Футболдан Қазақстан Екінші лигасының 18-туры тартысты әрі нәтижелі кездесулермен есте қалды. Турда бірнеше команда ірі есеппен жеңіске жетсе, кейбір матчтарда жеңімпаз соңғы минуттарда анықталды. Солтүстік-Шығыс конференциясында «Шахтер Ж» мен «Ертіс Ж» қарсыластарына бес голдан соқты.
Оңтүстік-Батыс конференциясы
- «Тұран Ж» – «Тараз Ж» – 1:1
- «Атырау Ж» – «Ордабасы Ж» – 2:3
- «Хан-Тәңірі Ж» – «Талас» – 2:4
- «Қайсар Ж» – «Хромтау» – 1:1
Оңтүстік-Батыс конференциясындағы ең нәтижелі кездесу Алматыда өтті. «Талас» сырт алаңда «Хан-Тәңірі» жастарын 4:2 есебімен жеңіп, маңызды үш ұпайға қол жеткізді. Қонақтар бірінші таймда екі гол соғып, үзіліске басымдықпен шықты. Кездесудің соңғы нүктесін қосымша уақытта Эльдар Мүсәлім қойды.
Атырауда өткен матчта «Ордабасы Ж» алаң иелерінен 3:2 есебімен басым түсті. Шымкенттік команда Бақдияр Әбен мен Райымбек Бақтығалиевтің голдарының арқасында бірінші таймнан кейін 2:0 есебімен алда тұрды. «Атырау Ж» үзілістен кейін есепті теңестіргенімен, 78-минутта Марғұлан Қонар жеңіс голын соқты.
Түркістанда «Тұран Ж» мен «Тараз Ж» 1:1 есебімен тең тарқасты. Алаң иелері Даниил Колядиннің голымен алға шыққанымен, 84-минутта Санжар Кемелбек таразы басын теңестірді.
Қызылордадағы «Қайсар Ж» – «Хромтау» кездесуінде де жеңімпаз анықталған жоқ. «Қайсар» жастары бірінші таймда есеп ашса, қонақтар 72-минутта жауап голын соғып, матч 1:1 есебімен аяқталды.
Солтүстік-Шығыс конференциясы
- «Жетісу Ж» – «Аңсат» – 4:5
- «Ертіс Ж» – «Ұлытау Ж» – 5:0
- «Шахтер Ж» – «Оқжетпес Ж» – 5:0
- «Жеңіс Ж» – VPR Astana – 0:2
- «Қызылжар Ж» – «Алтай Өскемен Ж» – 2:0
Солтүстік-Шығыс конференциясындағы ең тартысты кездесу Талдықорғанда өтті. «Жетісу Ж» мен «Аңсат» жанкүйерлерге тоғыз голдық футбол спектаклін сыйлады. Нәтижесінде қонақтар 5:4 есебімен жеңіске жетті. Илья Кругляков дубль авторы атанып, оның екінші голы 90+1-минутта соғылды.
Павлодарда «Ертіс Ж» «Ұлытау» жастарын 5:0 есебімен ойсырата жеңді. Әлхам Нұрлан кездесудің алғашқы 17 минутында дубль жасап, командасының ірі жеңісіне жол ашты.
Қарағандыда да дәл осындай есеп тіркелді. «Шахтер Ж» өз алаңында «Оқжетпес» жастарын 5:0 есебімен басым түсті. Әлихан Исраилов бірінші таймда екі гол соғып, жеңіске елеулі үлес қосты.
Астанада VPR Astana «Жеңіс Ж» командасын 2:0 есебімен жеңді. Әділжан Нұрбай 43-минутта есеп ашса, Диас Құралбаев 85-минутта кездесудің қорытынды есебін белгіледі.
Петропавлда «Қызылжар Ж» «Алтай Өскемен Ж» командасын 2:0 есебімен тізе бүктірді. Мирас Темірбаев 7-минутта есеп ашып, ал 81-минутта Жантөре Молдабаев алаң иелерінің жеңісін нықтады.
18-тур қорытындысы бойынша конференциялардағы бәсеке одан әрі қыза түсті. «Шахтер Ж» мен VPR Astana кезекті жеңістеріне қол жеткізсе, «Ертіс Ж» ірі есеппен үш ұпай еншіледі. Ал Оңтүстік-Батыс конференциясында бірқатар команданың ұпай жоғалтуы турнирлік кестедегі тартысты одан әрі күшейтті.