Қазақстан Бірінші лигасының 20-туры мәресіне жетті. Тур қорытындысында чемпионат көшбасшысы қарағандылық «Шахтер» сырт алаңда кезекті жеңісіне қол жеткізіп, Премьер-лигаға мерзімінен бұрын оралды.
Ал екінші орында келе жатқан «Қайрат-Жастар» Алматыда «Арысты» 1:0 есебімен жеңді. Үшінші сатыдағы «Тұран» сырт алаңда «Батырдан» 4:2 есебімен басым түсті.
Өзге кездесулерде «Оңтүстік Академиясы» Ақтауда «Каспий Ж» командасын 2:1 есебімен жеңсе, «Хан-Тәңірі» өз алаңында «Астана Ж» қақпасына үш жауапсыз гол соқты. «Ақтөбе Ж» «Жайықтан» 1:0 есебімен айласын асырды. Ал «Тараз» өз жанкүйерлері алдында «Тобыл Ж» командасын 3:1 есебімен жеңді.
Осылайша, 20 турдан кейін «Шахтер» 55 ұпаймен Бірінші лиганың көшін бастап тұр. «Қайрат-Жастар» 49 ұпаймен екінші орында келеді. Ал 41 ұпай жинаған «Тұран» үздік үштікті түйіндеп тұр.
«Шахтер» Премьер-лигаға оралды
Қарағандылық «Шахтер» 20-турда сырт алаңда семейлік «Елімай Ж» командасымен кездесіп, 3:0 есебімен сенімді жеңіске жетті.
Бірінші таймның басым бөлігінде ойын тең дәрежеде өткенімен, үзіліске жақын қарағандылықтар қысымды күшейтті. 37-минутта Диас Қалыбаев өкшемен Андрей Ульшинге әдемі пас шығарды. Ульшин мүмкіндігін мүлт жібермей, есеп ашты.
45-минутта Нұрхан Қағазбаев айып алаңының сыртынан допты әуеден дәл теуіп, «Шахтердің» басымдығын екі голға жеткізді.
Екінші таймда «кеншілер» ойынды бақылауда ұстады. Артем Литош жылдам шабуыл кезінде алға шығып, қақпашы мен қорғаушылардың үстінен допты асыра теуіп, қорытынды есепті белгіледі – 0:3.
Осы жеңістен кейін «Шахтер» 55 ұпай жинап, турнир кестесіндегі көшбасшылығын сақтап қалды. Сонымен қатар қарағандылық клуб маусым аяқталуына алты тур қалғанда кем дегенде екінші орын алатынына кепілдік берді. «Қайрат-Жастар» Премьер-лигада өнер көрсетуге құқылы болмағандықтан, «Шахтер» Қазақстанның жоғарғы дивизионына оралуын мерзімінен бұрын қамтамасыз етті.
«Қайрат-Жастарға» пенальтидің көмегі тиді
Алматылық «Қайрат-Жастар» өз алаңында «Арысты» қабылдап, 1:0 есебімен жеңіске жетті.
Кездесу тең дәрежеде өтіп, екі команда да алғашқы минуттардан шабуылда белсенділік танытты. Дегенмен қақпашылар сенімді ойнап, есепті ерте ашуға мүмкіндік бермеді.
Матчтағы шешуші сәт 30-минутта болды. Алматылықтардың шабуылы кезінде «Арыс» қорғаушысы айып алаңында ереже бұзып, төреші пенальти белгіледі. Он бір метрлік айып добын Кәрім Махаметжан сенімді орындап, алаң иелерін алға шығарды.
Бұл матчтағы жалғыз гол болып қалды. «Қайрат-Жастар» 49 ұпай жинап, екінші орында келе жатыр. «Арыстың» еншісінде 15 ұпай бар.
«Тұран» ашуын «Батырдан» алды
Түркістандық «Тұран» Ақсу қаласындағы «Достық» стадионында екібастұздық «Батырмен» кездесіп, 4:2 есебімен басым түсті.
Қонақтар 34-минутта есеп ашты. Қуаныш Дүйсенбекұлы қарсылас қақпасын дәл көздеп, «Тұранды» алға шығарды.
61-минутта Әліби Мұхит есепті теңестірді. Алайда жеті минуттан кейін Едіге Оралбай түркістандықтарды қайта алға шығарды.
74-минутта Назар Аль-Хадж «Батырдың» екінші голын соғып, таразы басын тағы теңестірді – 2:2. Дегенмен матчтың соңғы бөлігінде «Тұран» екі рет мергендігімен көзге түсті. 81-минутта Саят Бақтыбай гол соқса, 87-минутта Оралбай өзінің екінші добын енгізіп, дубль рәсімдеді. Қорытынды есеп – 2:4.
