Қазақстан Екінші лигасының 22-туры аяқталды. Кезекті турда екі конференцияда да тартысты кездесулер өтіп, бірнеше матчтың тағдыры соңғы минуттарда шешілді.
Солтүстік-Шығыс конференциясында VPR Astana «Қызылжар» жастарын қосымша уақытта соғылған голдың арқасында жеңсе, «Жеңіс Ж» мен «Жетісу Ж» алты гол соғылған матчта тең түсті. Ал «Аңсат» сырт алаңда төрт гол соғып, сенімді үш ұпай алды.
Оңтүстік-Батыс конференциясы
- «Хан-Тәңірі Ж» – «Талас» – 0:1
- «Қайсар Ж» – «Хромтау» – 0:0
- «Тараз Ж» – «Тұран Ж» – 2:1
- «Ордабасы Ж» – «Атырау Ж» – 1:2
Оңтүстік-Батыс конференциясында «Талас» сырт алаңда «Хан-Тәңірі Ж» командасын 1:0 есебімен жеңді. Кездесудегі жалғыз гол бірінші таймның қосымша уақытында соғылды. 45+1-минутта Эльдар Мүсәлім мергендік танытып, командасына маңызды үш ұпай әкелді.
Таразда алаң иелері «Тұран Ж»-ны 2:1 есебімен тізе бүктірді. Тлеуқабыл Қанатбек матчтың 2-минутында-ақ есеп ашты. 20-минутта Ерасыл Сәрсенбай таразы басын теңестіргенімен, 72-минутта Дәулет Мүсретбек «Тараз» жастарына жеңіс сыйлаған голды соқты.
Шымкентте «Атырау Ж» сырт алаңда «Ордабасы Ж»-дан 2:1 есебімен басым түсті. Райымбек Орақ 36-минутта қонақтарды алға шығарса, екінші таймның басында Абдулмансұр Хасан есепті 2:0-ге жеткізді. Әмір Байтұров 56-минутта бір голмен жауап бергенімен, алаң иелері есепті теңестіре алмады.
Қызылордадағы «Қайсар Ж» – «Хромтау» кездесуінде гол соғылған жоқ. Қос команда да қарсылас қақпасының кілтін таба алмай, матч 0:0 есебімен аяқталды.
Солтүстік-Шығыс конференциясы
- VPR Astana – «Қызылжар Ж» – 3:2
- «Оқжетпес Ж» – «Аңсат» – 1:4
- «Алтай Өскемен Ж» – «Ертіс Ж» – 1:1
- «Жеңіс Ж» – «Жетісу Ж» – 3:3
Солтүстік-Шығыс конференциясында VPR Astana мен «Қызылжар Ж» арасындағы матч аса тартысты өтті. Әлібек Жәрдемов 28-минутта астаналықтарды алға шығарғанымен, Жантөре Молдабаев араға он минут салып есепті теңестірді. Екінші таймда Мейржан Құрманов VPR Astana-ны қайта алға шығарды, алайда 67-минутта Темірлан Жиеналиев есепті 2:2 етті. Матчтың тағдырын Рустам Темірхан шешті – ол 90+3-минутта жеңіс голын соғып, VPR Astana-ға 3:2 есебімен үш ұпай сыйлады.
Көкшетауда «Аңсат» «Оқжетпес Ж-ны» 4:1 есебімен ойсырата жеңді. Алаң иелері Тамирлан Қалымжановтың голымен есеп ашқанымен, кейін қонақтар қатарынан төрт рет мергендік танытты. Ибрахим Болатұлы есепті теңестірсе, Әмір Федунец дубль жасады. Илья Кругляков та бір голмен көзге түсті.
Өскеменде «Алтай Өскемен Ж» мен «Ертіс Ж» 1:1 есебімен тең тарқасты. Павлодарлықтар 20-минутта Еламан Мүліковтың голымен алға шықты. Екінші таймның 50-минутында Юнус Масудов есепті теңестіріп, командалар бір-бір ұпайдан еншіледі.
Астанада «Жеңіс Ж» мен «Жетісу Ж» жанкүйерлерге алты голдық тартысты матч сыйлады. Асланбек Марат бірінші таймда дубль жасап, елордалықтарға екі голдық басымдық әкелді. «Жетісу Ж» екінші таймда Әділ Аманғазының голымен есеп айырмасын қысқартты. 84-минутта Дәулет Худайбергенов есепті 3:1-ге жеткізгенімен, талдықорғандықтар соңына дейін күресті. Райымбек Толағаев 88-минутта екінші голды соқса, Даниил Ларин 90+5-минутта таразы басын теңестірді – 3:3.
22-тур қорытындысы бойынша VPR Astana кезекті маңызды жеңісіне қол жеткізсе, «Аңсат» сырт алаңда ірі есеппен үш ұпай еншіледі. «Жетісу Ж» матч соңындағы екі голдың арқасында жеңілістен құтылды. Оңтүстік-Батыс конференциясында «Талас», «Тараз Ж» және «Атырау Ж» жеңіске жетсе, «Қайсар Ж» мен «Хромтау» ұпай бөлісті.