Жеңіс» клубының өкілі Дидар Нәкенге бұйырды.
Маусымның үздік шабуылшысы болып Кенжебүбі Ырысбекқызы танылса, үздік сұрмерген атағын Алина Литвиненко жеңіп алды. Ол маусым барысында 50 гол соғып, 15 нәтижелі пас берген.
«Жыл жаңалығы» аталымында 17 жастағы Әсел Жолболат үздік атанды. Қазақстанның U-17 және U-19 жасөспірімдер құрамаларында өнер көрсететін футболшы 13 гол соғып, алты нәтижелі паспен көзге түскен.
Ал маусымның үздік футболшысы атағы Гүлнара Габелияға берілді. Қазақстанның 14 дүркін чемпионы кәсіби мансабын аяқтаған. Оның футболдағы жетістіктерін құрметтеу мақсатында клуб жетінші ойын нөмірін өзіне бекітіп берді.
Әйелдер чемпионатының үздік жаттықтырушысы болып «БИИК-Шымкент» командасының бапкері Әбдухалық Бөрібаев танылды.
Айта кетейік, 2026 жылғы әйелдер лигасында барлығы 156 матч өткізіліп, 769 гол соғылған. Кездесулерді жалпы саны 20 178 жанкүйер тамашалаған.
Марапаттау рәсімінің тағы бір маңызды сәті - Бауыржан Абдубаитовқа арнайы сыйлықтың табысталуы болды. Ол Қазақстан футболының дамуына қосқан үлесі үшін марапатталды.
Арнайы марапатты Қазақстан футбол федерациясының кәсіби жарыстар дирекциясының басшысы Ержан Мұсабаев табыстады.
Осылайша, KFF Awards 2026 аясында әйелдер футболындағы үздік ойыншылар мен жаттықтырушылардың жетістіктері ғана емес, отандық футболдың дамуына еңбек сіңірген азаматтардың үлесі де жоғары бағаланды.