Петропавл қаласындағы «Қарасай» стадионында Әйелдер лигасының жартылай финалдық кездесулері өтті.
Алғашқы жартылай финалда А конференциясының жеңімпазы «БИІК-Шымкент» В конференциясында екінші орын алған «Жеңіс» командасымен кездесті. Шымкенттік ұжым қарсыласынан айқын басым түсіп, 5:0 есебімен жеңіске жетті.
«БИІК-Шымкент» сапынан Гүлнара Габелия 22 және 85-минуттарда екі гол соқты. Сондай-ақ Теодора Никоара 75, Валерия Попова 80 және Бибігүл Нұрышева 81-минуттарда мергендік танытты. Осылайша, шымкенттік команда финалға сенімді түрде жолдама алды.
Екінші жартылай финалда В конференциясының жеңімпазы «Ақтөбе» мен А конференциясында екінші орын алған «Тұран» кездесті. Тартысты өткен ойында жалғыз гол матчтың соңына қарай соғылды. 84-минутта Медина Нұрланқызы «Тұранға» жеңіс сыйлаған голдың авторы атанды – 0:1.
Осы нәтиженің арқасында «Тұран» да финалға шығып, Қазақстан чемпионы атағы үшін күресу мүмкіндігіне ие болды.
Енді Әйелдер лигасының шешуші кездесуінде «БИІК-Шымкент» пен «Тұран» чемпиондық атақты сарапқа салады. Финал жеңімпазы 2026 жылғы Қазақстан чемпионы атанып, келесі маусымда УЕФА Чемпиондар лигасында ел намысын қорғау құқығына ие болады.
«Ақтөбе» мен «Жеңіс» қола жүлдеге таласады. Былтыр «Ақтөбе» ел чемпионы атанған еді.