Қостанайда «Тобыл» футбол клубының тарихындағы маңыздың өзгерістердің бірі болды. Жергілікті Olzha Agro компаниясы клуб құрылтайшыларының құрамына кіріп, «Тобыл» футбол клубының жаңа иесі атанды.
Компания клубты басқаруды және оның алдағы дамуына жауапкершілікті өз мойнына алады.
Қостанай облысы әкімінің орынбасары Бақытжан Нарымбетов кәсіби футбол клубтарын бәсекелестік ортаға беру мемлекет басшысының отандық футболды дамыту және коммерцияландыру жөніндегі тапсырмасы аясында жүзеге асырылып жатқанын атап өтті.
«Мемлекет басшысы кәсіби спортқа жеке инвесторларды тарту және футбол клубтарын кезең-кезеңімен заманауи басқару моделіне көшіру міндетін қойды. Қостанай облысы үшін тек негізгі командаға ғана емес, клубтың одан әрі жүйелі дамуына жауапкершілік алуға дайын меншік иесін табу аса маңызды болды. Бүгін біз «Тобыл» тарихындағы жаңа кезеңнің басталғанын айта аламыз, - деді Бақытжан Нарымбетов.
«Olzha Agro» ЖШС бас директоры Әлішер Асанұлы Қожаназаров компания «Тобыл» футбол клубын басқаруды және оның болашақтағы дамуына жауапкершілікті өз мойнына алатынын айтты.
«Клубтың Olzha Agro басқаруына өтуі «Тобыл» тарихының жаңа парағын ашады. Біз заманауи әрі тұрақты басқару моделін қалыптастырып, спорттық бағытты, инфрақұрылымды, академияны және жас футболшыларды даярлау жүйесін дәйекті түрде дамытуды көздеп отырмыз. Бұл – біз үшін Қостанай облысы мен клуб жанкүйерлері алдындағы үлкен жауапкершілік», – деді Әлішер Қожаназаров.
Сонымен қатар «Тобылдың» тарихы, дәстүрі мен бірегей болмысы, Қостанай өңірімен және жанкүйерлерімен қалыптасқан тығыз байланысы өзгеріссіз сақталады.
Жаңа меншік иесінің алдында клубтың бай мұрасын сақтап, оның тұрақты дамуын қамтамасыз ету және жаңа спорттық жетістіктерге қол жеткізуге қажетті жағдай жасау міндеті тұр.