12-13 сәуір күндері футболдан Қазақстан кубогының 1/8 финал ойындары өтіп, ширек финалға жолдама алған 8 команда белгілі болды. Турнирдің былтырғы жеңімпазы «Ақтөбе» жарысты 1/8 финалда аяқтады.
Матч нәтижелері:
«Ұлытау» — «Елімай» — 0:3
«Қызылжар» — «Қайсар» — 1:0
«Қайрат» — «Каспий» — 3:0
«Тұран» — «Атырау» — 2:0
«Хан-Тәңірі» — «Ордабасы» — 0:2
«Оқжетпес» — «Астана» — 1:1 (пенальти — 6:7)
«Жеңіс» — «Ақтөбе» — 1:0
«Тобыл» — «Жетісу» — 0:0 (қосымша уақытта — 1:0)
12 сәуір
«Ұлытау» — «Елімай» — 0:3
Қазақстан кубогының алғашқы ширек финалисі «Ұлытау» мен «Елімай» арасында өткен кездесуде анықталды. Матч Жезқазғанда өтсе де, семейлік команда «Металлург» стадионында алаң иелері секілді еркін ойнады. Бірінші таймның соңына қарай екі гол соққан Карповичтің шәкірттері екінші таймда тағы бір мәрте мергендік танытып, есепті 3:0-ге жеткізді. Осылайша «Елімай» келесі кезеңге қиналмай шықты.
«Қызылжар» — «Қайсар» — 1:0
Петропавл мен Қызылорда командаларының кездесуі Қостанайдағы жабық манежде өтті. Ойын ерекше тоқталып өтетіндей аса қауіпті сәттерге толы болған жоқ. Матчтың негізгі кезеңінің соңғы минуттарына дейін бір-бірінің қақпасынан саңылау таба алмай, командалар қосымша таймға дайындала бастаған сәтте «Қызылжар» футболшылары айып добынан тамаша гол соқты. 30 метрлік қашықтықтан соққы жасаған Нойоктың добын «Қайсардың» тәжірибелі қақпашысы Александр Мокиннің де қайтаруға шамасы жетпеді. Осылайша, «Қызылжар» ширек финалға жолдама алды.
«Қайрат» — «Каспий» — 3:0
Ел кубогін тарихта ең көп жеңіп алған және қазіргі ел чемпионы «Қайрат» өз алаңында Бірінші лига өкілін қабылдады. Ойынның айқын фавориті саналған алматылықтар алғашқы таймда 11 метрлік айып добынан екі гол соқты. Ал үзілістен кейін алаңға қосалқы құрамнан шыққан Дастан Сәтпаев кездесудің нүктесін қойып, командасын келесі кезеңге шығарды.
«Тұран» — «Атырау» — 2:0
«Тұран» футболшылары матчтың басынан-ақ ширек финалға шығуға деген ниеттерін анық байқатты. Кездесудің 6-минутында былтырғы финалда «Атырау» сапында ойнаған, биыл «Тұран» жейдесін киген Игорь Стасевич есепті ашса, арада көп уақыт өтпей Горан Милойко таблодағы көрсеткішті еселеді. Қалған уақытта «Тұран» футболшылары есептегі басымдығын сақтап, келесі кезеңге жолдама алды.
13 сәуір
«Хан-Тәңірі» — «Ордабасы» — 0:2
Бірінші лиганың өкіліне қарсы сырт алаңда ойнаған «Ордабасы» кездесуді сақтықпен бастады. Дегенмен, ойынның орта тұсында шымкенттіктер гол соғып, кездесудің есебін ашты. Екінші тайм да қарқынын жоғалтпаған қонақтар тағы бір гол соғып, келесі кезеңнің тағдырын шешіп тастады. Айта кетейік, «Ордабасы» футболшылары биылғы маусымда алғаш рет бір ойында екі гол соқты.
«Оқжетпес» — «Астана» — 1:1 (пенальти — 6:7)
Қазақстанның жеті дүркін чемпионы «Астана» кубокты ең кейінгі рет 2016 жылы жеңіп алған еді. Биылғы жарыстың алғашқы ойыны астаналықтар үшін оңайға соқпады. Көкшетауда өткен кездесуде «Астана» негізгі уақытта да, қосымша уақытта да қарсыласынан басым түсе алмады. Дегенмен, пенальти сериясында «Астананың» жолы болып, ширек финалға өтті. Айта кетейік, бұл ойын 1/8 финал кезеңінде екі команда да гол соққан жалғыз матч болды.
«Жеңіс» — «Ақтөбе» — 1:0
Биыл жанкүйерлер Қазақстан кубогының жаңа иегеріне куә болады. Өйткені турнирдің былтырғы жеңімпазы «Ақтөбе» 1/8 финалдан әріге аса алмады. «Астана Аренада» өткен кездесуде ойын тағдырын екінші таймдағы «Жеңіс» ойыншысы соқан жалғыз голы шешіп кетті. Айта кетерлігі, «Ақтөбенің» бас бапкері Игорь Леонов бұл матчта негізгі құрам ойыншыларын толық алаңға шығарған жоқ.
«Тобыл» — «Жетісу» — 0:0 (қосымша уақытта — 1:0)
Ширек финалдың соңғы жолдамасы «Тобыл» мен «Жетісу» арасындағы матчта сарапқа салынды. Қостанайлықтар өз алаңында фаворит саналғанымен, негізгі уақытта талдықорғандықтардың қорғанысын бұза алмады. Тек қосымша таймның соңғы минуттарында ғана «Тобыл» жеңіс добын соғып, келесі кезеңге жолдама алды.
2025 жылғы Қазақстан кубогының ширек финал жұптары:
«Қызылжар» — «Елімай»
«Ордабасы» — «Қайрат»
«Жеңіс» — «Астана»
«Тұран» — «Тобыл»