Қазақстан Премьер-лигасының 22-туры және кейінге қалған 9-турдың бір кездесуі аяқталды.
Чемпиондық үшін таласып жатқан «Ордабасы» мен «Қайрат» кезекті жеңістеріне қол жеткізді. Шымкенттік клуб «Алтайдан» басым түсіп, көш басындағы төрт ұпайлық айырмасын сақтап қалса, алматылықтар өз алаңында «Ұлытауды» сенімді жеңді. «Астана» Петропавлда жеңісті соңғы минуттарда уысынан шығарып алды, ал «Ақтөбе» Қызылордада камбэк жасап, Игорь Черевченко тұсындағы алғашқы жеңісіне қол жеткізді.
«Қайрат» – «Ұлытау» – 3:1
Голдар: Эдмилсон, 32 (1:0). Юккола, 53 (2:0). Тұяқбаев, 74 (3:0). Черняк, 90+6- пенальтиден (3:1).
Кейінге қалған 9-тур ойынында «Қайрат» өз алаңында «Ұлытауды» қабылдады. Еурокубоктағы сәтсіздіктен кейін алматылықтарға ішкі біріншілікке қайта бейімделу маңызды еді. Алғашқы минуттарда «Ұлытау» қарсылық көрсетіп, бірнеше қауіпті шабуыл ұйымдастырғанымен, бірінші голды алаң иелері соқты.
32-минутта Марк Гуальдың пасынан кейін Эдмилсон есеп ашты. Екінші тайм басталған соң «Қайрат» қарқынын күшейтіп, 53-минутта Ойва Юккола екінші голды соқты. 74-минутта Азамат Тұяқбаев есепті 3:0-ге жеткізіп, матч тағдырын іс жүзінде шешіп қойды.
Қосымша уақытта Илья Черняк пенальтиден бір голмен жауап қайтарды. Дегенмен «Қайрат» 3:1 есебімен сенімді жеңіске жетіп, чемпиондық жарыста «Ордабасың» ізін қуып келеді.
«Жеңіс» – «Жетісу» – 4:1
Голдар: Филипович, 13-пенальтиден (1:0). Филипович, 27-пенальтиден (2:0). Адилио, 55 (3:0). Наумец, 71 (4:0). Живанович, 76 (4:1).
Астанада өткен матчта «Жеңіс» маусымдағы ең ірі жеңістерінің біріне қол жеткізді. Жаңа бас бапкер Владимир Слишковичтің алғашқы кездесуі елордалықтар үшін сәтті өтті.
Бірінші таймда Андрия Филипович екі мәрте пенальтиді дәл орындап, дубль жасады. Үзілістен кейін алаң иелері шабуылын тоқтатпады. 55-минутта Адилио үшінші голды соқса, 71-минутта Владислав Наумец есепті 4:0-ге жеткізді.
«Жетісу» тек бес минуттан кейін Марко Живановичтің голымен жауап қайтарды. Алайда бұл матч тағдырына әсер еткен жоқ. «Жеңіс» сенімді жеңіске жетсе, талдықорғандықтардың сәтсіз сериясы жалғасты.
«Ордабасы» – «Алтай» – 3:1
Голдар: Малый, 4 (1:0). Йонсен, 38 (2:0).Дадаев, 69 (2:1). Йонсен, 86-пенальтиден (3:1).
Чемпионат көшбасшысы «Ордабасы» өз алаңында турнир кестесінің соңғы жағында жүрген «Алтайды» қабылдады. Шымкенттіктер кездесуді өте қарқынды бастап, төртінші минутта-ақ есеп ашты. Лео Нательдің бұрыштамадан берген добын Сергей Малый дәл соққымен түйіндеді.
38-минутта Эльхан Астановтың пасынан кейін Бьорн Йонсен есепті 2:0-ге жеткізді. Екінші таймда «Алтай» қарсылық танытып, Ибрагим Дадаев арқылы бір голмен жауап қайтарды.
Қонақтар есепті теңестіруге ұмтылғанымен, матч соңында «Ордабасы» пенальти алды. Йонсен он бір метрлік соққыны дәл орындап, дубль авторы атанды. Норвегиялық шабуылшы хет-трик жасауға да жақын болды, бірақ оның бір соққысы қақпа бағанасына тиді.
Осы жеңістен кейін «Ордабасы» «Қайраттан» төрт ұпайлық басымдығын сақтап қалды және чемпиондық жолындағы тағы бір маңызды қадам жасады.
«Қайсар» – «Ақтөбе» – 1:2
Голдар: Мозес, 11 (1:0). Соса, 77 (1:1). Соса, 90+3 (1:2).
Қызылордадағы кездесу турдың ең драмалық ойындарының біріне айналды. Матчтың басында «Ақтөбе» белсенді ойнағанымен, бірінші болып алаң иелері есеп ашты. 11-минутта Виктор Мозес алыстан дәл соққы жасап, «Қайсарды» алға шығарды.
Қонақтар бұдан кейін бірнеше мүмкіндік жасағанымен, «Қайсар» қақпашысы Нұрымжан Салайдин сенімді ойнады. Екінші таймда Игорь Черевченко шәкірттері қысымды күшейтіп, 77-минутта Даниэль Соса Луиш Нанидің пасынан кейін есепті теңестірді.
