Бүгін Қазақстанда әйелдер арасындағы футбол маусымы ресми түрде басталды. Биылғы чемпионаттың ерекшелігі – ел тарихында тұңғыш рет ерлер клубтарының жанынан құралған әйелдер командалары да додаға қосылды. Бұл – отандық футболдағы маңызды жаңалықтардың бірі.
Өткен жылғы біріншілікке тек 4 өңірден 5 команда қатысқан болса, биыл жарысқа 14 ұжым тіркеліп отыр. Бұл әйелдер футболына деген қызығушылық пен қолдаудың артып келе жатқанын көрсетеді.
Тағы бір ерекше атап өтер жайт – бірінші турдағы барлық ойын Лиганың YouTube арнасында жоғары сапада тікелей эфирде көрсетілді. Әр матчты танымал отандық комментаторлар жүргізіп, жанкүйерлерге шынайы футбол атмосферасын сезінуге мүмкіндік сыйлады.
Әйелдер арасындағы бірінші тур ойындары өте тартысты өтті. Кейбір командалар чемпионатқа алғаш рет қатысып жатса да, тәуір ойын өрнегін көрсете білді. Мысалы, Қызылорданың «Қайсар» командасы алғашқы кездесуін сырт алаңда «Жетісуға» қарсы өткізіп, 3:2 есебімен жеңіске жетті. Бұл – өңірлік футбол үшін елеулі жетістік.
Чемпионаттың басты фавориттерінің бірі саналатын Шымкенттің БИІК командасы былтырғы жетістігін қайталауға бел буғанын байқатты. Олар «Қызылжар» командасының қақпасына жауапсыз 9 гол соғып, турдағы ең ірі жеңісті тіркеді.
Тағы бірнеше ойында да айқын басымдық байқалды. «Атырау» командасы сырт алаңда «Оқжетпесті» 7:1 есебімен жеңсе, «Ақтөбе» арулары елордалық «Астана» командасын 6:0 есебімен ойсырата ұтты.
Әйелдер арасындағы чемпионаттың 2-тур ойындары 21 сәуірге жоспарланған.