Бұған дейін Түркістан командасы «Қайрат-Жастардан» ірі есеппен жеңілген болатын. Осы жеңістен кейін «Тұран» 41 ұпай жинап, үшінші орнын нығайтты. «Батырдың» еншісінде 26 ұпай бар.
Жамаловтың дублі «Оңтүстік Академиясына» жеңіс сыйлады
Шымкенттік «Оңтүстік Академиясы» сырт алаңда Ақтаудың «Каспий Ж» командасын 2:1 есебімен жеңді.
Қонақтар сегізінші минутта есеп ашты. Баким Жамалов қорғаушылардан сытылып шығып, қақпашымен жеке қалып, мүмкіндігін сәтті пайдаланды.
Бірінші таймның қосымша уақытында Жамалов ерекше голмен дубль рәсімдеді. Ол бұрыштамадан допты тікелей қақпаға бағыттап, есепті 0:2-ге жеткізді.
67-минутта «Каспий Ж» капитаны Алмас Арменов айып алаңының сыртынан әуеден келген допты қуатты соққымен қақпаға бағыттап, есеп айырмасын қысқартты. Алайда ақтаулықтар қалған уақытта таразы басын теңестіре алмады.
«Оңтүстік Академиясы» 36 ұпай жинап, төртінші орында келеді. «Каспий Ж»-ның еншісінде 25 ұпай бар.
«Хан-Тәңірі» үш жауапсыз гол соқты
Алматылық «Хан-Тәңірі» өз алаңында елордалық «Астана Ж» командасына қақпасына үш гол соқты.
21-минутта Бахтишат Абдуллаев айып добын әдемі орындап, алаң иелерін алға шығарды.
40-минутта алматылықтар жылдам қарымта шабуыл ұйымдастырды. Оны Дархан Меделхан дәл соққымен аяқтап, есепті 2:0-ге жеткізді.
Екінші таймның 55-минутында Меделхан алыстан дәл соққы жасап, дубль рәсімдеді әрі кездесудің қорытынды есебін белгіледі – 3:0.
Осы жеңістен кейін «Хан-Тәңірі» 24 ұпай жинады. «Астана Ж»-ның еншісінде 26 ұпай бар.
«Ақтөбе Ж» жеңіске жетті
«Ақтөбе Ж» өз алаңында оралдық «Жайықты» қабылдап, 1:0 есебімен басым түсті.
Бірінші тайм тең дәрежеде өтті. Қонақтар бірнеше қауіпті мүмкіндік жасағанымен, үзіліске дейін командалар есеп аша алмады.
Матчтағы жалғыз гол 53-минутта соғылды. Ақтөбеліктердің соққысынан кейін доп «Жайық» қорғаушысының қолына тиіп, төреші пенальти белгіледі. Әділбек Бегімов он бір метрлік айып добын дәл орындады.
Қалған уақытта «Жайық» есепті теңестіруге тырысқанымен, алаң иелерінің қорғанысы мен қақпашысы сыр берген жоқ.
«Ақтөбе Ж» 23 ұпай жинады. «Жайықтың» еншісінде 27 ұпай бар.
«Тараз» жанкүйерлерін қуантты
Жамбылдық «Тараз» өз алаңында Қостанайдың «Тобыл Ж» командасын 3:1 есебімен қапы қалдырды.
Алаң иелері кездесуді белсенді бастағанымен, есепті 36-минутта ғана ашты. Бауыржан Байтана стандартты жағдайдан пас шығарып, Абылайхан Жұмабек допты қақпаға бағыттады.
Бірінші таймның қосымша уақытында Диас Лесбек қапталдан көтерілген допты баспен дәл соғып, «Тараздың» басымдығын арттырды – 2:0.
48-минутта Аманжол Бақытжанов қақпашымен жеке шығып, қостанайлықтардың бір голын қайтарды.
Алайда 82-минутта Бауыржан Байтана алыстан әдемі соққы жасап, кездесудің қорытынды есебін белгіледі – 3:1.
Осы жеңістен кейін «Тараз» 28 ұпай жинап, бесінші орынға көтерілді. «Тобыл Ж» 10 ұпаймен турнир кестесінің соңғы сатысында қалып отыр.
20-турдың нәтижелері
- «Елімай Ж» – «Шахтер» – 0:3
- «Қайрат-Жастар» – «Арыс» – 1:0
- «Батыр» – «Тұран» – 2:4
- «Каспий Ж» – «Оңтүстік Академиясы» – 1:2
- «Хан-Тәңірі» – «Астана Ж» – 3:0
- «Ақтөбе Ж» – «Жайық» – 1:0
- «Тараз» – «Тобыл Ж» – 3:1
Турнирлік кестенің үздік үштігі
- «Шахтер» – 55 ұпай
- «Қайрат-Жастар» – 49 ұпай
- «Тұран» – 41 ұпай.