Қазақстан Бірінші лигасының 21-туры аяқталды. Тур қорытындысында чемпионат көшбасшысы қарағандылық «Шахтер» өз алаңында тағы бір ірі жеңіске жетіп, бірінші орнын нығайтты. Ал екінші орында келе жатқан «Қайрат-Жастар» Қостанайдан үш ұпаймен қайтты.
«Шахтер» Қарағандыда «Хан-Тәңірін» 4:0 есебімен ойсырата ұтты. «Қайрат-Жастар» сырт алаңда «Тобыл» жастарын1:0 есебімен басым түсті. Ал үшінші сатыдағы «Тұран» кейінге шегерілген 9-тур матчында Ақтауда «Каспий Ж» қақпасына үш жауапсыз гол соқты.
Өзге кездесулерде «Жайық» өз алаңында «Елімай Ж» командасын 2:0 есебімен жеңсе, «Астана Ж» «Таразды» 4:0 есебімен тізе бүктірді. «Оңтүстік Академиясы» «Ақтөбе Ж»-дан 2:1 есебімен басым түсті. Ал «Арыс» өз жанкүйерлері алдында «Батырдың» 3:1 есебімен осал тұсын тапты.
Осылайша, 21 турдан кейін «Шахтер» 58 ұпаймен Бірінші лиганың көшін бастап тұр. «Қайрат-Жастар» 52 ұпаймен екінші орында келеді. Ал 44 ұпай жинаған «Тұран» үздік үштікті түйіндеп тұр.
«Шахтер» төрт жауапсыз гол соқты
Қарағандылық «Шахтер» 21-турда өз алаңында алматылық «Хан-Тәңірін» қабылдап, 4:0 есебімен ірі жеңіске жетті.
Кездесудің алғашқы таймында Диас Қалыбаев пен Артем Литош бір-бір голдан соғып, алаң иелерін сенімді басымдыққа шығарды. Қалыбаев 17-минутта есеп ашса, Литош 25-минутта есепті 2:0-ге жеткізді.
Екінші тайм басталғаннан кейін көп ұзамай Литош тағы да мергендігімен көзге түсіп, 49-минутта дубль рәсімдеді. 71-минутта Қалыбаев та екінші голын соғып, матчтың қорытынды есебін белгіледі — 4:0.
Осы жеңістен кейін «Шахтер» 58 ұпаймен турнир кестесіндегі көшбасшылығын сақтап қалды. «Хан-Тәңірі» 24 ұпаймен оныншы орында келеді.
«Қайрат-Жастар» Қостанайда үш ұпай алды
Алматылық «Қайрат-Жастар» 21-турда сырт алаңда «Тобыл Ж» командасымен кездесіп, 1:0 есебімен басым түсті.
Кездесудегі жалғыз голдың авторы Мансұр Бірқұрманов болды. Оның дәл соққысы алматылықтарға маңызды үш ұпай сыйлады.
Осы нәтижеден кейін «Қайрат-Жастар» 52 ұпай жинап, екінші орнын сақтап қалды. «Тобыл Ж» 10 ұпаймен турнир кестесінің соңғы сатысында қалып отыр.
«Тұранның» Ақтаудағы жорығы сәтті аяқталды
Түркістандық «Тұран» кейінге шегерілген 9-тур матчында сырт алаңда «Каспий Ж» командасын 3:0 есебімен жеңді.
Кездесудің алғашқы таймында Қуаныш Дүйсенбекұлы екі рет мергендігімен көзге түсті. Ол тоғызыншы және 45-минуттарда қарсылас қақпасын дәл көздеп, дубль рәсімдеді.
Екінші таймның 53-минутында Арман Кенесов үшінші голды соғып, матчтың қорытынды есебін белгіледі.
Осы жеңістен кейін «Тұран» 44 ұпай жинап, үшінші орнын нығайтты. «Каспий Ж» 25 ұпаймен тоғызыншы орында келеді.
