«Ақтөбе» әйелдер командасы УЕФА Еуропа кубогының екінші іріктеу кезеңіндегі қарымта матчта Амстердамның «Аякс» клубын жеңді.
Ақтөбеде өткен кездесу алаң иелерінің пайдасына шешілді. Қорытынды есеп – 1:0.
Матчтың басым бөлігінде доп қақпа торынан табылмады. Кездесудің тағдыры 83-минутта шешілді. «Ақтөбе» футболшысы Морган Рис қарсылас қақпасына гол соғып, командасына жеңіс сыйлады.
Алайда бұл нәтиже қазақстандық клубтың келесі кезеңге шығуына жеткіліксіз болды. 23 қыркүйекте Нидерландта өткен алғашқы кездесуде «Аякс» 8:0 есебімен басым түскен еді.
Осылайша, екі матчтың қорытындысы бойынша амстердамдық клуб 8:1 есебімен жеңіске жетіп, турнирдегі жолын жалғастырды. Ал «Ақтөбе» УЕФА Еуропа кубогындағы өнерін аяқтады.
Айта кетейік, алғашқы матчта «Аякс» сапынан Элла Туон хет-трик жасап, Катя Снуэйс екі гол соққан. Сондай-ақ Шерида Спице, Даниэль Юлия Нурдермейер және Джейд ван Хенсберген мергендік танытқан.
«Ақтөбе» УЕФА Еуропа кубогына Чемпиондар лигасының іріктеу кезеңінен кейін түскен болатын.