Футболдан әйелдер арасындағы Қазақстан чемпионатының негізгі кезеңі мәресіне жетті.
2026 жылғы әйелдер лигасына 19 команда қатысты. Негізгі кезең аясында 166 матч өткізілді. Турнирге барлығы 468 футболшы тіркелген, оның 437-сі Қазақстан азаматтары болса, 31-і – легионер.
XVIII тур ойындарынан кейін командалардың конференциялардағы қорытынды орындары анықталып, енді басты назар Петропавлда өтетін чемпиондық плей-офф бәсекелеріне ауысады.
Чемпионат екі конференцияға бөлінді. А конференциясында 9, В конференциясында 10 команда өнер көрсетті. Екі айналымнан тұратын негізгі кезеңнің қорытындысы бойынша әр конференциядан үздік екі команда чемпиондық плей-оффқа жолдама алды.
А конференциясында «БИІК-Шымкент» негізгі кезеңді бірінші орынмен аяқтады. Конференцияның екінші орны «Тұранға» бұйырды.
В конференциясында «Ақтөбе» негізгі кезеңді сенімді түрде бірінші орынмен аяқтады. Екінші орынға «Жеңіс» жайғасты.
Негізгі кезең аяқталғанымен, маусымның басты тартысы әлі алда. Қазақстан футбол федерациясының шешімі бойынша Әйелдер лигасының жартылай финалдары мен финалы Петропавл қаласында өтеді. Шешуші кездесулерді «Қарасай» стадионы қабылдайды.
Жартылай жеткен екі команда чемпиондық кездесуге жолдама алып, 2026 жылғы Қазақстан чемпионы атағын сарапқа салады. Ал ел чемпионы келесі жылы УЕФА Чемпиондар лигасында Қазақстан намысын қорғайды.