Қазақстанда 2026 жылғы Премьер-лига маусымының үздік футболшылары мен жаттықтырушысы анықталды.
KFF Awards 2026 марапаттау рәсімінде жеке жүлделердің басым бөлігін шымкенттік «Ордабасы» клубының өкілдері иеленді.
Марапаттау кешінің басты қаһарманы «Ордабасы» шабуылшысы Бьёрн Йонсен болды. Футболшы бірден үш аталым бойынша үздік атанды. Ол маусымның үздік ойыншысы, үздік шабуылшысы және үздік сұрмергені ретінде марапатталды.
Қазақстан Премьер-лигасының үздік қақпашысы атағын «Ордабасы» сапында өнер көрсететін Бекхан Шайзада жеңіп алды. Бұл аталымда оған «Ақтөбе» қақпашысы Александр Заруцкий мен «Қайрат» ойыншысы Темірлан Анарбеков бәсекелес болды.
Ал маусымның үздік қорғаушысы болып алматылық «Қайраттың» тәжірибелі беларусь футболшысы Александр Мартынович танылды. Ол бұл аталымда Сергей Малый мен Темірлан Ерлановтан озып шықты.
Үздік жартылай қорғаушы атағы елордалық «Астана» клубының ойыншысы Иван Башичке бұйырды. Аталған жүлдеге Давид Абагна мен Бауыржан Исламхан да үміткер болған.
«Ордабасы» клубының жас футболшысы Жасұлан Әмір де екі бірдей марапатқа ие болды. Ол маусымның үздік жас ойыншысы атанып, «Жыл жаңалығы» жүлдесін жеңіп алды.
Ал Қазақстан Премьер-лигасының үздік жаттықтырушысы болып «Ордабасы» командасының бас бапкері Андрей Мартин танылды. Оның жетекшілігімен команда 30 кездесуде 21 жеңіске жетіп, бес рет тең ойнап, төрт мәрте жеңіліс тапқан.
Айта кетейік, 2026 жылғы Қазақстан Премьер-лигасында барлығы 240 матч өткізіліп, 615 гол соғылған. Чемпионат ойындарын жалпы саны 1 382 217 көрермен тамашалаған.
Маусымдағы ең жоғары көрермен саны «Астана Аренада» өткен «Астана» мен «Қайрат» арасындағы кездесуде тіркелді. Бұл матчты 28 235 жанкүйер тамашалаған.