Елімізде футбол маусымы ресми түрде мәреге жетті. Маусым қорытындысы бойынша Қазақстан футбол федерациясы екінші жыл қатарынан KFF Awards 2026 салтанатты марапаттау рәсімін өткізді.
Іс-шара барысында ел футболының үздік ойыншылары, жаттықтырушылары мен сала мамандары марапатталды.
Салтанатты кеште Қазақстан Премьер-лигасы, Бірінші және Екінші лига, сондай-ақ әйелдер чемпионатының үздіктері анықталды.
Марапаттау рәсімінде 2026 жылы қазақстандық футболда жүзеге асырылған маңызды жобалар мен жетістіктер де атап өтілді. Атап айтқанда, сегіз футбол клубының жекешелендірілуі, FIFA Series жобасы, әйелдер құрамасының әлем чемпионатына іріктеу кезеңіндегі плей-оффқа шығуы және жасөспірімдер құрамаларының халықаралық жарыстардағы нәтижелері назарға алынды.
Сонымен қатар Қазақстанда 19 команда қатысатын кәсіби әйелдер лигасының дамуы, Hawk-Eye және VOL технологияларының енгізілуі, KFF League YouTube арнасындағы қаралым санының 94 пайызға артуы айтылды.
Іс-шара барысында футбол медиасы саласының үздіктері де марапатталды. «Үздік клубтық медиа» атағын шымкенттік «Ордабасы» клубының баспасөз қызметі иеленді. «Үздік контент жасаушы» болып Эльдар Аманбаев танылса, «Үздік медиажоба» марапаты Matchday подкастына табысталды.
Бұдан бөлек, төрешілікті дамытуға қосқан үлесі үшін Артём Кучин мен Эльвира Нұрмұстафина арнайы марапатқа ие болды. Ал Қазақстан футболының дамуына қосқан үлесі үшін Бауыржан Абдубаитов қошеметке бөленді.
Кештің ерекше сәттерінің бірі Талғардағы Қазақстан футбол федерациясы академиясының алғашқы 16 түлегін құрметтеу болды. Аталған академия FIFA Talent Academy мәртебесіне ие.
Сондай-ақ салтанатты рәсімде өмірден өткен қазақстандық футбол аңыздарын еске алып, бір минут үнсіздік жарияланды.
KFF Awards 2026 марапаттау кеші жеңімпаздарды құттықтау және барлық лауреаттың естелік суретке түсуімен қорытындыланды.