Негізгі уақыт аяқталғаннан кейін де актөбеліктер шабуылын тоқтатпады. 90+3-минутта Соса тағы да шешуші сәтте дәл ойнап, екінші голын соқты. Осылайша «Ақтөбе» 2:1 есебімен жеңіске жетіп, Черевченко тұсындағы алғашқы үш ұпайына қол жеткізді.
«Ертіс» – «Тобыл» – 0:2
Голдар: Сенхаджи, 23 (0:1). Лисакович, 52 (0:2).
Павлодарда өткен кездесуде «Тобыл» маңызды үш ұпайға қол жеткізді. 23-минутта Райан Сенхаджи есеп ашса, екінші таймның басында Виталий Лисакович қонақтардың басымдығын арттырды.
69-минутта Антонио Боршич алаңнан қуылып, «Тобыл» он ойыншымен қалды. Алайда «Ертіс» сан басымдығын пайдалана алмады. Матч соңында павлодарлықтардың өздері де ойыншысынан айырылды – Руслан Юденков қызыл қағаз алды.
Нәтижесінде «Тобыл» 2:0 есебімен жеңіске жетті. Ал «Ертіс» турнир кестесінің төменгі бөлігіндегі жағдайын жақсарта алмады.
«Каспий» – «Елімай» – 2:2
Голдар: Седько, 12-пенальтиден (1:0). Седько, 45+3-пенальтиден (2:0). Жақсылықов, 79 (2:1). Мұртазаев, 87 (2:2).
Ақтауға қайта оралған «Каспий» бірінші таймнан кейін жеңіске өте жақын көрінді. Павел Седько екі мәрте пенальтиді дәл орындап, алаң иелерін 2:0 есебімен алға шығарды.
Алайда «Елімай» екінші таймның соңында мінез көрсетті. 79-минутта қосалқы құрамнан шыққан Айбар Жақсылықов есеп айырмасын қысқартты. Арада сегіз минут өткенде Роман Мұртазаев тағы бір гол соғып, таразы басын теңестірді.
Осылайша «Елімай» екі доп айырмасымен жеңіліп жатып, 2:2 есебіне қол жеткізді. Дегенмен жүлделі орындар үшін күресіп жүрген семейліктер үшін жоғалтылған екі ұпайдың маңызы жоғары болуы мүмкін.
«Қызылжар» – «Астана» – 1:1
Голдар: Басманов, 58 (0:1), Пищевич, 90+3 (1:1).
«Астана» Петропавлға қатарынан бес жеңістен кейін келген еді. Елордалықтар алтыншы жеңіске де өте жақын болды.
Бірінші таймда есеп ашылмады. 58-минутта Станислав Басманов дәл соққы жасап, «Астананы» алға шығарды. Осыдан кейін қонақтар жеңісті нәтижені ұстап тұруға тырысты.
Алайда соңғы минуттарда «Қызылжар» қысымды күшейтті. Қосымша уақыттың үшінші минутында Неделько Пищевич есепті теңестіріп, петропавлдықтарға бір ұпай сыйлады.
Осы тең ойыннан кейін «Астананың» бес матчтық жеңісті сериясы тоқтады. Соған қарамастан, елордалық клуб үшінші орындағы позициясын сақтап қалды.
«Атырау» – «Оқжетпес» – 0:2
Голдар: Бородин, 76 (0:1). Өміртаев, 87 (0:2).
Турдың соңғы кездесуі «Атырау» мен «Оқжетпес» арасында өтті. Бірінші таймда екі команда да аса тәуекелге бара қоймай, қауіпті мүмкіндіктер аз болды.
Ойын тағдыры екінші таймның соңғы бөлігінде шешілді. 76-минутта Дмитрий Бородин алыстан бағыттаған соққысымен есеп ашты. 87-минутта Оралхан Өміртаев тағы бір гол соғып, көкшетаулықтардың жеңісін бекітті.
«Оқжетпес» үш ұпай алып, үшінші орын үшін күресін жалғастырды және «Астанаға» қайта жақындай түсті. Ал «Атырау» төменгі бөліктегі жағдайын қиындатып алды.
Тур қорытындысы
22-турдан кейін чемпиондық жарыстағы жағдай аса өзгерген жоқ. «Ордабасы» өз кездесуін жеңіп, «Қайраттан» төрт ұпайлық басымдығын сақтап қалды. Алматылықтар да «Ұлытауды» ұтып, чемпиондыққа таласты жалғастырып келеді.
Үшінші орын үшін күрес керісінше шиеленісе түсті. «Астана» Петропавлда соңғы минутта екі ұпай жоғалтса, «Оқжетпес» пен «Ақтөбе» жеңіске жетіп, елордалықтарға жақындай түсті. «Елімай» болса «Каспиймен» тең ойнап, жүлделі орындарға жақындау мүмкіндігін толық пайдалана алмады.
Төменгі бөлікте «Жетісу», «Ертіс», «Атырау» және «Алтай» үшін әрбір келесі матчтың маңызы арта түседі. Чемпионат мәреге жақындаған сайын чемпиондық үшін де, қола жүлде мен Премьер-лигада қалу үшін де тартыс қыза бермек.