Футболдан әйелдер арасындағы Қазақстан чемпионатының алғашқы туры жанкүйерлерді голға қарық қалды. Жеті матчта 36 доп қақпа торынан табылды.
Матчтардың нәтижесі:
«Жетісу» (Талдықорған) – «Қайсар» (Қызылорда) – 2:3
«БИІК-Шымкент» – «Қызылжар» (Петропавл) – 9:0
«Астана» (Астана) – «Ақтөбе» (Ақтөбе) – 0:6
«Ұлытау» – «Қайрат» (Алматы) – 0:2
«Елімай» (Семей) – «Томирис-Тұран» (Түркістан) – 1:1
«Оқжетпес» (Шымкент) – «Атырау» (Атырау) – 1:7
«Тобыл» (Қостанай) – «Жеңіс» (Астана) – 3:1.
Қызылорда өңірі алғаш рет әйелдер арасындағы Қазақстан чемпионатына команда қосқан болатын. Алғашқы тур олар үшін сәтті басталды. «Қайсар» қыздары бірінші ойынын сырт алаңда «Жетісу» командасымен өткізіп, тартысқа толы матчта 3:2 есебімен басым түсті. Айтпақшы, осы ойында маусымның алғашқы дебюттік голы соғылды. Оның авторы – Құндыз Қожахмет. Жалпы, Құндыз бұл кездесуде дубль жасады.
Келесі матчта Қазақстанның әйелдер футболының флагманы саналатын Шымкенттің БИІК клубы деңгейі қаншалықты жоғары екенін тағы бір мәрте байқатты. Үзіліске дейін-ақ Петропавлдың «Қызылжар» клубының қақпасына алты жауапсыз гол соққан олар ірі есеппен жеңіске жетті. Екінші таймда «Қызылжар» қақпашысы тағы үш доп алып шығуға мәжбүр болды. Қорытынды есеп – 9:0.
Ал «Ақтөбе» қыздары елордаға қонаққа келіп, «Астанадан» 6:0 есебімен басым түсті. Осы матчта қонақтар сапынан Алина Литвиненко маусымдағы алғашқы хет-триктің авторы атанды.
Жезқазғанда жергілікті «Ұлытау» мен Алматының «Қайраты» кездесті. Бұл матч басқа ойындарға қарағанда аса тартысты болды. Алаң иелері барынша қарсылық көрсетті. Дегенмен алматылықтар әрбір таймда бір-бір голдан соғып, жеңіске жетті.
Тағы бір тартысты ойындардың бірі Өскеменде өтті. Семейдің «Елімай» клубының қыздары Түркістанның «Томирис-Тұран» командасын қабылдады.
Алаң иелері жылдам есеп ашқанымен, үзілістен кейін қарсылас таразы басын теңестірді. Одан кейін таблодағы көрсеткіште өзгеріс болмады. Сөйтіп екі команда 1 ұпайға қанағат білдіріп, тең тарқасты.
Көкшетаудағы «Оқжетпес» пен мұнайлы өлкенің «Атырау» клубының қыздары арасындағы матчта ірі есеппен аяқталды. Бірінші таймда Жанар Жәрдем мен Ботагөз Жұмажанова «Атыраудың» пайдасына бір-бір голдан салған.
Үзілістен кейін алаң иелері сапынан Аида Амантай қызыл қағаз алып, «Оқжетпестің» қиын жағдайға қалдырып кетті. Мұндай мүмкіндікті қонақтар мүлдем жібермеді. Қорытынды есеп – 1:7.
Айтпақшы, «Атырау» шабуылшысы Ботагөз Жұмажанова бес рет дәлдік танытып, пента-трик авторы атанды. 
Бірінші турдың соңғы ойыны Қостанайда өтті. Жергілікті «Тобыл» Астананың «Жеңіс» клубының қыздарын қабылдады. Бірінші таймда үш гол соғып алған «Тобыл» аса қиналмай, үш ұпай ұпайға қол жеткізді. Екінші кезеңде бар-жоғы «Жеңіс» бір доппен ғана жауап қайтара алды. Бұл қорытынды есепке әсер еткен жоқ.
Екінші турда өзара кездесетіндер:
«Ақтөбе» – «Қайсар»
«Жеңіс» –- «Жетісу»
«Ақтөбе» – «Тобыл»
«Томирис-Тұран» – «Оқжетпес»
«Қайрат» – «Елімай»
«Қызылжар» – «Ұлытау»
«Астана» – «БИІК-Шымкент».
Екінші тур ойындары 21 сәуірде өтеді.