«Жайық» Оралда сенімді ойнады
Оралдық «Жайық» өз алаңында семейлік «Елімай Ж» командасын 2:0 есебімен қапы қалдырды
Кездесудің басты қаһарманы Роман Чирков болды. Ол 12-минутта пенальтиден есеп ашып, 85-минутта екінші голын соғып, дубль рәсімдеді.
Бұл «Елімай Ж» үшін қатарынан төртінші жеңіліс болды.
Осы жеңістен кейін «Жайық» 30 ұпай жинап, бесінші орынға көтерілді. «Елімай Ж» 12 ұпаймен 13-сатыда қалды.
«Астана» жастары «Тараздың» осал тұсын тапты
Елордалық «Астана Ж» өз алаңында «Таразды» 4:0 есебімен ойсырата жеңді.
20-минутта Ахметәлі Қалтанов есеп ашты. Бірінші таймның соңғы минуттарында Нұрадиль Серіков алаң иелерінің басымдығын екі голға жеткізді.
Матчтың соңғы бөлігінде елордалықтар тағы екі рет мергендігімен көзге түсті. Ануар Төленді мен Арман Варданян қарсылас қақпасын дәл көздеп, қорытынды есепті 4:0-ге жеткізді.
Осы жеңістің арқасында «Астана Ж» төрт матчқа созылған жеңіліс сериясын тоқтатып, 29 ұпаймен бесінші орынға көтерілді. «Тараз» 28 ұпаймен алтыншы сатыға түсті.
«Оңтүстік Академиясы» кезекті үш ұпайын алды
Шымкенттік «Оңтүстік Академиясы» өз алаңында «Ақтөбе Ж» командасын 2:1 есебімен жеңді.
36-минутта Санжар Әлқайдаров есеп ашты. Кейін Баким Жамалов қорғаушылардан сытылып шығып, қақпашымен жеке қалып, шабуылды нәтижелі аяқтады.
Екінші таймда қонақтар қарқынын күшейтті. 57-минутта Дәулет Мұратов есепті теңестірді.
Алайда 71-минутта Әлихан Әли шымкенттіктердің жеңіс голын соғып, командасына маңызды үш ұпай сыйлады.
Осы нәтижеден кейін «Оңтүстік Академиясы» 39 ұпаймен төртінші орында келеді. «Ақтөбе Ж» 23 ұпаймен 11-сатыда қалды.
«Арыс» камбэк жасап жеңді
«Арыс» өз алаңында екібастұздық «Батырды» 3:1 есебімен жеңді.
Бірінші тайм голсыз аяқталды. Есеп 55-минутта ашылды – Әліби Мұхит қонақтарды алға шығарды.
67-минутта Ерболат Құралбаев таразы басын теңестірді. Арада сегіз минут өткенде Максим Ваганов алаң иелерін алға шығарды.
Кездесудің соңғы нүктесін 93-минутта Қайрат Әбдімүтәліпов қойып, қорытынды есепті 3:1-ге жеткізді.
Осы жеңістен кейін «Арыс» 18 ұпай жинады. «Батыр» 26 ұпаймен сегізінші орында келеді.
21-турдың нәтижелері
- «Шахтер» – «Хан-Тәңірі» – 4:0
- «Тобыл Ж» – «Қайрат-Жастар» – 0:1
- «Жайық» – «Елімай Ж» – 2:0
- «Астана Ж» – «Тараз» – 4:0
- «Оңтүстік Академиясы» – «Ақтөбе Ж» – 2:1
- «Арыс» – «Батыр» – 3:1
Кейінге шегерілген 9-тур матчы:+
- «Каспий Ж» – «Тұран» – 0:3
Турнирлік кестенің үздік үштігі
- «Шахтер» – 58 ұпай
- «Қайрат-Жастар» – 52 ұпай
- «Тұран» – 44 ұпай.