«БИІК-Шымкент» футболдан әйелдер арасындағы Қазақстан чемпионатының 2026 жылғы маусымында топ жарды. Шымкенттік команда шешуші кездесуде Түркістанның «Тұран» клубын 3:0 есебімен жеңді.
Финалдық кездесуде «БИІК-Шымкент» ойын тізгінін алғашқы минуттардан-ақ өз қолына алды. Шымкенттік футболшылар небәрі жеті минуттан кейін есеп ашты. Бибігүл Нұрышева қарсылас қақпасын дәл көздеп, командасын алға шығарды.
Арада екі минут өткенде Теодора Никоара есепті еселеді. Осылайша кездесудің 9-минутында «БИІК-Шымкент» 2:0 есебімен алда тұрды.
Екінші таймда да шымкенттік команда басымдығын сақтады. 54-минутта Гулнара Габелиа үшінші голды соғып, матчтың қорытынды есебін белгіледі – 3:0.
Осы жеңістің арқасында «БИІК-Шымкент» 2026 жылғы Қазақстан чемпионы атанды. Сондай-ақ команда келесі маусымда УЕФА Чемпиондар лигасында Қазақстан атынан өнер көрсету құқығына ие болды.
«Ақтөбе» қола жүлдені иеленді
Бұған дейін Петропавлдағы «Қарасай» стадионында үшінші орын үшін «Ақтөбе» мен елордалық «Жеңіс» кездесті. Ақтөбелік команда қарсыласын 2:0 есебімен жеңіп, чемпионаттың қола жүлдесіне қол жеткізді.
Кездесудің 11-минутында Алина Литвиненко есеп ашса, 61-минутта Айжан Боранбекова «Ақтөбенің» екінші голын соқты.
Осылайша әйелдер лигасының 2026 жылғы маусымында «БИІК-Шымкент» чемпион, «Тұран» күміс жүлдегер, ал «Ақтөбе» қола жүлдегер атанды. Төртінші орын «Жеңіске» бұйырды.
Жартылай финалда «БИІК-Шымкент» «Жеңісті», ал «Тұран» «Ақтөбені» бірдей 1:0 есебімен жеңген болатын.
Қазақстанда әйелдер арасындағы ел чемпионаты 2000 жылдан бері өткізіліп келеді. «БИІК-Шымкент» отандық әйелдер футболындағы ең көп чемпиондық атаққа қол жеткізген клубтардың бірі саналады.