Қазақстан кубогының финалистері анықталды. Шымкенттің «Ордабасы» мен Қызылорданың «Қайсар» командалары шешуші матчта ел кубогын сарапқа салады.
«Ордабасы» камбэк жасап, финалға шықты
«Ордабасы» жартылай финалдың қарымта кездесуінде Өскеменнің «Алтайын» сырт алаңда 2:1 есебімен жеңді.
Матчтың басында алаң иелері есеп ашты. 4-минутта Дарко Додев «Алтайды» алға шығарды. Алайда шымкенттіктер көп ұзамай жауап берді: 11-минутта Бьорн Йонсен таразы басын теңестірді.
28-минутта Жасұлан Әмір «Ордабасының» екінші голын соғып, командасына жеңіс сыйлады. Екінші таймда есеп өзгерген жоқ.
Алғашқы кездесуде де «Ордабасы» 3:1 есебімен басым түскен еді. Осылайша, екі матчтың қорытындысы бойынша шымкенттік клуб 5:2 есебімен жеңіп, Қазақстан кубогының финалына жолдама алды.
«Қайсар» Астанадағы драмалық матчта жолдамаға ие болды
Екінші жартылай финалда елордалық «Жеңіс» өз алаңында «Қайсарды» 3:2 есебімен жеңгенімен, финалға шыға алмады.
Алғашқы ойында қызылордалықтар 3:1 есебімен жеңіске жеткен болатын.
Қарымта кездесуде «Жеңіс» 18-минутта Жиан Мартинштің голынан кейін есеп ашты. 25-минутта Андрия Филипович есепті 2:0-ге жеткізіп, астаналықтардың камбэк жасау мүмкіндігін арттырды.
Алайда 27-минутта «Жеңіс» қорғаушысы Зураб Тевзадзе екінші сары қағазын алып, алаңнан қуылды.
69-минутта Микеас «Қайсардың» алғашқы голын соқты. 75-минутта Филипович дубль жасап, есепті 3:1-ге жеткізді. Осы сәтте екі кездесудің жалпы есебі 4:4 болып тұрған еді.
Матчтың тағдырын 90-минуттағы гол шешті. Рамазан Бағдат «Қайсардың» екінші добын соғып, қорытынды есепті 3:2 етті.
Нәтижесінде «Қайсар» қарымта ойында жеңілгеніне қарамастан, екі матчтың қорытындысы бойынша 5:4 есебімен басым түсіп, финалға шықты.
Финалда – «Ордабасы» мен «Қайсар»
Осылайша, 2026 жылғы Қазақстан кубогының финалында Шымкенттің «Ордабасы» мен Қызылорданың «Қайсары» кездеседі.
«Ордабасы» финалға екінші жыл қатарынан шығып отыр. Өткен маусымда шымкенттік команда шешуші кездесуде Қостанайдың «Тобылына» есе жіберген болатын. Биыл «Ордабасы» тағы бір мүмкіндікке ие болса, «Қайсар» ел кубогы үшін таласта шымкенттіктерге қарсы шығады.